Лайлату-ль-Къадр – агъзур вацралай хъсан йиф
Пак Къуръанда Къудратдин йифен (ЛайлатульКъадр) зурбавиликай хабар гузвай «альКъадр» лугьудай сура ава (мана): «За Къуръан ЛайлатульКъадрдин йифиз ракъурнава». А йифен зурбавал къалурун патал Аллагьди ﷻ Пайгъамбардихъ ﷺ элкъвена икI лугьузва: «ЛайлатульКъадрдин фазилатлувал ваз чизвач». Ахпа Аллагь Таалади адан фазилатлувилиз Вичи баян гузва: «А йифиз авур ибадат чпик ЛайлатульКъадр квачир агъзур йифиз авур тlеатдилай хъсан я. А йифиз цаварилай чилерал чпин кьиле Жабраил малаик аваз, хийир ва берекат гваз малаикар эвичIзава. Ибур вири Аллагьдин ﷻ ихтиярдалди жезвай крар я. Ам экуьнин ярар ядалди инсанар патал саламат я» («ТафсирульБайзави»), «ЛайлатульКъадр» сура.
ЛайлатульКъадрдин йифен ибадат
А йиф агъзур вацралай багьа я, лугьузва Аллагь Таалади. Агъзур варз – им кьудкъанни пуд йисни кьуд варз жезва. Яни и йифиз ийизвай ибадат гьа и йиф авачир маса варцара ийизвай крарилай багьа я».
Лайлату-ль-Къадрдин йифиз Къуръан кIелун, зикирар ва кпIар авун, Пайгъамбардиз ﷺ салаватар гъун лазим я. Йифен ва экуьнин кпIар мискIинда жемятдихъ галаз авуртIа хъсан я. Гьа йифиз Пайгъамбарди ﷺ агъадихъ галай дуьа кIелун меслят къалурна: «Аллагьумма иннака афуввун тугьиббу-ль-афва фа’фу’анни» Таржума: «Я зи Аллагь! Вун гъил къачудайди я. Ваз гъил къачуз кIанда, залай гъил къачу».
Имам ар-Разиди лагьана: «Лайлату-ль-Къадрдин йифиз экуьнин ярар ягъиз башламишдайла Жабраил малаикди вири малаикриз цаварал хъша лугьуда». Абуру хабар кьада: «Я Жабраил! Аллагь-Таалади и йифиз ибадат авур Мугьаммад Пайгъамбардин ﷺ умматдай тир мусурманриз вуч авуна?». Ада лугьуда: «Аллагьди ﷻ абурал Вичин регьим ракъурна ва кьуд жуьре ксарилай гъейри амайбурун виридан гунагьрилай гъил къачуна». Малаикри лугьуда: «Абур гьибур я?». Ада жаваб хгуда: «Гьамиша ички хъвазвайбур, диде-бубадиз азият гузвайбур, мукьва-кьиливилин алакъаяр атIузвайбур, хъелна пуд йикъалай гзаф вахтунда вичин диндин стхадихъ (вахахъ) галаз рахан тийизвайбур».
Лайлатуль Къадр гьалтзавай йиф
Лайлату-ль-Къадр гьалтзавай йифен гьакъиндай алимрин гаф сад туш. Виридан гаф а кардал сад хьанва хьи, ам Рамазандин вацра авай йиф я. ЧIехи пай алимри ам эхиримжи цIудакай са йиф я лугьузва. Абурукай гзафбуру ам эхиримжи цIудакай тек: 21, 23, 25, 27, 29 – лагьай йиферал гьалтзава лугьузва. Пайгъамбардин ﷺ гьадисда лагьанва: «Куьн Лайлату-ль-Къадрдин йифехъ галаз гуьруьшмиш жез Рамазандин вацран эхиримжи цIудакай тек йифера чалишмиш хьухь». Гзаф пай асгьабри ва алимри ам 27-йиф жезва лагьана гаф сад авуна. Имам Агьмада ва Муслима чав агакьарна: «Ибн Гьабиша Ибн Ка’бавай Лайлату-ль-Къадрдин йиф мус жезва лагьана хабар кьуна. Ада ам 27-йиф я лагьана, гьатта кьин кьуна. Ибн Гьабиша ам ваз гьинай чида лагьана хабар кьуна. Ада лагьана: «Заз Пайгъамбарди ﷺ лагьай аламатдалди чир жезва: а йифен экуьнахъ ракъинин нурар гьамиша хьиз экуьбур яз жедач». ГьакIни алимри лугьузва хьи, Лайлату-ль-Къадрдин йиф я мекьи, я чими тушир, экуьди жеда
Лайлату-ль-Къадрдин йиф инсанриз талагьна, ам чуьнуьхунин гьикмет, Аллагьдин ﷻ лукIари ам чпел гьалтдатIа лугьуз Рамазандин вацран гьар са йиф ибадатда акъудун я.
Къуй Аллагьди ﷻ гьар са мусурмандиз Лайлату-ль-Къадрдин ийифехъ галаз гуьруьшмиш жедай мумкинвал гурай! Амин.
