Лугьунар авун Исламда къадагъа я
Лугьунар авун Исламда къадагъа я
- Умар бин аль-ХатIтIаба агакьарайвал, Пайгъамбарди ﷺ лагьана: «Кьенвайдаз вичин сура азабар гуда адахъ лугьунар ийизвайвиляй».
И гьадисдин маса жуьреда агакьарзавайвал, Пайгъамбарди ﷺ лагьана: «…адахъ лугьунар ийизвай кьван вири вахтунда (Имам ан-Нававиди къейд ийизва хьи, и гьадисдин манадин патахъай алимрин фикирар чара жезва, амма абурукай чIехи паюни гьисабзава хьи, Пайгъамбарди ﷺ лагьай гафар ахьтин инсандиз талукь я хьи, ни вичин мукьвабуруз вичихъ кIевиз лугьунар авун веси авунатIа, акI хьайила, адаз акI авуна кIанзавай)» (Аль-Бухари).
- Ибн Масуда агакьарайвал, Аллагьдин Расулди ﷺ лагьана: «Чакай туш чпин хъуькъвер гатазвайбур, чпел алай перемар къазунзавайбур (ина ихтилат физвайди кьил твазвай чка я, маса гафаралди, хев) ва я Аллагьдивай ﷻ тIалабзавайбур, жагьилиядин девирда ийизвайди хьиз! (Ихтилат гьараюнар авуникай физва, мукьва са кас кьейи инсанри чпелни кьиникь ва жуьреба-жуьре бедбахтвилер атун тIалабиз гатIумзава)» (Аль-Бухари, Муслим).
- Аль-Мугъира бин Шу`бади лагьана: «Заз ван хьана Аллагьдин Расулди ﷺ икI лугьуз: «Гьакъикъатда, нихъ кIевиз лугьунар ийизватIа, Дувандин юкъуз и кардай адаз азабар гуда» (Аль-Бухари, Муслим).
- Абдуллагь бин Умара лагьана: «Са`д бин Убада (Бану Хазраж тайифадин регьбер) азарлу хьайила, Пайгъамбар ﷺ Абд ар-Рагьман бин Авфахъ, Са`д бин Абу Вакъкъасахъ ва Абдуллагь бин Масудахъ галаз санал адал кьил чIугваз фена. Азарлудан патав фейила ва ам вич-вичелай фенваз акурла, Пайгъамбарди ﷺ жузуна: «Ам кьенвани?» Абуру жаваб гана: «Ваъ, я Аллагьдин Расул ﷺ». А чIавуз Аллагьдин Расул ﷺ шехьна. Пайгъамбар ﷺ шехьиз акурла, амайбурни шехьна. Ахпа ада лагьана: «Квез ван къвезвачни кьван? Гьакъикъатда, Аллагьди ﷻ я вилерай авахьзавай накъварай, я рикIи хажалат чIугунай азабар гудач, амма Ада азабар гуда идай, - ва ада вичин мез къалурна, - ва я идай регьим ийида! (Им лагьай чIал я хьи, эгер мукьвабур кьейила инсанри кIевиз лугьунар ийиз хьайитIа, абуруз жаза гуда, амма эгер Шариатди къадагъа тавунвай шейэр лугьуз хьайитIа ва лугьунар тавуртIа, Аллагь Таалади абуруз сувабар гуда)» (Аль-Бухари, Муслим).
- Абу Малик аль Аш`ариди агакьарайвал, Аллагьдин Расулди ﷺ лагьана: «Нагагь кьейидал кIевиз лугьунар авур дишегьлиди вич рекьидалди туба тавуртIа, Дувандин юкъуз адал жими къиредин парталар алаз ва кьуру хамарин кьеркьина аваз чан хкида» (Муслим).
- Абу Мусади агакьарайвал, Аллагьдин Расулди ﷺ лагьана: «Я дагъ хьтинди! Я инсанрин агъа!» ва ихьтин маса гафар лугьуз кIевиз лугьунар ийизвай гьар са кьенвайдахъ кьве малаик акъвазарда. Абуру адан хуруда гъутар эцяда ва лугьуда: «Вун дугъриданни гьахьтинди тирни?» (Ат-Тирмизи).
«Риязу-с-салигьин» ктабдай.
