Пластикадин хирургия
Инсанриз садаз-сад чир хьунин карда винел патан акунри чIехи чка кьазва. Бязи инсанриз чпин акунар бегенмиш жезвач ва ам тамам ийидай рекьер жагъурзава. Алай девирдин технологияр, медицинадин дережа вилик фини исятда авай медицинада виридалайни истемишзавай хел ачухна – пластикадин хирургия.
Пластикадин хирургия – им бедендин жуьреба-жуьре паярин са гьихьтин ятIани нукьсанар квай инсанриз операцияр авуналди куьмек гунин жуьреяр акатзавай медицинадин хел я. Садбуруз нукьсанар – им гуьрчегвилин къанунрихъ галаз кьан тийизвай затI я, муькуьбуруз – бедендик квай синихар. Гьаниз килигна, пластикадин хирургия кьве патал пай жезва – реконструктивный ва эстетический.
Реконструктивный хирургияди еке мусибатрин, дявейрин акьунрин ва я хирургиядин акахьунрин нетижада хьайи синихар алудзава. Ахьтин операцияр галачиз гзаф дуьшуьшра инсандин бедендин ва психикадин сагъламвал хъсанарун мумкин туш. Абуру пластикадин хирургияда асул чка кьазва.
Гуьрчегвилин хирургия инсандин бедендин жуьреба-жуьре паярин винел патан акунар (жуьре, кьадар, сад-садав кьурвал) дегишарунал машгъул жезва. Адан метлеб – сагълам инсандин винел патал акунар хъсанарун я.
Ахьтин операцияр ийиз кIанзавайбурун кьадар мягькемдиз хкаж жезва, гьар йисуз тахминан 50%-дин. Виридалайни гзаф пластикадин операцияр 35-50 йисарин яшда авай инсанри ийизва, асул гьисабдай дишегьлийри. Пластикадин хирургиядин пешекаррин кьадардал гьалтайла, Россияди муьжуьд лагьай чка кьазва. Гуьрчегардай хирургиядин клиникайрин статистикадал бинелу яз, 40% муьштерийри са операция, 50-60%-ди кьведалай кьудал фидалди операцияр ийизва.
Вучиз инсан вичин винел патан акунрал рази туш?
Гзафбуруз гуьрчегвал кIвалахда чIехи дережайрихъ агакьунин алат жезва, са ни ятIани хъсан юлдаш желб авуник умуд кутазва, са вуж ятIани инанмиш я хьи, гьакI таниш тушир инсанар регьятдиз таниш жеда, гзаф дустар ва гьуьрмет жеда.
Инсан уьмуьрдин татугайвилерал гьалтайла, адан себеб гзаф вахтара адаз вичин винел патан акунар тамам туширвиляй хьиз жезва. ГьакI хьайила, месэлаяр гьялун патал жуван са вуч ятIани туькIуьр хъувуна кIанзава.
Пластикадин операцийрин нетижаяр
Хирургиядин гьи хуькуькьунин хьайитIани нетижаяр – им гьамиша бедендиз гуж гун я. Духтурри азарлубуруз операциядин финифдикай ва виликан гьалдиз хтунин вахтуникай виликамаз гьамиша лугьузвач, гьикI хьи ам регьят кар туш. Ахьтин хуькуькьунриз беденди гьикI жаваб гудатIа чир тахьунни мумкин я. Месела, тромбоэмболия, лап кьериз жедай, кьиникьал гъидай пис эсер авун я. Гьайиф хьи, хуькуькьайдалай кьулухъ нервийрин гьисс авун чIур хьун мумкин я. Операцияр ийидай вахтунда къене патан органриз зиян хьун ва я инфекцияр арадал атун мумкин я.
Вичин винел патан акунрал рази тушир касди операциядилай кьулухъни вичиз кIанзавай нетижа хьанач лугьуз истемишунар авун мумкин я, ва вири гьазур туш хъсан хъхьунин девир кьиле тухуз, вили хьайи чкайрихъ, дакIунрихъ галаз алакъалу тир четинвилер эхиз, недай-тинедай затIарал амал ийиз ва икI мад.
Жув авайвал кьабулун
Жуван беден авайвал кьабулиз чир хьун неинки куь рикIин гьалдин къулайвал патал, гьакI куь аялрин сагъ-саламатвал патални важиблу я, иллаки чпин винел патан акунар тамам туширвиляй рикIиз эсер ийизвайбур патал. Аялдиз вичин диде-буба чпин кьетIенвилериз рази яз килигиз акурла, ида аялдизни вичин винел патан акурал рази жез куьмек гузва.
Жуван акунрин тамам туширвилел гуж акакьарун патал меслятар:
- Дуьньяда тамам инсанар авачирдан гъавурда акьун. Гьахьтинди хьун патал чалишмиш хьун гзаф вахтара инсандихъ авай тек са мурад жезва ва ада чун уьмуьрдин шадвилерикай магьрумзава.
- Жуван нукьсанар масабурухъ галаз веревирд тавун ва гьакIни жуван патав гвай инсанрив жуван винел патан акунриз къимет гуз тун тавун.
- Жув тамамдиз кьабулун квез важиблу гьи хилера хьайитIани агалкьунрин нетижада арадал къвезва, ида жуваз къимет гун хкажзава, гьа жергедай яз акунрин патахъайни.
- Жуван гужлу терефрал ва абур вилик тухунал жуван акьул кIватI. Ихтилат са бедендикай физвач, гьакI куь хсуси ерийрикайни физва.
- Нукьсанар лайихлувилер хьиз кьабула, жуван тамам туширвал артуханвилиз элкъуьра.
Пластикадин хирургиядин гьакъиндай диндин къарар
Гуьрчегарунин ва я пластикадин операцияр авун виже къведач, эгер абурун метлеб бедендин набутвал дуьзар хъувун тушиз, инсандин тIебиатдин къамат дегишарун яз хьайитIа – гьакI рикIиз кIан хьана, мусурманар туширбурун адетрал ва хесетрал амал авуна.
Ахьтин процедураяр яз гьисабзава чинин, нерин, вилерин ва япарин кIалуб дегишарун, пIузарар, хъуькъвен кьилин кIарабар чIехи ва я гъвечIи авун ва икI мад.
Пластикадин операция ийидай ихтияр ава, эгер адан мурад яз хьайитIа:
а) хайила квай рехнеяр дуьзар хъувун патал, чеб аваз хьуни хейлин бедендин ва я руьгьдин жигьетдай зиян гуз хьайитIа, месела, сивин къавун фер (къуьрен пIузар), еке япар, нер гзаф патахъ хьун, чIулав матIар, артухан тIуб ва я свах, гьакIни сад-садав агатна кикIанвай тупIар;
б) куникди хьайи хирерин, бедбахтвилерин, начагъвилерин ва икI мад нетижада хьайи рехнеяр дуьзар хъувун, месела, хам алкIурун, хурун кIалуб михьиз ва я са кьадар туькIуьр хъувун (эгер ам михьиз ва я адан са пай атIанваз хьайитIа), я тахьайтIа хур гъвечIи авун (нагагь адан чIехивили тIарвал гудай гьал арадал гъиз хьайитIа), чIарар алкIурун (иллаки дишегьлийриз).
