Бубайрин весияр
Бубайрин весияр
КIеве авай касдиз куьмек
Це вуна ви, ятIа эркек.
Эгер намус аватIа вахъ,
Гишин касдиз лугьумир ваъ.
Къекъверагдиз фу це жуван,
Аллагьдив гва ви гьахъ-дуван.
Алачирдаз це пек-партал,
Ви гьал алаз хьурай адал.
Мугьмандиз це на рикIни чан -
Баркалладин хьурай чаз ван.
Мекьи касдиз ачуха рак,
ЦицIиб хьиз, ам кутур лувак.
Бала хьиз, хуьх вуна етим,
Руьгь авай вун ятIа итим.
Девлетдихъ вун жемир къаних -
Инсандин я ам пис къилих.
Гьахъ гафунив ийиз эвез,
Лагълагъчидин «атIутI на мез».
Угъривална, кьацIурмир тIвар,
Ам уьмуьрдин жеда ваз пар.
Намус, гъейрат кьуна вине,
Жемятдин кар къачу хиве.
Дишегьлидал ала зегьмет,
Адаз вуна ая гьуьрмет.
Жув хайи на ви пак диде
Са чIавузни твамир кIеве.
Ваз жув хвейи кIан хьухь буба,
Авач са кас ам кьван зурба.
Пашман югъни шад югъ акваз
Вердиша жув, жемятдик кваз.
ТуькIвей гьалда аваз хиял,
Агуд жував кьуьзек, аял.
Камаллудан кьабула гаф
Ам садазни жедач гзаф.
Чарадан затI жемир ваз кIан,
Мукъаятдиз хуьх мал жуван,
Эвердиз вач, яхъ касдин гъил,
Тамир жувал эцигна вил.
ВикIегьди хьухь хуьдай Ватан,
Тур хьухь адан ядай душман.
(Халкьдин яратмишунрай)
