Кьин кьадай къайда
Кьин кьадай къайда
Аллагьдин ﷻ тIвар кьун тавуна, жуваз багьа са касдал – Пайгъамбардал ﷺ, дидедал ва икI мад кьин кьуртIа жедани?
Бязи инсанри, диндин чирвилерин патахъай чпин авамвиляй, ахьтин кардин нагьакьанвиликай фикир тавуна, бязи вахтара лагьайтIа, вичин темягькарвилин мурадар патал, Пайгъамбардин ﷺ тIварцIел, дидедал, фал ва икI мад кьин кьазва.
Бязи алимрин фикирдалди, Исламда ахьтин кьин кьун гьакъикъи туширди ва гьатта гунагь авайди жеда, вучиз лагьайтIа кьин кьаз анжах Аллагьдин ﷻ тIварцIел ва я Адан лишанрал (сифетрал) жеда.
Чешне яз Аллагьдин ﷻ тIварцIел кьазвай кьинерин жуьреяр гъайитIа жеда: «Аллагьдал ﷻ кьин кьазва», «Алемрин Раббидал ﷻ кьин кьазва» ва я «Зи чан Нин ихтиярда аватIа, Адал кьин кьазва» ва икI мад.
Пайгъамбардин ﷺ гьадисда лугьузва: «Ни Аллагьдин ﷻ тIварцIелай гъейри маса затIунал кьин кьуртIа, адакай имансуз жезва», маса риваятда: «…мушрик жеда» (Аль-Гьаким).
Амма къейд авун лазим я хьи, и гьадисда ихтилат физвайди, ни са касдал ва я са затIунал ам алемрин Халикьдин дережадиз хкажунин ният аваз кьин кьазватIа, гьадакай я, яни Адаз и карда шерик гъиз.
Мадни гзаф делилар авай фикирдал асаслу яз, Аллагьдин ﷻ тIварцIелай ва я Адан лишанрилай гъейри маса затIунал кьин кьун нагьакьан кар яз гьисабзава, къадагъа алайди яз ваъ.
(«Тугьфат аль-Мугьтаж»)
