Пехъи кицI вердишарун
Пехъи кицI вердишарун
Адаз кицI авай. Адаз ам кIанзавай. Амма кицIик акьалтIай зарарлу ва кьадай хесет квай.
Идакай гзаф куьмек жедай гьаятдиз чара кас атай ва я хуьре жанавурар къекъведай дуьшуьшда, амма мукьвабуруз ва дустариз халис дерт жезвай.
Патавай физвай гьар садал кицIи вегьезвай.
ЧIехиди ва я гъвечIиди, дишегьли ва я итим, къуншидин лам ва я жуван пуд рангунин кац – кицIиз вири сад тир. КицI зунжурдай ахъа жез алахъиз ва вичин иеси тушир гьар садан туьтуьнал сарар кутуна алкIиз алахъиз, туьтер ифидалди элуькьдай.
Ам дуьз вердишарун кьетIна. А кардал адан иеси машгъул хьана.
«КицI кьадайди жезвайди анжах кицIин уьмуьр хьайила я», - фикирна ада ва кицIин яшайиш хъсанарунилай гатIумун кьетIна.
Са тIимил вахтунилай кицI, гьам патал туькIуьр хъувунвай, гегьенш цуриз акъудна. Адаз ина чил чими авуна, хъуьцуьганар вегьена ва гьатта чими ядни тухвана.
Амма и буш алахъунрин дуьнья адаз итиж тушир ва хъуьцуьганрал ярх хьанвай гьайвандин хесет гьич дегиш хьанач.
Иесиди, белки кар недай затIуна аватIа лагьана, фикирна. Ада санай кIелнай хьи, як тIуьни вагьшивилин гьиссер акатунал гъизвайди ва ада кицIиз як квачир хуьрекар гьазуриз хьана.
КицI яхун хьана, амма хесет хкатнач. Ам викIегь ва дявекар тир, на лугьуди ам вири дуьньядихъ галаз санал дяве ийиз гьазур жезва. Ада гьаятдай дикъетсуз хьайи лиферихъ, салай катзавай вечрехъ калтугдай, варарин патавай физвай яшлу инсандал элуькьдай.
Иеси михьиз гьелек хьана.
Ада кицI немсерин къайдада вердишарзавай, гафуниз яб гуз чирзавай, духтуррин патав тухузвай, секинардай массаж ийиз тазвай.
Ада вичин чIехи пай вахт кицIихъ галаз акъудзавай. Са тIимил вахтунилай абуру са къапунай нез ва са хъуьцуьгандал ксуз хьана. Иеси инанмиш тир хьи, вич патав хьуни кьуд кIвач квай дуст дегишарда ва адак са кьадар инсандин хесетар акатда.
КицI вердишарунин челек-фелекда иесиди гзаф шейэриз фикир хгун тийиз хьана. Чуьхуьн тавур гъилер, кьацIай шалвар, чуьхуьн тавур перем… Вердишаруни гьакI истемишзава.
ГьакI са кьадар вахт алатна.
Кьве варз алатайла хуьруьн къерехдай акъатай кьил акъат тийир ванци инсанрин фикир желбна. «Мад и кицIи калерал вегьезва», - фикирна яшлу итимди ва ам дакIардай килигна.
Ана адан къунши элуькьзавай. Патав кицI гвай, ада кIевиз вичин иесидихъ галаз зил кьазвай.
P.S. Кьисада кьве насигьат ава. Сад лагьайди – сифте нубатда жув вердишарна кIанда. Кьвед лагьайди – са касдал рикI хьуни ва дуствал авуни гьикI хьайитIани чи рикIиз эсер ийида.
