Стхадизни вахаз гьикI гьуьрмет ийида?

Стхадизни вахаз гьикI гьуьрмет ийида?

Дагъустанвидин хизандин пак адет – им стхавилин ва вахвилин мажбурнамаяр кьилиз акъудун я. И адетдин бинедаллаз стхади вахан тереф хуьзва, адал гуьзчивал тухузва, ам маса ксарин туькьуьл гаф-чIалакай, чIуру гьерекатрикай хуьзва, адан къайгъударвал ийизва.

Руша ихтияр бубадивай къачузва, ваха – стхадивай. Буба авачтIа, стхадин кIвал рушаз вичин кIвал я. Дагъустандин халкьарин адет гьа ихьтинди я. Диде кIвале ава, авач талгьана, вах кIвалин иеси я. Ваха хуьрек гьазурзава, хизандиз тIуьн гузва, партал чуьхуьзва, гъвечIи стхайрал ва вахарал алукIзава. Ваха калер ацазва, кIвалин михьивилер ийизва, хизандин майишатдин къайгъударвал ийиз куьмек гузва. «Стха стхадин далу я», «Стхайрин дуствал къванцин цлалай кIеви жеда», «Вах авачиз амукьдалди, са буьркьуь руш вахвиле кьуртIа, хъсан я», – тербия гузва Дагъустандин халкьарин камаллувили. «ЧIехи стхадив гьуьрметдивди эгечI. ГъвечIи стхадиз дугъриди ва хийир гудайди жез куьмек ая, адав туьмердивди эгечI, ам чIуру крарикай хуьх», – истемишзава мусурманриз талукь адетрин къайдайри.