Дагъустандин Муфтийдин меслятар
Дагъустандин Муфтий шейх Агьмад Эфендиди Леваши райондин Урма хуьре кьиле фейи Республикадин алимрин межлисдал мусурманриз менфятлу вяз гана. Ада межлисдал кlватl хьанвайбуруз ва вири муъминриз агъадихъ галай меслятар къалурна:
- Гьалал пул къазанмишиз алахъ, а кар патал са рехъ – хуьруьн майишат я.
- Чара инсанривай жуван нукьсанар чириз алахъ ва абур дуьзар хъувунал кIвалах ая.
- Гьуьжетрикай кьил къакъуд, вучиз лагьайтIа гьуьжетда гьахъвал субутарун мумкин туш. Гьатта пайгъамбарривай, залан делилар аваз, гьуьжетра Гьакъикъат кьабулиз инанмишариз хьанач.
- Инсанрихъ галаз акьунар хьайила гъалатI жувакай жагъура, акси патакай ваъ. Аллагьдиз ﷻ туба ая.
- Итимри чеб лайихлудаказ, жуьрэтлувал хвена ва куьлуь-шуьлуьяр патал папарик ва кIвале авайбурук себебсуз тахсир кутан тийиз тухвана кIанда.
- Итимри фитнейрикай игьтиятвал авун лазим я, и крари абур гьич гуьрчегарзавач.
- Чна ийизвай вири крар Шариатдин терезрал эцигун лазим я, амма аксина ваъ.
- Вири алимриз гьуьрмет авун лазим я. Гьелбетда, гьар садан гуьгъуьна аваз чавай физ жедач, амма гьуьрмет авуна кIанда. Алимдин кIаникай эгъуьндалди хуьруьн майишатдал машгъул хьайитIа хъсан я.
- Дуьньядин нубатсуз ката-калтугунал ва чаз талукь тушир цIийи хабаррал машгъул жемир.
- Исятда гьар садаз вири дуьньядиз вуч кIантIани къалурдай мумкинвал хьанва ва вичиз смартфон ава лугьуз, ам ихтияр авай кар яз гьисабзава. Амма ам акI туш.
- Наркомания чи жемятдин арадиз гьахьзава ва виридалайни пашман жедай кар ам я хьи, итимар себеб яз а азар дишегьлийрикни акатзава.
Наркомандивай вуч хьайитIани гуьзетиз жеда, гьихьтин чIуру кар хьайитIани, лап инсан кьиникьни
Гзаф диде-бубайри, чпин аялдихъ а азар галукьнавайди чиз, ам чуьнуьхзава ва абур эвленмишиз алахъзава, некягьди а азар сагъар хъийида лагьана, фикир ийиз, амма гьа идалди абуру анжах адан паб азарлу хьунин хатавилик кутазва. Бязи вахтара чпин хва медресадик кутаз алахъзава, маса аялар хатавилик кутаз, за рикIе тIал аваз и кардикай лугьузва.
Зи кIвале са югъни авач зи патав СВО-дин иштиракчияр ва я абурун мукьвабур татай, абуруз дуьа ийидайвал тIалабиз. Чна абуруз гьамиша дуьа ийизва.
