Аял гваз кьилди туна
Аял хайидалай кьулухъ гъуьл лап дегиш хьана, араяр къана, чин ачухзамач. И йикъара чара жедайвал арза кхьена, зун аял гваз кьилди туна, фена. Гила за вуч ийида, вучиз итимар ихьтин тек са чпин къайгъуда жедайбур я?
Алимдин жаваб:
Гьайиф хьи, ихьтин дуьшуьшар уьмуьрда жезва. Амма куь кардай кьил акъудун лазим я, квез кьведазни бегьемдиз яб гана ва ахьтин рафтарвилин себеб вуч ятIа, чирна кIанда.
За квез нетижаяр хкудиз тади тавун, жезмай кьван жуван нервияр ва гьиссер хуьн меслят къалурзава, вучиз лагьайтIа куьн исятда кьилди авач, квелай таза аялдин уьмуьр ва сагъ-саламатвал аслу я.
Мукьвабуруз и кардикай хабар це, куьмек тIалаб, гьакI патав кьванни жедайвал. Эгер гьал гьял тахьайтIа ва куь гъуьлуь вич тухунин себебар квевай чириз тахьайтIа, чкадин имамдивай, алимдивай тIалаб квез яб гудайвал, гъуьлуьхъ галаз рахадайвал, насигьат ийидайвал. ГьикI хьайитIани, за квез меслят къалурзава Аллагьдик ﷻ умуд кутун, викIегь хьун, Раббидивай ﷻ куь хизан хуьдайвал тIалабун, вучиз лагьайтIа аялдиз кьведни – дидени, бубни – герек я.
Куь гъуьлуьз лагьайтIа – за умуд кутазва ада и макъала кIелда лагьана – лугьуз кIанзава: куь вилик квайди куь аялдин диде я. Ахьтин кар гьикI ийидайди я? Гьеле вучиз акI авунватIа, лугьунни тавуна. Куьне куь паб адан диде-бубадивай гъуьлуьз къачурди я, ам хуьда, адахъ гелкъведа лагьана, гаф гайиди я. Квез гьикI жедай, эгер куь рикI алай вахаз, рушаз гьакI авунайтIа?! Куь пабни са нин ятIани руш, вах я хьи. Хизандин патав хъша, Аллагьдихъай ﷻАдан жазадихъай кичIе хьухь. И гьал гьялиз алахъ, а кар патал рекьер жагъура, арифдар инсанрин меслятрихъ яб акала.
Психологдин фикир:
Сифте нубатда, тек дуьшуьш умуми дережадиз акъудун герек туш, яни са итимди авур кардалди виридаз къимет гун.
Лап гьайиф хьи, вири итимар чпин хизандин патахъай жавабдарвал чпел къачуз ва хсуси итижар хизандин итижриз табий ийиз гьазур туш.
Ада авунвай кар, хсуси квез авунвайди я лагьана, кьабулун герек туш. Лап мумкин я, ада а кар авунва, куьн дишегьли хьиз бегенмиш амачирвиляй ваъ, гьакI адан къилих гьахьтинди я.
Квез чизва, гагь-гагь бязи итимрин везифа анжах адалди куьтягь жезва хьи, дишегьлиди адалай аял хадайвал. Бахтунай, ахьтинбур гзаф авач, амма абур авазва. Ахьтин инсан квел гьалтна лагьана, куь тахсир авач. Амма квез дуьз некягьда хьанвай аял ава.
Эгер гъуьлуь ахьтин жавабдарсуз кар авунватIа, квезни регъуь хьана кIандач адан патахъай кьетIивилелди эгечIдайвал ва жуван аял таъмин авун истемишдайвал.
Мумкин я, и гьалдиз къене патан ва къеце патан гзаф себебар хьун, амма и жавабда абур жагъурдай мумкинвал авач.
Жуван аялдиз фикир це. Куьн диде я ва им виридалайни важиблу я. Ахпа са мус ятIани вун гадардай инсандихъ галаз яшамиш жедалди, сифте кьиляй адахъ галаз чара хьайитIа хъсан я.
