Шукур хьурай Аллагьдиз ﷻ

Хуш я заз

Хуш я заз гьуьл, яб гуз кIанда,
Ван ацалтна, рахадайла.
МичIи йифиз секин вирни,
Анай гъетер аквадайла.

Хуш я заз чуьл, чими шагьвар
Акьадайла, къвез зи пеле,
ГатайтIани марфади зун,
Лигим хьанвач лугьуз гьеле.

Хуш я заз зун инсан хьунал,
Дегишриз хьай(и) вахтунивай.
ТухарначтIани девлетри,
Тух хьана зун бахтунивай.

Хуш жедачир заз, дуьньядал
Са хаин хьиз атанайтIа.
Зи кьулухъай инсанри заз
«Вун иблис я» лагьанайтIа.

Хуш я заз захъ иман хьунал,
Са юкъуз тан рекъида мад.
Са тварцелай бегьер гъана,
Твар хьиз, чилик хъфида мад.

Хуш тушир заз чIехи чилин
Къатара зун раг хьанайтIа,
Хур галчIурдай чилик вичин
Гъуьлягъдин шараг хьанайтIа.

Ажеб хьана инсан хьана
Чилин винел, цавун кIаник.
Са пай пис, сад хъсан хьана
Камарин, за къачур вилик.

Зи хайи хуьр

Зи хайи хуьр, зи кIани хуьр!
Хкажда за винериз.
Ви няметри къуват гана
Уьтквем хьанвай гъилериз!

Лондон, Париж, Бон, Гаага,
И дуьньядин кьуд пипIе,
Къекъвенай зун, хайи уба,
Анжах вун аваз рикIе.

Жагъанач вав гекъигдай затI
Заз зи хуьруьн акунар.
Хуьр я «женнет», маса «женнет»!
Амайбур — буш рахунар.

Вири дуьнья кIвачик ква зи,
Рекьер аваз къекъведай.
Анжах са рехъ лап хуш я заз
Хайи хуьруьз хкведай.

КIвачи-кIвачи къекъвейтIани,
Зун а рекье галатдач.
Гьа кIвализ кьван хкведа зун,
Хуьрни рикIяй акъатдач.

Кьуд пата авай фан атир
Лезги руша чразвай.
Япарани чIал таниш тир,
Зи диде хьиз рахазвай.

Куьтягь хьайи яргъи рекьи
Заз са жигъир къалурна.
Зал вил алаз акъвазнавай
Хайи кIвализ рахкурна.

Тадиз кьуна, темен гана
Заз зи кIвалин нефесди.
Лагьана: «Куьз яргъал хьана,
Кьунвайни вун кьефесди»?

Париж, Лондон, Шанхай, Гаага…
Хайи кIвалин цлар я,
«Ватан ширин я чаз пара»
Бубайрин гьахъ гафар я.

Къуват, дад квай Ватандин фу
Чранвай цIа цIамарин,
ТIуьрла тадиз хьанай артух
Йигинвал зи камарин.

Хъфида зун хайи хуьруьз!

Хъфида зун хайи хуьруьз,
Бубадин кIвал амачтIани.
Салам кьадай кас жагъуриз,
Зал вил алайд авачтIани.

Хъфида зун хайи хуьруьз,
Заз булахдин яд хъваз чирай.
Сифте камар мукъаятдиз
Къачудайвал чил кьаз чирай.

Хъфида зун хайи хуьруьз,
Гьикьван мажал авачтIани.
Ахкъатзава зун лап кьериз,
Маса мурад авачтIани.

Хъфида зун, амач сабур,
Гьикьван хьурай вахъ вил галаз?
Икьван заз вун ширин авур
Зи Ватандал са кьил чIугваз!

Зи Кавказ

Чуьнуьхдач за гьиссер жуван
РикIева вун, хайи Ватан.
Зи Каспий гьуьл, кьакьан Кавказ
КIанда куьн гьа диде хьиз заз.

Къацу чуьллер мехмер хьтин,
Дагъдин рекьер туш заз четин.
Михьи гьава, кьуд пад ачух,
Нефес къачуз жезвач гьич тух.

На сергьятар тухвана ви
ГалкIурнава цавухъ вили.
Ви булахри михьи, серин
Лугьуз тазва мани рикIин.

Галатзавач чи Шалбуздагъ
Къужахда кьаз чим гузвай рагъ.
Рехи тахьуй лугьуз чуру,
Ифириз таз адав хуру.

Марфади гатай ви синер,
Бириш хьанва, ама гелер.
Гараризни гайи ваз рум
Валай алакьна гуз дурум.

