Эрзиман тир машин
Эрзиман тир машин
ГъвечIи Мусадиз гзаф вахт тир вичин дуст Расулаз авай хьтин машин кIанз. Ада вичин диде-бубадивай мукьвал-мукьвал вичизни гьахьтин машин къачун тIалабдай, амма абуру гьеле чпихъ ам къачудай пул авач лугьузвай ва Мусадиз Аллагь Тааладивай тIалабун меслят къалурзавай.
Мусади лагьайтIа, диде-бубадиз яб гана ва Аллагьдивай ﷻ бубадиз вичиз машин къачудай такьатар гун тIалабзавай. Гьа икI, ада гьар юкъуз: экуьнахъ ва нянихъ тIалабзавай, вахт физвай амма жаваб агакьзавачир.
Гьа икI, са юкъуз Муса куьчедал къугъунар авурдалай кьулухъ кIвализ хъфиз гьазур хьанвай, садлагьана адаз Расулан рикIелай алатна къумадал амукьнавай машин акуна. Муса инихъ-анихъ килигна – куьчеда касни авачир. Ада игрушка гъиле кьуна, ам Расулан кьилив хутахиз кIан хьана, анжах садлагьана адаз ам вичин кIвализ хутахиз кIан хьана. «Зун садазни акунач хьи, са кар хьайитIа, къуй ам са масада вахчуна лагьана фикиррай», - фикирна Мусади ва машин хъуьчIуьк кутуна, вичивай жедай къайдада тадиз кIвализ зверна.
КIвале ада вичи пис кIвалах авуна лагьана фикир ийиз башламишна, анжах хъуьчIуькай машин хкуднамазди вири адан рикIелай алатна. Йифиз, месел къатканвай вахтунда, ада вичи авур кар веревирд ийиз эгечIна. Ада фикирзавай хьи, Аллагь Таалади адан тIалабунриз жаваб гана ва кьасухдай игрушка Расулан рикIелай алудна, вичиз ам жагъана вахчудайвал авуна.
Пакад юкъуз Муса вичин цIийи машиндихъ галаз акI къугъвана хьи, гьатта ам авай кIвализ диде гьахьайлани адаз хабар хьанач. Дидедиз машин акуна ва ажайиб тегьерда хабар кьуна:
- Зи хва, ваз а машин гьинай атана?
Мусадин чин яру хьана, вилер агъузна ва жаваб гана:
- Заз ам пишкеш авуна.
- Ни? – генани мягьтел хьайи дидеди хабар кьуна.
- Аллагьди ﷻ …, - лагьана Мусади ва вучиз ятIани ам генани яру хьана.
Аялди са вуч ятIани вичикай чуьнуьхзавайдан диде гъавурда акьуна ва истемишзавай тегьерда вири хьайи-хьайивал ахъай лагьана. Муса дидедиз гьакъикъат ахъайиз мажбур хьана, адан суьгьбет куьтягьайла, дидедин вилерал накъвар атана…
- Я Аллагь! Зи хва! Вун гъавурда акьазвани вуна ЧУЬНУЬХНАВАЙДИ!!! Яраб чна къачагъ чIехи авунва жал? – лагьана дидеди ва шехьиз башламишна.
Муса ийир-тийир хьанвай ва дидедив агатна лагьана:
- Вуна вуч лугьузва диде! За ам гьакI къачуна! Расулавай ам квахьна ва заз ам жагъана! За Аллагь Тааладивай пара вахтунда тIалабна, гьавиляй Ада и машин зи гъиле гьатдайвал авуна… Им пишкеш тир! Зун къачагъ туш!!!
Ам пишкеш туш, я зи хва! Адалди Аллагьди ﷻ вун ахтармишна! Вун, мусурмандиз кутугай тегьерда, намуслу хьана, ам иесидив вахкана кIанзавай тир! Гьи вахтунда хьайитIани мусурманди гьа икI авун лазим я! Гьатта а шей вичиз къачуз гзаф кIан хьайитIани! Гьатта а шейинихъ масадалай гзаф вун муьгьтеж я лагьана, вуна фикир ийиз хьайитIани! Вун гъавурда акьазвани? Вуна вуч авуна? Чан хва! Чуьнуьхун еке гунагь тирди ваз чизвачни?
Эхирни, Муса гъавурда акьуна, гьихьтин чIуру кIвалах ада авунатIа ва ван алаз шехьна. И арада буба кIвалахдилай хтана, кIвализ гьахьна ва шехьзавай хва ва диде акурла, ам гзаф тажуб хьана. Дидеди кар-кьил хьайивал ахъаяйла, бубадиз хъел атана ва лагьана:
- Агь зи хва…! Вуна ихьтин кар ийида лагьана за гуьзетнавачир… Вун себеб яз зи чин яру хьана! Инсанри чи хизандикай вуч лугьудатIа вуна гьадакай фикирзавани!
Мусадивай бубадиз жаваб гуз жезвачир, адаз пара регъуь хьанвай... Ада гила вичихъ галаз садни дуст жедач, садани ихтибар хъийидач лагьана фикирна ва адаз пис хьана. Умуд кваз ам бубадиз килигна ва суал гана:
- Буба, диде, за пис кIвалах авунвайдан зун гъавурда акьуна... Заз регъуь хьана, заз гъалатI дуьзар хъийиз кIанзава... Аллагь Таалади ва куьне вирида залай гъил къачун патал за вуч авун лазим я?
- Вуна Аллагьдивай ﷻ гъил къачун тIалабна кIанда ва садрани, рикIел хуьх САДРАНИ, чарадан шей къачумир!!! – жаваб гана бубади.
- Хьурай буба! БицIи аялди гъилер хкажна тIалабиз эгечIна: «Я Аллагь! Регьимлуди, Мергьяматлуди! За Вавай тIалабзава, гъил къачу залай, минет хьуй! За гаф гузва мад садрани чарадан шей къачудач лагьана!»
- Дуьз я. Гила Аллагь Таалади валай гъил къачуда ва гележегда вун чIуру кIвалахрикай хуьда лагьана, чна умуд кутада. Исятда жува машин Расулав вахце ва адавай гъил къачун тIалаб.
- Хьурай буба... Куьнени залай гъил къачу, за куьн пашманарна, за гаф гузва мад за чуьнуьх хъийидач лагьана! Мусади диде-бубадиз гаф гана, ахпа къачуна машин, багъишламиш лугьуз Расулан кьилив фена.
