Аллагьдин лукIраз гузвай няметар

Жуван зайифвал хиве яхъ, гьа чIавуз Аллагьди Вичин къуватдалди ва къудратдалди ваз куьмек гуда, жуван муьгьтежвал ва кесибвал аннамиша ва гьа вахтунда Халикьди Вичин девлетдалди ваз куьмек гуда.

РикIин сидкьидай вич гьамиша Аллагьдихъ муьгьтеж тирди гьиссзавай ва къалурзавай касдиз чIехи девлет жагъида – Аллагь Тааладилай гъейри са касдихъни ва са затIунихъни ам муьгьтеж жедач. Бес лукIраз Аллагь Тааладилай гъейри вич къутармиш жедай ва далдаламиш жедай чка авач эхир.

Низ Аллагьдин вилик лукIвилин (убудия) ерияр хас ятIа, адаз Халикьди Вичин агъавилелди (рубубия) куьмек гуда, эгер лукIра гьамиша Аллагь рикIел гъиз (зикир ийиз) хьайитIа. ГьикI хьи Аллагьдиз зикир авуни микьнатIисди хьиз Аллагьдин вилик халис лукIвал авунин ерияр вичел чIугвазва.

Инсандиз рикIин сидкьидай вичиз Аллагьдин лукI лагьана кIан хьанмазди, Раббиди гьар гьикI хьайитIани Вичин къуватдалди адаз куьмек гуда. Ихьтин лукIра Аллагь Таалади вичиз чIехи регьим авунвайдан гьакъиндай шагьидвал авун – им Халикьди адаз куьмек гунин анжах тIимил пай я.

ГьикI хьи ни гьамиша виче лукIвилин, кесибвилин ва Аллагьдихъ муьгьтежвилин ерияр ачухиз алахъзаватIа, адаз Халикьди лап мукьвара Вичин няметар багъишда. Гьавиляй низ фад Аллагь Тааладин няметар къазанмишиз кIанзаватIа, къуй вич Адахъ гьакъикъатда муьгьтеж тирди рикIин сидкьидай хиве кьурай.

Аллагь Таалади Къуръанда лагьанва (мана): «Гьакъикъатда, садакьаяр муьгьтежбуруз тайин авунва» («АтТавба» сура, 60-аят). Яни руьгьдин лап тамамвилихъ агакьнавай инсанриз Аллагьди гьикьван гзаф няметар гайитIа, гьакьван гзаф Халикьдин вилик абурун лукIвал къалурун артух жезва, ва гьикьван гзаф абурун иман артух хьайитIа, абур Раббидиз гьакьван мукьва жезва.

Ахьтин инсанрин чIехивал ва кесер артух хьунихъ галаз санал абурун муьтIуьгъвални артух жезва ва ам мусурманрин вилик дамахсузвиле ва имансузрин вилик халис чIехивиле ва артухвиле ачух жезва.

Руьгьдин лап тамамвилин чIехи дережадихъ агакьай инсанри гьар сеферда чпин нефсиниз кIан хьайи затI дадмишайла, абуру чпин иесийриз чухсагъул лугьузва. Бязи вахтара валийрини чпин нефсериз кIан хьайи затIар незва эхир.

Вучиз лагьайтIа ахьтин ксариз нефсер – чпиз къаюмвал авуна кIанзавай, хъсанвал ва регьим къалурна кIанзавай, бязи вахтара савкьватар гана кIанзавай гъвечIи аялриз ухшар я.

Гагь-гагь ахьтин инсанри, пайгъамбаррин весийрал амал ийиз ва дуьньядин лезетрал чпиз сергьят эцигиз, чпин нефсер абуруз кIанзавай затIарикай магьрум ийизва.