Аллагьдиз ﷻ шукур авунин арифдарвал
Аллагьдиз ﷻ шукур авунин арифдарвал
Пакамаз сагълам яз, къулай месел алаз ва жуван хизандихъ галаз къарагъайла, инсанди ам гьакI хьана кIанзавай кар хьиз кьабулзава. Амма чахъ и вири шейэр хьун чи гьунар туш. Чна гьар са легьзеда Халикьдин ﷻ регьимда эхъвезва.
Сагълам ва хъсандиз яшамиш жезвай инсанри чеб яшамиш жезвай уьмуьр виш агъзурралди чи чилел яшамиш жезвай маса инсанрин мурад тирди аннамишзавач. Ахьтин инсанрин, нин мурад сагълам яз къарагъун ятIа, низ вичиз куьмек гудай хизан хьана кIанзаватIа… Гьикьван аялрин мурад тухдалди тIуьн я? Гьикьван кIвал авачирбур куьчейра ава? Гьикьван буржлубур ава? Мад яргъалди гьисабайтIа жеда, эхирки, гзафбуру кваз такьазвай гьакъикъатдин гъавурда акьадайвал: чаз авай вири шейэр – чи Раббидин ﷻ регьим я ва чна Адаз шукур авун лазим я.
Инсан акI халкьнава хьи, ада вичелай хъсан яшамиш жезвайбурухъ галаз вич гекъигзава ва гзаф вахтара Аллагьдиз ﷻ шукур ийиз адан рикIелай алатзава. Амма вучиз чна чалай пис яшамиш жезвайбурухъ галаз чун гекъигиз башламишдач кьван, чна аннамишдайвал ва гъавурда акьадайвал, гьикьван чахъ Рабби ﷻ регьимлу ятIа ва гьикьван чун хъсан яшамиш жезватIа.
Мергьяматлудаз шукур ийиз гатIума – ва квез аквада гьикI Ада квез генани гзаф гудатIа.
Сифте нубатда шукур ая Ада чаз шукур ийидай ва Вичивай тIалабдай мумкинвал гунай. Шукур ая Ада чун пайгъамбаррикай эхиримжидан, Мугьаммадан ﷺ умматдикай авунай, сагъламвал, ризкьи, кIвал гунай. Шукур ая чун дявеяр авачир, ислягь уьлкведа яшамиш жезвайдай. Чаз агъзурралди себебар ава Ада чаз гайи ва хвейи затIарай акъваз тийиз Аллагьдиз ﷻ шукур ийидай.
Имам аль-Гъазалиди лугьудай: «Инсанар лап зайиф я ва Ада инсанрин несилдиз ганвай лап гъвечIи няметдай абурувай кутугай тегьерда Халикьдиз ﷻ шукур ийиз алакьзавач. Инсанрилай чеб алахъунрин ва алакьунрин вини дережайриз акъатайлани гьатта а кар алакьзавач. Шукур ийиз алакьун – им Раббидин ﷻ патай мад са нямет я, гьадайни шукур авун лазим тир. Гьавиляй ганвай гьар са няметдай шукур авун лазим я, ахпа гьа шукур ийидай мумкинвал гунайни».
Шукур авунин виридалайни хъсан жуьре – им чаз авай вири затIар Аллагьдин ﷻ регьим себеб яз авайдан гъавурда акьун я.
Къуй Раббиди ﷻ чун Адаз шукур ийидай лукIарин жергедай авурай. Амин.
Багистан Саадулаева
