КичI
Вичин месик Агьмад зурзазвай. Адаз лап кичIезвай. Ингье! Мад са ни ятIани дакIар гатаз башламишна! Агьмадан зегьле фена – адаз кIвале авай са шейинин хъен акуна. КичIевиляй адан бедендал алай вири чIарар цаз-цаз хьана акъвазнавай. Адаз гьарайиз кIан хьана, амма сес акъудиз хьанач.
Садлагьана адаз вешрешдин ван хьана ва ам яргъандик чуьнуьх хъхьана. И арада адаз са жуьредин ван хьана. Эхирни Агьмад гьасятда кIваляй катна диде-бубадин кIвализ гьахьна ва дидедин къужахда гьатна. Гьарай кьилел алаз ва шехьиз кIвализ гьахьай хва акурла, дидедизни кичIе хьанвай.
- Агьмад! Агьмад! Секин хьухь! – гьарай акъатна дидедай ва хва секинариз эгечIна.
Велед секин жедалди диде-буба вил алаз акъвазна, ахпа вуч хьанатIа хабар кьаз эгечIна. Агьмада дериндай нефес къачуна суьгьбет башламишна:
- Агь, заз кичIе хьанвай къайдадикай квез хабар авайтIа! Зун ахварал физвай ара тир, садлагьана заз са шейинин ван хьана. Ам кIвале къекъвезвай.
- СубгьанаЛлагь! – тажуб хьайи дидедай гьарай акъатна.
- Заз кичIе хьанай! – давамарна Агьмада. – Ахпа са ни ятIани дакIар гатана. Заз зи рикI акъваздайди хьиз авай, - гьа къайдада заз кичIе хьанвай! Эхирдайни кIвалин пипIе са куь ятIани вешрешар ийиз эгечIна, ахпа ада зун авай патаз зверна ва зун адахъай катна иниз акъатна! – суьгьбет акьалтIарна Агьмада ва дидедив агатна.
Дидени Агьмад кIвале акъвазна, буба лагьайтIа, хцин кIвализ фена. Агьмад сакIани секин жезвачир. Адаз гьатта дидедин къужахдай эвичIиз кичIезвай.
- Зи хва, рикIел аламани, за ваз кIиче хьайи вахтунда лугьудай гафар чирай тир? – жузуна дидеди.
- М-м-м… - фикирдик акатна аял. – «Ля илягьа илляллагь» тушни?
- Эхь, дуьз я! А гафарин мана «сад Аллагьдилай ﷻ гъейри мад аллагьар авач» я. Ваз чизва хьи, эгер Аллагь Таалади вун хвейитIа, гьич са шейинивайни ваз зарар гуз жезвач.
- Дуьз яни? Гьатта чинерривайни?
- Гьелбетда, зи хва! Чун вири Аллагь Таалади халкьнава ва анжах Адаз вири муьтIуьгъ жезва. Виридалайни важиблу кар – рикIин сидкьидай Аллагь Тааладин къуватдихъ ва къудратдихъ инанмиш хьун я. ИкI хьайитIа, вун хуьзвайбурукай виридалайни Хъсанда хуьда!
- Чинерарни Аллагь Таалади халкьнавани? – мад суал гана Агьмада.
- Гьелбетда! - жаваб гана дидеди. – Аллагьди ﷻ абур цIукай халкьнава ва чаз таквадайвал авунва.
- Диде, бес абуру вучиз чаз зиян ва кичIерар гузва? Абур анжах гьа и кIвалахар авун патал халкьнава жал?
- Ваъ, Аллагь Таалади абур анжах Вичиз ибадат авун патал халкьнава. Ваз чир хьухь, вири чинерар писбур туш! Аллагьди ﷻ чаз хьиз абурузни хъсан ва пис шейэр, дуьз ва чIуру рехъ хкядай мумкинвал ганва, гьавиляй чилел исятда имансуз – шейтIанар ва иман гъанвай – мусурман чинерар яшамиш жезва. Мусурман чинерри гьич садрани инсанриз зарар гузвач! Идалайни гъейри, зи хва, ваз чир хьун лазим я хьи, мусурмандиз чинеррихъай кичIе хьана кIандач, вучиз лагьайтIа абурни гьа чун хьтин махлукьатар я. ГьакIни Пайгъамбарди ﷺ чаз чIуру чинерин зарардикай къутармиш жедай къайда чирнава.
- Абурукай къутармиш хьун патал чна вуч авуна кIанда? – хабар кьуна Агьмада.
- Чун Аллагьди ﷻ лянет хьайи шейтIандикай хуьн патал «Аль-Фалякъ» ва «Ан-Нас» сураяр кIелун лазим я. Мад кIвале гьамиша Къуръандин, иллаки «Аль-Бакъара» сурадин ван хьана кIанда! Имансуз чинерривай Аллагьдин ﷻ гафар эхиз жезвач ва абур лугьузвай чкадай катзава.
- Ваз чизвани, диде, заз гила акьван кичIезмач! – лагьана Агьмада ва дидедин къужахдай эвичIна.
- Ма ша Аллагь! – шад хьана дидедиз.
- Ви кичI михьиз квахьдайвал, ша чна исятда аят «Аль-Курси» кIелин. Чир хьухь, ксудалди и аят кIелайтIа, гьатта пакама жедалди вак садани хуькуьрдач.
Дидеди Агьмад къужахламишна ва абуру кьведани санал аят «Аль-Курси» кIелна. КIелна куьтягьнамазди кIвализ буба гьахьна. Адан чинал хъвер алай.
- Хва, ваз кичIерар гайибур заз жагъана. – Ингье ви йифен мугьман, алава хъувуна ада ва къуншидин шенпIи чилел эцигна.
Дидени Агьмада лап тажуб хьана.
- Ингье дакIар гатайдини, - лагьана бубади ва ич къалурна. Куьчеда гар авай, гьавиляй тарарин хилер гарал къугъвазвай ва дакIарар гатазвай, - ахъайна куьтягьна бубади.
- Альгьамдулиллягь! – лагьана дидеди. – Аквазвани, хва? Авайвал лагьайтIа, кичIе жедай гьич са шейни авачир. Эгер вуна къе инал лагьай дуьаяр кIелиз хьайитIа ваз гьич садрани кичIе женни ийидач. Ин ша Аллагь!
