Авлияйрихъ керематар авайди яни?
Суал: Са бязибуру авлияйрин керематар кваз кьазвач, абурун амалар инкар ийизва, аламатдин крар динсуз кешишривайни къалуриз жезва лугьузва. Абур гьахъ яни?
Жаваб: Ваъ, гьахъ туш. Керематар инкарзавайбур виликдайни хьана. Абуруз «му’тазилитар» лугьузва. Авлияйрин керематар кваз кьан тийизвайбур чи девирдани гьалтзава. Абурукай сада лугьунни авуна: «Инанмиш туширбурухъ авлияйрилай цIуд сеферда гзаф аламатар ава». Аквадай гьаларай, а кесибдиз авлияйрин аламатар инкар авуналди вичи Къуръан инкар ийизвайди гьич хабарни авач. Бес Къуръанда пуд виш йисалай ахварай аватай Кагьфдин асгьабрикай лугьузвачни? Къуръанда тушни мегер кхьенвайди Иса пайгъамбардин диде Марьямакай, адаз Аллагьди ﷻ хъуьтIуьз санани авачир гатун яр-емиш гьикI ганатIа. Къуръан тушни бес чаз хабар гузвайди гьикI Сулейман пайгъамбардин везирди Йемендай Шамдиз са легьзеда Билкъис пачагь дишегьлидин шумудни са тонн къвезвай тахт тухванатIа. Малум тирвал, Кагьфдин асгьабар, Марьям ва Сулейман пайгъамбардин везир пайгъамбарар тушир. Абур вири авлияйрин жергедай тир. Аллагь Таалади Вичин рикI алай ксар (авлия) гьикI виниз хкажзаватIа инсанриз къалурун патал, Ада и керематрикай Къуръанда лагьанва.
Умар асгьабдиз вич Мединада аваз Нехавендда (Иранда авай са чка) женг чIугвазвай кьушундин гьал акуна ва мискIиндин минбардилай кьушундин кьиле акъвазнавайдаз гьарайна: «Дагъдин кIан яхъ, я Сарият!» Иранда авай Сариятаз Умаран ван хьана ва ада лагьайвал авуна, душмандал гъалибвал къазанмишна.
Халиф Алидихъни гзаф аламатар хьана. Халид асгьабди чиз-чиз агъу квай яд хъвана ва адаз са шейни хьанач.
Гьелбетда, му’жизатринни керематрин арада авай тафаватни чир хьун лазим я. Му’жизатар – ибур пайгъамбаррин гьахълувал субутзавай тIебиатдин къанунралди кьил акъудиз тежер аламатар я. Керематар – ибур Пайгъамбардин ﷺ рехъ гвайбуруз – авлияйриз ганвай адетдин тушир алакьунар я. Ибур вири Аллагьдин ﷻ ихтиярдалди жезва.
Керематрин сагьибар хьун патал ибадатда гзаф алахъунар ийизвайбурузни авлияйри туьгьмет ийизва. Абуру лугьузвайвал, ибадатдин макьсад сад хьун лазим я – Аллагьдин ﷻ разивал къачун. Керемат паквилин шартI туш. Са бязи вахтара керематар авачир авлияяр, абур авайбурулай Аллагьдин ﷻ вилик лайихлубур жезва. Мадни, керематар устаздин гьакъикъивал къалурзавай шартIни туш.
