ФатIимани цегв
Ажаиб я, ам гьикI хкечI хъувуна. Ам гьикI хьана адавай? ФатIимади цекврел къум вегьезвай, анжах ам гьар гъилера къумадикай хкечI хъийизвай. Ада гьа и кар са шумуд сеферда тикрар хъувуна, амма цегв гьикI хьайитIани винел акъатзавай.
«Ам гьикьван кьегьалди ва къуватлуди ятIа килиг садра», - фикирна ФатIимади. Гила ада мад а кесиб цегв гьикI ахтармишдатIа лугьуз фикирзавай. Садлагьана, япун мукьув хьиз жж-жждин ван хьана. ФатIимадин патавай хьиз са чIиж физвай. Руша вичин гъилералди адахъ калтугиз кIан хьана, инихъ-анихъ авуна. И арада са пис къайдада адан гъилин тупIуз тIар хьана. «Ай!!!» - гьарай акъатна ФатIимадай. Адаз са пис тIар хьана. Адан патав Рамазан акъвазнавай. Вахаз килигиз, вуч хьанатIа гъавурда акьун тавур Рамазан тажуб хьана акъвазнавай, ахпа ам шехьиз башламишна. И арада диде акъатна. ФатIимадин дакIунвай тIуб акурла, вуч хьанватIа ам гьасятда гъавурда акьуна, гьерекатна чIижре тур мизмиз акъудна тупIал мурк эцигна. ТIарвал секин жез башламишна.
- Гила вуна заз ахъая, чIижре кIасдайвал вуна ахьтин вуч авуна? – ФатIимадивай дидеди хабар кьуна.
- Са шейни, - лагьана руша. – Зун цекврехъ галаз къумадал къугъвазвай ва садлагьана чIиж атана заз мизмиз гана, хъфена.
- Ам вуч лагьай чIал я кьван «зун цекврехъ галаз къугъвазвай», бес инсанар цекверихъ галаз къугъвадайди яни? Вун цекврехъ галаз гьикI къугъвазвай? – тажуб хьана диде.
- За цекврел къум вегьезвай ва ам адакай хкечIзавай, - баян гана ФатIимади.
- Акъваз кван, а цеквре ахьтин къугъун ваз теклифнайни? – хабар кьуна дидеди.
- ГьикI ада теклифрай, адавай са вуч ятIани теклифиз хьун патал, ам рахазвач кьван, - лагьана, хъуьрена ФатIима.
- Цекверивай рахаз жезвач лугьун дуьз туш, вун гъалатI жезва. Чаз абурун ван къвезвач ва гъавурдани акьазвач, - лагьана дидеди. – Эгер цеквре ваз ахьтин къугъун теклиф тавунвайла, вуна вучиз фикирна адаз къумадикай хкечIиз хуш жедайди?
ФатIимади ихьтин суал гуьзетнавачир. Ам вуч лугьудатIа тийижиз амукьна.
- Вуна фикир ая, месела, са низ ятIани ви винел къум вегьез кIан хьана, - давамарна дидеди, - ваз а кар бегенмиш жедайни?
- Ваъ, - кьил инихъ-анихъ авуна ФатIимади.
- Бес вуна вучиз цекврез ам хуш жеда лагьана фикирна? – хабар кьуна дидеди.
ФатIимади вичин кIаник квай пIузар сараривди кьуна, кьил агъузна. Адаз лугьудай гаф амачир. Адан рикIел вичи азият гайи цегв хтана. «Фена адавай багъишламишун тIалабна кIанда», - фикирна ФатIимади.
- Гьавиляй яни Аллагь Таалади чIижрев зи тIуб кIасиз туналди заз азаб ганвайди? – суал гана ФатIимади.
- Мумкин я гьакIни хьун, - жаваб гана дидеди. – Анжах ваз чир хьухь, чIижер Аллагь Таалади мизмиз гудайвал туш халкьнавайди, абуруз чпин кIвалах ава. Абуру вирт кIватIзава.
- А цеквревай багъишламишун тIалабдай ихтияр заз авани? – хабар кьуна ФатIимади.
- Гьелбетда! Жувахъ галаз Рамазанни твах, абуру гьикI кIвалахзаватIа гьадазни акурай. Мад са тIимил шекер къачуна ам цеквериз твах, - теклифна дидеди.
Къумадал цегв аламачир. «Хъфена», - ял акъадарна ФатIимади. Анжах къумадин патав гвай чIурал адаз цекверин цIиргъ акуна. Абур винелди агъадалди катзавай. Цеквери ял ягъун вуч ятIани чин тийиз кIвалахзавай. ФатIима кьил агъузна, абуруз килигна.
- Я цеквер! Куьне атIа, за азият гайи цекврез лагь хьи, за адавай багъишламишун тIалабзава. Идалай кьулухъ мад за ахьтин кIвалахар хъийидач, - лагьана ФатIимади. Рамазана лагьайтIа, вичин вахан гафар тикрар хъийизвай: «Цекве, цекве. Мад хъидач, мад хъидач». Адавай гьеле рахаз жезвачир, анжах ам цеквериз азият гудай ихтияр авачирдан гъавурда акьунвай.
