Итим куь терг ийизва?

И суалдиз гузвай жавабди итим инсан хьиз усал хьуниз куьмекзавай гзаф себебар ачухзава.

Итимдин психикадин ва бедендин сагъ-саламатвилиз авай гзаф кьадар хаталувилерин арада ичкидин, пIапIрусрин, бейгьушардай агъу квай затIарин, некягь алачиз жезвай акахьай алакъайрин, компьютердин къугъунрин, руфуниз къуллугъ авунин, кагьулвилин, кьадардилай артухвилерал рикI хьунин, метлебсуз хатавилин ва ихьтин маса гзаф зарарлу гьевесрин тIварар кьазва.

Уьмуьрдихъ буш алакъа хьуни ва рекьяй акъуддай крариз дурум гуз алакь тавуни гьикьван акьуллу ва бажарагъ авай итимар телефна! Абурал алава яз руьгьдин нукьсанрин кIватIал ва пехилвиликай, такабурвиликай, кьуру дамахдикай, кьадардилай артух ажугъдикай, чIехивилерал рикI хьуникай, вич-вичиз бегенмиш хьуникай, вичин тариф авуникай, тек са вичин къайгъуда хьуникай, къайгъу авачирвиликай, гьакимвилел рикI хьуникай, масадан бахтсузвилел шад хьуникай, мискьивиликай, нубатсуз харж авуникай, умудсузвилелди рикIин ажузвал авуникай, пашманвиликай, тапаррикай ва гзаф маса ругьдин зайифвилерикай ибарат тир гьевесрин къастар.

Акьул, къаст, рикIин сидкьидай Аллагьдик умуд кутун сад авуналди итимдивай вири и зайифвилерал гъалибвал къачуз жеда. Амма им лап четин ва инсафсуз дяве я ва и дяведа итимдиз и дуьньяда ганвай кьван вахтунин эхирдалди женг женгинин гуьгъуьнал жеда. И икьрар авачир дяведа чна итимриз гъалибвилер тIалабзава.

МУГЬАММАД АЛИМЧУЛОВ