Алукьзавай Рамазандин варз мубаракрай!
Дагъустандин Республикадин Муфтий, алимрин Советдин председатель шейх Агьмад эфендиди уьлкведин агьалийриз алукьзавай пак тир Рамазандин варз мубаракна.
«Ассаламу алайкум ва рагьматуллагьи ва баракатугьу!
Гьуьрметлу стхаяр ва вахар, за квез алукьзавай пак тир Рамазандин варз – гьакъисагъвилелди ибадат ийидай, фикирар ийидай ва регьимдин вахт, рикIин сидкьидай мубаракзава! Чаз виридаз, Халикьдин регьимдалди, четин вахтар акуна.
Са йис вилик, тахминан гьа и вахтунда, коронавирусдин тугъвал башламишна. Ада вишералди чи дустарин, багърийрин ва мукьвабурун чанар тухвана. Амма, Пак Ктабда лугьузвайвал, гьар са четинвилелай кьулухъ регьятвал алукьда, ва Аллагьдин кьадардалди, гьалар къвез-къвез хъсан жезва. Гзаф регионра мусурманриз мад мискIинар ва капI ийидай кIвалер ачух хъувунва.
Ибурай виридай Аллагь Тааладиз шукур хьуй. Играми стхаяр ва вахар, зун умудлу я, вахтуналди тир вири четинвилеризни килиг тавуна, Рамазанди, гьамиша хьиз, чи кIвалер ва рикIер шадвиляй ацIурда, чи Ватандиз булвал ва агьвал багъишда, чи рикIер хъуьтуьларуналди ва абур имандайни Аллагьдик умуд кутунай ацIуруналди, язух чIугунин гьисс гужлу ийида.
Рамазан – им тубадин ва тербиядин, Аллагьдихъай кичIе хьунин ва разивилин, сабурлувилин ва умунвилин, мергьяматлувилин ва игьсанар гунин, сад хьунин ва садвилин варз я! Сив хуьни лагьайтIа, Халикьдин регьимдалди, чун руьгьдин лап тамамвилиз мукьва ийида. За Халикьдивай чIехи сив хуьнин гьар са йикъа чаз виридаз Адан мергьямат ва разивал гъидайвал тIалабзава.
ГьакIни за Къудратлу ва Регьимлу Аллагьдивай чи сивер, хъсан крар, таравигьдин кпIар кьабулун ва чаз виридаз кьве дуьньядани хъсан дуланажагъ ва секинвал ракъурун тIалабзава! Садакьа гуни инсандин девлет тIимиларзавач, аксина, ада ам артухарзава.
ГьакI хьайила, ша чна инсанриз шадвал багъиш авуналди, Аллагь Таалдин разивал къазанмишин, гьикI хьи Рамазан – хъсан крара акъажунрин варз я. Къуй Халикьди и бахтавар йикъар Адаз кьетIен ибадат ийиз акъуддайвал чаз куьмек гурай ва чи хъсан крар ва дуьаяр лагьайтIа, къуй руьгьни беден михьи хьунин себеб хьурай. Амин.
