Пул авай кисе
Жуьмядин нянихъ Айша, тарсар авурдалай кьулухъ, диде-бубадихъ галаз чай хъун патал маса кIвализ фена. Дидедини бубади суфрадихъ ацукьна суьгьбетарзавай.
Бубади вич кIвалахдилай элячIнавайдакай дидедиз хабар гайиди Айшадиз ван хьана. Айша гьасятда бубадин патав фена, хабар кьуна: «Гила заз дафтарар ва мектебда герек къвезвай гьар жуьре затIар маса къачудай пул жедачни? ИкI чун квелди яшамиш жеда?!» Бубадик хъвер акатна ва руш секинар авурдалай кьулухъ, вичи цIийи кIвалах жагъурда лагьана. Мадни секинарун патал ихьтин кьиса ахъайна.
Меккада Абдуллагь тIвар алай, диндар дишегьлидал эвленмиш хьанвай кесиб са итим авай. Са сеферда папа гъуьлуьз кIвале недай гьич са затIни авачирди ва парталарни алукI техжедай гьалда авайди лагьана. Гьелбетда, вичин къуьнерал алай жавабдарвал чизвай итим кIвалах жагъуриз базардиз фена. И къекъуьнра ада гзаф вахт акъудна ва дуьз къвезвай са кIвалахни жагъанач. Югъ няни жедайла ам мискIиндиз фена, кьве ракат капI авуна ва Аллагьдивай ﷻ куьмек тIалабна. Аллагьдивай ﷻ тIалабна вичин рикI секинарна мискIиндай экъечIдайла, адаз чилел пул авай кисе акуна. Абдуллагьа ам хкажна, ачухна ва киседа авай агъзур диргьам акуна.
Папак шадарун кьетIай, ам гьасятда кIвализ хъфена. Амма папа а пул кьабулнач, ада лагьана хьи, ам чарадан пул я ва иесидив вахкун чарасуз я. «И пул чаз гьарам я!» - лагьана папа.
Абдуллагьа пул вахкун патал мискIиндиз тади авуна. Гьа чкадал хтай адаз, «Агъзур диргьам авай кисе низ жагъана?» - лугьуз гьарайзавай итим акуна.
Абдуллагьаз гзаф хвеши хьана ва зверна: «Заз жагъана, ма вахчу жуван кисе!» Иеси адаз килигна ва лагьана: «Кисе жуваз тур, ам зи патай ваз пай хьурай. Идалайни гъейри за ваз мад кIуьд агъзур диргьам гузва». Аламат хьайи Абдуллагьа, им вуч жумартвал я лагьана, хабар кьуна. Киседин иесиди лагьана хьи, Шамдай са инсанди цIуд агъзур диргьам вугана ва абурукай са агъзур мискIиндин патав тур, ахпа низ жагъана лугьуз, хабарар кьун тIалабна. Эгер жагъайда хиве кьуна кисе вав вахкайтIа, кIуьд агъзурни адав вахце, вучиз лагьайтIа ам ихтибар ийиз жедай инсан я.
Кьисадихъ яб акалай Айша фикирдик акатна, буба папазни рушаз килигна ва давамарна: «Дуьз рекьел алай вичин лукIариз четин вядеда Аллагьди ﷻ куьмекзавайди я, гьавиляй вунани фикир ийимир. Чна, ин ша Аллагь, чун дуьз тухуда ва Аллагьди ﷻ чаз куьмекни ийида!»
