ФатIима ва мультфильм

ФатIима вичин гъвечIи стха Рамазанахъ галаз санал Винни Пухакай мультфильмдиз килигзавай. Йифен геж вахт тир, амма аялар садни ксуз хъфизвачир. Дах кIвале авачир, ам командировкадиз фенвай. Диде лагьайтIа, кIвалин кIвалахрал машгъул тир.

Ада пакадин йикъан экуьнахъ мугьманар гуьзетзавай ва абур атуниз гьазурвилер аквазвай. Дидеди са шумуд сеферда аялар авай кIвализ гьахьиз, абуруз телевизор хкуд лагьанай. Амма ФатIимадиз мультфильмдиз килигиз кIанзавай. Рамазан лагьайтIа, дивандал ярх хьана яваш-яваш ахварал физвай. Эхирни, дидедивай эхиз хъхьанач:

 - Я зи руш, вучиз вуна заз яб гузвач!? За ваз ксуз ахлад шумудра лагьана? Килиг садра, йифен геж вахт я! Аквазвани, Рамазанни ахварал фенва. Вун гьеле пака экуьнин капI ийидайвал фад къарагъна кIанзава.

- Я диде! Зун и мультфильмдиз эхирдалди килиг хъувуна, ахпа хъфида. Ваз минет хьуй! – тIалабна ФатIимади.

 Им вуна заз ксуз хъфида лугьуз шумуд лагьай сефер я гаф гузвайди, адак айиб кутуна дидеди. – Гьасятда телевизор хкудна, катиз-катиз месик алад кван.

Месик къаткайла кефи ханвай ФатIима вич эхирдалди килиг тавур мультфильмдикай фикир ийиз, са къвалалай масадал элкъвезвай… Экуьнин капI ийидай вахт хьайила, ам, виликдай хьиз, садлагьана ахварикай кватнач. Дидеди ам са шумуд сеферда ахварай авудна, амма ФатIимадивай къарагъиз жезвачир. Эхирни, са гужуналди дидедивай ам ахварай авудиз хьана. Гьеле ахварик кумаз ам са гьикI ятIани, рагъ экъечIдалди капI ийиз агакьна.

- Ингье, аквазвани ваз, зи руш, йифиз геждалди телевизордиз килигунин нетижа вуч ятIа! – лагьана дидеди.

- Анжах мультфильмар рикI аладардайбур тир, гьавиляй заз абуруз эхирдалди килигиз кIанзавай, - вич михьи ийиз гатIумна ФатIима.

- Абуруз исятда килигиз ваз куь манийвал ийизва кьван? Яраб абуруз йифиз килигун гьакьван метлеблу кар тир жал? – хабар кьуна дидеди. – Абур себеб хьана са тIимил амай вуна экуьнин капI ахъайиз. Вуна фикир ая, эгер экуьнин капI ахъа хьанайтIа, гьикьван пис жедай?

ФатIимадиз адакай фикирни ийиз кIанзавачир. Вахтунда ксуз хъфин тавун чIуру кIвалах тирди гила ам гъавурда акьунвай.

- Эхь, я диде, вун гьахъ я! За адакай фикирначир, - вичин тахсир хиве кьуна ФатIимади.

- За фикирзава, вун месин капI авуна, гьасятда ксуз хъфена кIанда. Гележегда гьакI жеда лагьана за умуд кутазва, - лагьана дидеди.

- За ваз гаф гузва, диде, и йикъалай кьулухъ гьа вуна лагьайвал жеда, - лагьана ФатIимади. Ада вичи-вичизни мад йифиз геждалди телевизордиз килигиз ацукьдач лагьана, гаф ганва.

И арада рак гатадай ван хьана, ам ахъа хьана ва ракIарин вилик чинал хъвер алаз чIехи бубани диде акъвазнавай. Абур хуьряй хтанвай. ФатIима шаддиз абурун кьилив катна, адан гуьгъуьналлаз ахварай аватай Рамазанни…