Сурун кьилихъ галай къван гьихьтинди хьун лазим я?
Суал: Бязи инсанри сурун кьилихъ галай къван са чпIинин кьадардилай виниз ийидай ихтияр авач лугьуз, сурарин кьилихъ галай къванер кукIвариз башламишнава. Абур гьахъ яни?
Жаваб: Пайгъамбардин ﷺ некIедин стха Усман бин Маз’ун кечмиш хьайила, ада ﷺ вичин са асгьабдиз Усманан сурун кьилихъ акIурдай къван гъваш лагьана. Асгьабдивай къван хкажиз хьанач. И арада Пайгъамбарди ﷺ вичин перемдин хилер къакъажна, а къван хкажна сурун кьилихъ эцигна ва лагьана:
أَتَعَلَّمُ بِهَا قَبْرَ أَخِي وَ أَدْفَنُ إِلَيْهَا مَنْ مَاتَ مِنْ أَهْلِي
«Идалди заз зи стхадин сур гьина аватIа чир жеда ва идан патав за зи мукьва-кьилияр кучудда». И гьадис Абу Давуда агакьарнава. Харижат бин Зайдалай Бухариди гьадис агакьарнава: «Усман асгьаб халиф тир вахтунда чун жегьил гадаяр тир. Усман бин Маз’унан суралай тек са чакай виридалайни виниз хкадарзавай касдивай хкадариз жедай». И гьадисрал бинеламиш хьана лагьайтIа жеда хьи, жуван мукьва-кьилияр гьина кучуднаватIа чир жедайвал чпIинилай кьакьан къван сурун кьилихъ акIурдай ихтияр ава («Рудудун аля шубугьати-с-салафия»). Гьелбетда, гуьрчегарнавай, мармардин гзаф еке къванер акIурдай ихтияр авач. Вучиз лагьайтIа ам исраф (вара-зара авун) я. Ихьтин багьа къванер тек са шейхерин, валийрин, еке алимрин сурарин кьилихъ акIурдай ихтияр ава. Амай инсанри абурухъ гузвай пул Аллагьдин ﷻ рекье харж авурай, гьа сура кучуднавайдан паталай садакьа гурай.
