Жегьилвал чуьнуьхзавай ругуд угъри
Жегьилвал чуьнуьхзавай ругуд угъри
Ахьтин дишегьлияр ава хьи, абурун яш саки тайин ийиз жезвач: 25, 28, 30 ва я 35 йис? Анжах гиман ийиз жезва. Жегьилвилин сир кве ава? Ваъ, гиалуронка рапар ягъуна авач, багьа гелкъведай шейэра авач ва гьатта генетикадани авач. Вири кар кIеви къайдада ва жувал кIвалахуна ава.
Чакай гзафбуру гьар юкъуз жуван тазавал ва жегьилвал кIуьгьуь булкайрихъ, патахъ хьанвай кьулан тарцихъ ва сагъламсуз ахварихъ галаз дегишарзава. Гьихьтин хесетри гьар юкъуз чи жегьилвал чуьнуьхзава?
Ширин затIарал рикI алайбур фад кьуьзуь жезва
И гьакъикъат хиве кьун гьикьван пашманардай кар ятIани, амма ширин затIарал рикI хьуни неинки артух заланвилел гъизва, гьакI хам фад шуьткьуьнални. Шекер ишлемишуни беден гликация хьунал гъизва. Ам шекердин молекулаяр клеткайрин белокрин волокнайрихъ галкIунихъ галаз алакъалу я. Гликациядин нетижада хамунихъ тIарамвал амукьзавач, ам дакIвазва, куьлуь шуьткъверри кIевзава.
Ацукьна тухузвай уьмуьр
Эгер беденди гужлуз кар авуникай чна гьар са жуьреда кьил къакъудиз хьайитIа, сагълам нур гузвай хам рикIелай алудайтIа жеда. Беденди кIвалах авуни метаболизм хъсанарзава ва хам цIийи хъхьуниз хъсан шартIар яратмиш хьунин себеб жезва, ва и кар себеб яз, ам цIалцIам жезва.
Тамам ахвар тахьун
Бегьем ахвар тахьун – чи жегьилвилин кьилин душманрикай сад я. Субутнава хьи, гьатта тамам ял ягъун тахьай са шумуд йикъа хамуниз таъсирзава. Кореяда зурба ахтармишунар тухвана: яхцIур йис ва адалай гзаф хьанвай дишегьлийри са гьафтеда ахвар кьит авуна (йифиз кьуд сятина ксузвай). Ахтармишунин гьеле кьве йикъалай абурун хамунал яшдин дегишвилер лап ачухдиз дуьздал акъатиз хьана, хамуник кьеж хьун гзаф агъуз хьана.
Пис акунар
Гьикьван вахтунда чун са квез ятIани агъуз килигзава? Компьютердихъ ацукьна кIвалахдайла, социальный сетра сада-садаз кхьидайла чун гьа тегьерда яргъалди жезва. Ида ахьтин чкадал гъизва хьи, гардандин цIарцIин ачухвал квахьзава. КIулар экъисуни гардандин ва ченедин жакIумар зайифарзава. Пис акунри дарвиле тунвай хурудал алай хам агаж жезва.
Макияждин яцIу къат
Тональный крем, консилер, бронзер, скульптор, жими кишран (румяна), хайлайтер – алай девирдин рушариз и гафар адетдинбур хьанва. Амма абурук виридак сагъ са Менделееван таблица ква хьи. Хамунал абурун кьадар гзаф хьуни вахтундилай вилик кьуьзуь хьунал гъизва.
ЧIуру тегьерда ксун
Чин хъуьцуьганда туна руфунал ксуни фад шуьткъверар хьунал гъизва, хабардар ийизва косметологри. Ксудайла, гьелбетда, виридалай хъсан я къвалал ва я далудал къаткун. Къвалал ксудайла саламат хьун патал, гардандал ва чинал силикондин махсус эцигдай шейэр ишлемишайтIа жеда, абуруз «гуьрчегвилин хъуьцуьганар» лугьузва.