Жагъизвач заз жаваб…

Секинсузвал кутазва зак йифери,
Зи экуьн гъед чуьнуьхнава цифери.
За хуруда кIвал авунва гьижрандиз,
Регъуь я заз, гьикI жаваб гун Ватандиз?

Яргъаз фейи заз са кьадар акуна,
Уьмуьрдикайни за базар авуна.
Катиз-катиз фенатIани хъсандиз,
Регъуь я заз, вуч жаваб гун Ватандиз?

Мад суалри гатазва зи рехи кьил,
Девлет хъсан яни ва я зи хайи чил?
Жува-жуваз эцигай цал, кьакьандиз,
Сергьят хьанва, вуч жаваб гун Ватандиз?

За алцумай терездин хел кьатI хьана,¬
Зи хайи чил къимет авай затI хьана¬.
Регьятвилер къачуна за зи чандиз,
Жагъизвач заз жаваб, гудай Ватандиз!

Кутадани тахсир къенин аямрик,
Ватан туна, гъилер кутур гьарамрик?
Гьазур я зун, кичIе туш физ зиндандиз,
Чир хьайитIа жаваб, гудай Ватандиз!

Хтулдихъ галаз суьгьбет

Хтул:

Вучиз сефил я, диде, ви гуьгьуьл?
Вуч хьанва мад вахъ, тIазвани ви кьил?
Ви кьилин дарман чизвайди я заз,
Вини кьацIалай гъида ам за ваз.

Баде:

Ваъ, ваъ, чан зи руш, туш им са хата.
Ша зи къужахдиз зи хтул бала.
Алайвиляй циф, белки, къенин къал
Са тIимил сефил хьанва жед зи гьал.

Хтул:

АкI ятIа акъваз, вилив хуьх на зун,
Исятда гъида за ваз чIемни фу.
Неда зани на гьа чаз чидайвал.
Алатда ахпа тадиз кьилин тIал.

Баде:

Ша фин суфрадихъ, чи хизан галай.
Гьикьван хуш я заз, хъваз вахъ галаз
чай.
Иштагь зайиф я ви дидедин къе,
Мад къалабулух гьатнава рикIе.

Хтул:

Агь, гъавурдава, делил я, заз чиз,
КIанзава мад ваз куь кIвализ хъфиз.
И дуьньядавай кIвалерилай вири,
На лагьай тир, ам кIвал я ваз кIани.

Дагъларавай кIвал, ви хайи шегьер,¬
Шикилрай на заз къалурай иер.
Зазни хуш хьанай, къвалахъ галай гьуьл.
Гьаниз хъфейла, тIа жедач ви кьил.

Ам види я кьван, а шегьер рехи.
Заз чида кIвални вун чIехи хьайи.
Чида диде заз, вуна дуьз лагь ман,
Гьа кIвале, кьацIал, алани дарман?

Мисриханова (Къазиметова) Гуьлжагьан Шамсудиновна 1958-йисуз СтIал Сулейманан райондин КIахцугърин хуьре лежбердин хизанда дидедиз хьана. Кьасумхуьруьн юкьван школа акьалтIарай ада Дербент шегьерда -Республикадин бухгалтервилин школадин филиалда кеспи къачуна ва са шумуд йисуз шегьердин краеведенидин музейда счетовод-кассирвиле кIва¬лахна. 1979-йисуз эвленмиш хьайи ада вичин уьмуьр Туркменистандин Красноводск (гилан Туркменбаши) шегьерда давамарна. 1984-йисуз Гуьлжагьана ана педагогвилин училище акьалтIарна, I985-1991- йисара школада кIвалахна. 2004-йисалай, уьмуьрдин юлдашдин контракт-договор себеб яз, Голландиядиз акъатна.

Дидени буба

Заз туькIуьрай кьеб
Кьведни сагърай чеб,
Уьмуьрдин метлеб —
Дидени буба!

Фу, хуьрек гайи,
Хурун нек гайи,
Заз мелек хьайи
Дидени буба!

КIвачив чил кьаз тур,
Темен гуз, зун кьур,
Хадач куь хатур,
Дидени буба!

Куь лайлайдин ван
Хьанай заз «азан».
Авур заз рикI — чан
Дидени буба!

Элкъуьриз гъилер,
Жерягьдин тегьер,
Сагъ хъувур хирер,
Дидени буба! 

Алакъада чун
Авай кар я хьун.
Куь са цIир я зун,
Дидени буба!

Бурж ала куь зал,
Чирай хайи чIaл.
Вахкуз жеда жал?
Дидени буба!

Куьн хьтинбур жез,
Физва уьмуьр, къвез.
Ухшар я зун квез,
Дидени буба!

ГУЬЛЖАГЬАН МИСРИХАНОВА