Сив хуьнин сувар мубаракрай!

Сив хуьнин сувар мубаракрай!

Дагъустандин Республикадин Муфтий, алимрин Советдин председатель шейх Агьмад эфендиди уьлкведин агьалийриз Сив хуьнин сувар мубаракна

«Ассаламу алайкум ва рагьматуллагьи ва баракатугь!

Гьуьрметлу стхаяр ва вахар! За квез виридаз рикlин сидкьидай Сив хуьнин сувар мубаракзава!

Рамазан вацран йикъариз ва йифериз мусурманри, Аллагьдин ﷻ эмирдиз табий хьана, сивер хуьзвай, жемятдин кпlар ийизвай, Халикьдивай ﷻ зулумдик ва бедбахтвилерик квай мусурман стхаярни вахар къутармишун тlалабзавай, чпин девлет кесибриз ва мугьтежбуруз куьмек гун патал харж ийизвай, мугьманар кьабулзавай ва чебни мугьманвилиз физвай, чпихъ авай чирвилер масабурал агакьарзавай, жемят сад ва ислягь ийиз алахъзавай.

Рамазан – Аллагьди ﷻ Вичин лукlариз регьим ийизвай, мусурманри чпин къилихар хъсанарзавай варз я. И вацра абур генани сад-садан къайгъуда жезва ва сада-садаз регьим ийизва. Раббиди чалай гъил къачуда ва Ада чаз хъсан кlвалахар ийиз куьмек гуда лагьана умуд кваз чна Рамазан рекье твазва. Гьакъикъатда Аллагьдик ﷻ умуд кутазвайбур патал Ам виридалайни хъсан куьмекчи я, Ам абуруз бес я.

Къуй Аллагьди ﷻ вири мусурманри авур ибадатар, хвейи сивер кьабулрай, чаз Вичин зурба жуматвиликай ва разивиликай пай гурай! Амин.