Гзаф пай мусурманар дуьз рекьел ала
Гзаф пай мусурманар дуьз рекьел ала
Суал: Бязибуру тестикьарзава хьи, гуя Къуръанда лагьанва: «Эгер вун и чилел алайбурун гзаф паюниз табий хьайитIа, абуру вун рекьелай алудда». Мад: «Ваз гьикьван кIан хьайитIани, абурун гзаф паюни иман гъидач». И гафар гъуналди, ягъалмишбуру чеб амай мусурманрилай тIимил ава лугьуз дуьз рекьел алайбурай ва гзаф пай мусурманар ягъалмиш хьанвайбурай гьисабзава. Им гьакI яни?
Жаваб: Ваъ. Къуръанда лагьанвай гафарин мана ам я хьи, мусурманрихъ галаз гекъигайтIа, кафирар гзаф ава, эгер абуруз (кафирриз) табий хьайитIа, мусурманар ягъалмиш жеда. Яни и кьве аят кафиррин гьакъиндай ракъурнава.
ГьакI язни я, кафиррин кьадар мусурманрин кьадардилай гзаф тушни бес? Гзаф пай мусурманар дуьз рекьел ала ва гьа и гзаф паюнихъай къакъатдай ихтияр авач. И кар чаз садни са шумуд сеферда Пайгъамбарди ﷺ веси яз туна.
Тирмизиди, Гьакима, ТIабараниди, Лаликаиди, Ибну Аби аль-Асима Ибн Умаралай агакьарнавай гьадисда лагьанва: «Аллагьдин Расулди ﷺ лагьана:
لَا تَجْتَمِعُ أُمَّتِي عَلَى الضَّلَالَةِ (الترمذي الحاكم و الطبرني)
«Зи уммат ягъалмишвилел кIватI жедач».
Мад Пайгъамбарди ﷺ лагьана:
وَ اتَّبَعُوا سَوَادَ الْأَعْظَمَ فَإِنَّهُ مَنْ شَذَّ شُذَّ فِي النَّارِ (رواه الحاكم)
«Куьн гзаф пай мусурманар физвай рекьяй алад. Абурухъай къакъатай инсан Жегьеннемдиз фида (Гьакима агакьарна). Маса гьадисда лагьанва:
يَدُ اللهِ مَعَ الْجَمَاعَةِ
«Аллагьдин ﷻ куьмек жемятдихъ гала». Гзаф пай мусурманар дуьз рекьел алайдан ва абуруз табий хьун лазим тирдан и гьадисрай чун гъавурда акьуна.
Суал гун мумкин я: «Бес Пайгъамбарди ﷺ лагьана: «Зи уммат 73 чкадал пай жеда ва са паюнилай гъейри амайбур вири Жегьеннемдиз фида». Им гьикI гъавурда акьун лазим я? Къутармиш жедай пай – «Агьлу-с-Сунна ва-ль-Жамаа (Пайгъамбардин ﷺ, адан асгьабрин ва имамрин гуьгъуьна авай мусурманар) я ва мад адаз лугьузва «ас-саваду-ль-а’зам», гьа им мусурманрин виридалайни еке пай я. Абур чавай Пайгъамбардин ﷺ девирдилай авахьзавай вацIухъ галаз гекъигиз жеда, ам Къияматдин йикъалди кьурадач.
Ягъалмиш хьанвай кIватIалар гьа и вацIукай эрчIи ва чапла патахъ физвай хилериз-къаналриз тешпигь я. Абур тайин тир вахтунда жезва ахпа кьуразва. Маса мисал: и кIватIалар тарцин тандилай физвай хилериз тешпигь я, абур гьикьван гзаф хьайитIани, тандилай еке жедач.
Гьеле асгьабрин девирда «хавариж» лугьудай ягъалмиш кIватIал акъатна. Абурун кьадар, асгьабрин кьадардиз килигайла, еке чIулав бугъадал алай са гъвечIи лекедиз тешпигь тир. Мусурманрин анжах тIимил пай Женнетдиз фида лугьузвай и авамрин фикирдал чун рази хьайитIа, акI жезва хьи, мусурман умматдикай а вахтунин анжах хаварижар Женнетдиз фида. И ягъалмиш хьанвай хилекай Пайгъамбарди ﷺ лагьанвай:
الخَوَارِجُ كِلَابُ النَّارِ (رواه أحمد و الحاكم و البيهقي)
«Хаварижар Жегьеннемдин кицIер я» (и гьадис Агьмада, Байгьакъиди ва Гьакима агакьарна).
Пайгъамбардин ﷺ девирдилай башламишна, алай вахтуналди виридалайни гзаф пай мусурманар – Пайгъамбардиз ﷺ, адан асгьабриз ва гьакъикъи имамрин ва алимрин фикирриз табий жезвайбур я. Эгер ихьтин мусурманрин кьадар чна ягъалмиш хьанвай 72 кIватIалдиз табий хьайибурун кьадардихъ галаз гекъигайтIа, чаз «Агьлу-с-Сунна»-мусурманрин кьадар гьи вахтунда хьайитIани са шумуд сеферда гзаф тирди аквада.
Гзаф паюнилай гъейри амай вири кIватIалар ягъалмиш хьанвайбур тирди Пайгъамбардин ﷺ гьадисди тестикьарзава. Аллагьдин Расулди ﷺ лагьана:
إِنَّ بَنِي إِسْرَائِيلَ افْتَرَقَتْ إِلَى اِحْدَى وَ سَبْعِينَ فِرْقَةٍ (اَوْ قَالَ اثْنَيْنِ وَ سَبْعِينَ) وَ إِنَّ أُمَّتِي سَتَفْتَرِقُ إِلَى ثَلَاثٍ وَ سَبْعِينَ فِرْقَةٍ، كًلًّهَا فِي النَّارِ إِلَّا السَّوَادَ الْأَعْظَمَ
«Бану Исраил (чувудар) 71 патал пай хьана. Зи уммат 73 патал пай жеда. «Ас-савадуль-а’замдилай» (гзаф пай мусурманар) гъейри амайбур вири Жегьеннемдиз фида» (и гьадис ТIабараниди, Ибну Асима, Лаликаиди ва Ибн Гьажара агакьарна. Гьайтамиди лагьана хьи, ам агакьарнавайбурун цIиргъ иерди я).
Идан шагьид мад Пайгъамбардин ﷺ гафар я:
لا تجتمع أمتي على الضلالة
«Зи уммат ягъалмишвилел кIватI жедач».
«Дуьз рекьин суракьда» ктабдай
