Машгьурвал патал…
Сятини йифен сятдин 12 къалурзава, амма куьчеда лагьайтIа, гьарай-эвердин ван ава. Ана фанатри чпин гзаф рикI алай касдин нубатдин гъалибвал къейдзава. Зун спортдиз акси туш, заз михьи гьавадал зарядка ийиз хуш я, сагълам уьмуьр тухун заз бегенмиш я.
Амма гьиссери инсанрикай абурун иесивал тежедайбур ийизва, маса касдин азадвал гатIумзавай чкадал чи азадвал куьтягь жезва лугьудай дегиш тежер гьакъикъат рикIелай алудиз тазва.
Бес и диливал ийизвай жегьилар гьикI гъавурда твада зи аял ахварал тефизвайди, ва гьа са вахтунда, абур хъуьрез, шадвал ийизвайла, зи рушак кичI акатнавайди ва ам шехьзавайди?
РикI тахун патал, рикI ацукьун лазим туш…
Фанатизм – им чи девирдин бедбахтвал я. Чи дакIардихъай къвезвай гьарай-эвердин ванер – и азардин нетижайрикай виридалайни писди туш.
Алай девирдин аял кьилерин гзаф рикI алай ксар лап кичIе жедай тегьерда савадсуз, эдебсуз, ахлакьдин ерийрикай магьрум инсанар жезва. Абурун кьетIенвилин уьлчме – масабур чпиз интернетдай килигунин кьадар ва лайкар жезва.
Инсанри чеб кьабулун патал, машгьурвал патал абур гьакIан манасуз крар ийиз гьазур я. Тажуб авун, виридалайни эдебсуз жуьреда жуван кьетIенвал къалурун, къенин йикъалди яшамиш хьун ва мад са затIуникайни фикир тавун – ингье абурун гележегдин фикирар.
Абур ихьтин асул фикирдалди яшамиш жезва: чпикай ВУЧ лугьузватIа важиблу туш, важиблу я – чпикай са вуч ятIани ЛУГЬУЗВАЙДИ. Вирида чпиз фикир гун патал абуру гьар юкъуз чпелай алакьдай крар ийиз алахъзава.
Абурун дуьньядиз килигунин тегьердин асул мана – им гьи жуьреда хьайитIани машгьур хьун, ва абурун фикирдалди машгьурвал – гьам агалкьун я. Гьа икI дуьньядиз килигунин тегьердин нетижаяр – фикир тийиз харж ийизвай вахт ва пул я, барбатIнавай сагъламвал ва гзаф вахтара уьмуьрни…
Кьве йис идалай вилик СШАда машгьур блогер Джеймс Брэди Кордероди вичин аялриз ишлетма (къен ракъурдай дарман) квай морожни гана, ахпа абур видеодиз къачуна ва абуруз гьихьтин азиятар гузватIа вичин вад миллион пописчикдиз къалурна. Нетижада ида къалмакъал арадал гъана, а блогер аялриз инсафсузвал авуна лугьуз тахсирлу авуна ва и кардал къайда хуьдай органар машгъул хьана.
Лап гьа мукьвара Белоруссиядай тир блогер Андрей Бурим «машгьур» хьана. Машгьур хьунин ва пулунин гуьгъуьна гьатна ам ачух эфирда вичин шейэр цIай яна куз ва балкондилай хкадариз гьазур тир. Амма им подписчикриз акьван итижлу тушир. Блогердиз «машгьурвал» яш тамам тахьанвай рушарихъ галаз парталар хутIунин къугъунри гъана.
Ахьтин къугъунриз гьа са вахтунда са шумуд агъзур кас килигзавай ва ам тешкилай касдин электронный счётриз пулар ракъуруналди абуру ийизвай кар гьевесламишзавай. 2020-йисан октябрдиз агъзурралди подписчикриз акваз Бурима вичин патав ацукьнавай рушан чин яна, хер авуна. Исятда блогердихъ къайда хуьдай органар къекъвезва.
Генани гзаф машгьурвилин гуьгъуьна гьатуни неинки жегьилрин рикI алайбур дили ийизва, амма гзаф вахтара абурун терефдарар ва абурулай чешне къачузвай ксар патал бедбахтвилерин себебар жезва.
Британиядин Dailu Mail газетди перт ийидай кьиса ахъайна: Польшадай тир 25 йис хьанвай модель Александра Садовскади вичин вилерин лацариз чIулав ранг яна ва нетижада са вил михьиз буьркьуь хьана. Вичин вилер гьакI авунвай чкадин рэпердиз ухшар хьунин умуд аваз ам бедендин хамунал рапуналди нехишар ийизвай касдин патав фена. Вилериз ранг ягъайдалай кьулухъ къати тIалри адаз секинвал гузвачир ва абур секинарун патал ада дарманар хъвазвай. Эхирни ам духтурдин патав фена, амма геж хьанвай.
«Машгьур» ксари чпив «вердишарнавайбурун» патахъай жавабдарвал са жуьреда хьайитIани къанунра кхьенваз хьана кIанда.
Эгер жегьилрин рикI алайбурун манийра лугьузвайвал фанатри дакIаррай хкадариз хьайитIа, я тахьайтIа экстремистрин АУЕ гьерекатдик акахьиз хьайитIа, къанунди вичин кесер авай гаф лагьана кIанда, ва тешкилатчийри лагьайтIа – жаза чIугуна кIанда. Гзаф къуватар харжнавай ва гзаф ва гьамишан дуллух гъизвай кар машгьур артистдиз, спортсмендиз, блогердиз вич дегишарун патал акъвазарун са акьван регьят кар туш.
Чна чи аялрин, мукьва-кьилийрин патахъай жавабдарвиликай фикир авун лазим я. Чун – им неинки чна незвай затIар я, гьакIни яб гузвай ва килигзавай затIарни я. Ша чна чи ихтиярда авайбур абурун фикир чпин хийир патал чпел желбзавайбурухъ галаз кьилди тан тийин…
ГЬАМИД АСАДУЛЛИН
