Къурбандин сувар мубаракрай!
Къурбандин сувар мубаракрай!
РД-дин Муфтий шейх Агьмад-афандиди Къурбандин сувар мубарак авуна
«Ассаламу алайкум ва рагьматуллагьи ва баракатугь, квез ислягьвал ва Аллагьдин ﷻ регьим хьурай, играми стхаяр ва вахар!
Заз рикIин сидкьидай квез виридаз вири иман гъанвайбурун кьилин сувар – Къурбандин сувар – Ид аль-Адгьа мубарак ийиз кIанзава.
Къурбандин сувари вири иман гъанвайбуру пак чкайриз зиярат авун – чIехи гьаж авун лишанламишзава. И сувари чаз виридаз чи Халикьдиз ﷻ ибадат авунин карда чалишмишвал къалурдай, чаз ганвай и кьил а кьил авачир няметрай Адаз лап дериндай шукур ийидай мумкинвал гузва. И суварин йикъара чаз виридаз гьакъисагъвал авун, муьгьтежвал авайбуруз, бедбахтбуруз, абурун рикIера шадвал туналди, куьмек гуналди, къурбанд авунвай гьайванрин як паюналди абуруз фикир гун, важиблу я.
Аллагь Таалади Къуръанда чаз лугьузва (баяндин мана): «Квез гьич са чIавузни диндарвал (ва Халикьдин разивал) жагъидач, та куьне Адан рекье куь рикI алай мал-девлетдикай харж ийидалди. Куьне гьикьван харж авуртIани, Аллагьдиз адакай чизва (ва тамамвилелди квез эвез хъийида)» («Алю Имран» сура, 92-аят). Гьавиляй чаз виридаз чи патав гвай, чи куьмекдихъ ва дикъетдихъ муьгьтежбурун къайгъу чIугун гьакьван важиблу я.
Чи и кьил а кьил авачир Ватандай агъзурралди стхаярни вахар Исламдин важиблу дестекрикай сад – гьаж авун патал Меккадинни Мединадин пак чилерал физва. Ихьтин регьим авунай, шукур авуниз лайихлу чкайриз фидай мумкинвал гунай, имандин лап важиблу дестекрикай сад – гьаж ва умра тамамардай мумкинвал гунай за Аллагь Тааладиз кьадар авачир кьван шукур ийизва.
Къуй Къудратлу Аллагьди чи вири къурбандар, гьажийри тамамарнавай гьаждин вири шартIар, гьакIни абурун вири дуьаяр кьабулрай! Амин.
И йикъара вири дуьньяда, вири мусурманрин кьилин суварин – Ид аль-Адгьадин – лап гегьенш мергьяматлувилин акцияр физва: дуланажагъдин жигьетдай муьгьтежвал авай инсанар – хендедаяр ва етимар, набутар, кесибар ва муьгьтежбур патал.
Къуй Мергьяматлу Раббиди виридал гьар са хъсан кардай, садакьадай, хъсан тIалабунрай эвез агакьаррай ва инсанар генани хийирлу хьун патал гьевеслу авурай, абурукай диндилай ва миллетдилай аслу тушиз виридахъ галаз масадан дердиникай хабар кьадай ва къайгъуда акьадайбур авурай.
За алемрин Раббидивай ﷻ чилел и мукьвара ислягьвал алукьдайвал, хъсан дуланажагъ жедайвал ва чи вири халкьар бедбахтвилерикайни татугайвилерикай хуьдайвал тIалабзава. За Аллагьдивай ﷻ дуьаяр, къурбандар ва садакьаяр кьабулун, гунагьрилай гъил къачун, виридаз жумартвилелди бахт, хъсан дуланажагъ, кьилел ислягь цав гун тIалабзава.
Мад сеферда, зи играмибур, квез экуь Къурбандин сувар мубаракзава! Ид аль-Агьа – Мубарак!»
