ГьикI секин жеда?
ГьикI секин жеда?
Зи гъуьл военный я ва адан патахъай зи рикI архайин туш. Ам къуллугъдин са тапшуругъ бегьемариз фенва ва ингье кьве гьафте хьанва са хабарни авачиз. Ида зи рикIиз гзаф эсер ийизва ва зун михьиз гьалдай фенва. Гъавурда акьазва, заз лугьуда хьи, ада вичи а пеше хкяна, ам адан буржи я. Зун рази я, амма чаз гъвечIи аялар ава ва завай гьич фикирдизни гъиз жезвач хьи, абур буба авачиз амукьда лагьана. Зи кьилиз пис фикирар къвезва. За зун ва аялар гьикI секинардатIа, заз меслят къалура.
Алимдин жаваб:
Шаксуз, ахьтин фикиррин себеб шейтIанди футфа гун я. Адакай азад хьун патал ва гележегда жув ахьтин фикиррикай хуьн патал, ихьтин меслятрал амал ая:
1. Аллагьдиз ﷻ ихьтин дуьа ая: «За Аллагьдин ﷻ тамам гафаралди Адан ажугъдикай ва Адан жазадикай, ва Адан лукIарин писвиликай, ва шейтIанри футфа гуникай, ва абур зи патав атуникай хуьн патал куьмек тIалабзава».
2. Гьамиша дастамаз гваз хьухь, анжах дастамаз гваз гьазурай хуьрек неъ ва, гьелбетда, вич гьалал тирди.
3. Аллагьдивай ﷻ жув хуьн тIалаб. Месела, Адавай «Аузу биллагьи мина ш-шайтIани р-ражим!» (За Аллагьдивай ﷻ тIалабзава лянет гайи шейтIандикай зун хуьн, ада зи диндиз, зи дуьньядин уьмуьрдиз зарар тагудайвал, заз эмирнавай крар тамамариз заз манийвал тийидайвал ва заз къадагъа авунвай крар ийидай гьевес зак кутан тийидайвал) гафаралди жув хуьн тIалабайтIа жеда.
Гьакъикъатда, инсан шейтIандикай хуьдай къуват, ам вич яратмишай Аллагьдилай ﷻ гъейри садазни авач. Гьавиляй Аллагьдивай ﷻ чун хуьн тIалабун чаз буйругъни авунва.
Психологдин меслят:
За умуд ийизва хьи, газет акъатай вахтунда куь гьал дегиш хьанва, квел адалай хабар атанва ва адан кIвалахар вири хъсан я. ГьикI хьайитIани, рикIел хуьн лазим я хьи, инсандал хъсан ва я пис дуьшуьш гьина хьайитIани ва мус хьайитIани атун мумкин я.
Куь къалабулух аялриз къалур тавун квез гзаф важиблу я. Абуруз диде кичIе хьанваз ва вичивай-вич квахьай тегьерда аваз акун лазим туш. Ида абурук кичI кутада ва абурун кьилиз пис фикирар къведа. Эгер абуру буба гьина ава ва адаз вуч хьанва лугьуз хабар кьаз хьайитIа, куьне, ам кIвалахдал ала ва ам хъсанзава лагьана, чIалахъардай жаваб гана кIанда. ГьакI куьне аялар артухан къалабулухрикай ва къурхувилерикай хуьда ва кIвалени секин гьал жеда.
Куьн лагьайтIа, дяведин ягъунрикай ва куь гъуьлуьн къуллугъдихъ галаз алакъалу яз гузвай хабарриз тIимил килигна кIанда. Ам квез са тIимил четин жеда, гьикI хьи хабарриз килигайла квез акI жезва хьи, гуя куьне а гьалдал гуьзчивал ийизва. Амма ам тапан гьисс я ва адан муькуь пад ахьтинди я хьи, куь рикI гьамиша цацарал жезва.
Гьар сеферда хабарриз килигайла, куьне вири хъсанзава лугьудай инанмишвилин ва михьиз умуд атIунин арада чабалмишда. Ахьтин гьиссери куьн депрессиядин гьалдал гъида.
Эгер квевай куь гьиссерал гуьзчивал ийиз жезвачтIа, куьн неврологдин патав фена кIанда, ада квез секинардай дарман кхьидайвал. Исятда куь гьиссер къайдадик кутун гзаф важиблу я, анжах гьа чIавуз квевай арадал атанвай гьал дуьз кьабулиз жеда.
