ФатIимадиз Аллагь ﷻ кIан я
ФатIимадиз Аллагь ﷻ кIан я
Эхирни, икьван вахтунда гуьзетай югъ алукьна! Им ФатIима хизанни галаз са вацра хуьруьз хъфизвай югъ тир.
Гьамиша хьиз, пакамаз фад къарагъна, дидедихъ галаз капI авуна, ФатIимади рекье гьатдайвал шейэр кIватиз башламишна. Дах мискIиндай хтайла, вирида санал экуьнин тIуьн нез эгечIна.
- Хуьруьз агакьун патал гьикьван вахт герек я? – хабар кьуна ФатIимади.
- Аллагьди ﷻ гайитIа, пуд сятинилай гзаф герек къведач, - жаваб гана дахди.
- Аллагьди ﷻ тагунни мумкин яни кьван? – хабар кьуна ФатIимади.
- Вуч хьайитIани хьун мумкин я, вучиз лагьайтIа вири крар Адан ихтиярдалди жезвайди я.
- Гьатта Аллагьди ﷻ чаз вахтунда аниз агакьдай ихтияр гун тавуртIани, гьамни хъсан я чаз, гьикI хьи Аллагьдиз ﷻ чун патал вуч хъсан ятIа чизва. Адаз чун кIанзава ва чун патал виридалайни хийирлу шейэрни ийизва, - алава хъувуна дидеди.
- ЯтIа Аллагьдиз ﷻ чун гзаф кIан яни? – хабар кьуна ФатIимади.
- Эхь, Аллагьдиз ﷻ чун гзаф кIан я, - тестикьарна дидеди.
- ГьакI ятIа, чазни Аллагь ﷻ кIан хьун лазим я! – гьарай акъатна ФатIимадай.
- Гьелбетда, лазим я, - лагьана дахди. Вири инсанар: вун, дах, диде ва ви гъвечIи стха Рамазан Аллагьди ﷻ халкь авунвайбур я. Ада вири дуьнья халкьна.
- Эхь, Аллагьди ﷻ чун хъфизвай хуьр, вацIар, чуьллер ва тамарни халкьна. Ана авай, вун рикI алаз къугъваз физвай къадим регъверни Ада халкьна, - лагьана дидеди.
ФатIимадиз вич икьван чIавалди садрани гьич фикирдизни атун тавур кардин гъавурда акьурди чир хьана. Адаз кIанзавай вири шейэр Аллагьди ﷻ яратмишна!
- ЯтIа и дуьнядал виридалайни чаз Аллагь ﷻ кIан хьун лазим я! – тестикьарна ФатIимади.
- Гьелбетда, - жаваб хгана дахди.
- Адалай гъейри мад чаз вуж кIан хьун лазим я кьван?
Фу тIуьрдалай кьулухъ вири машинда ацукьна хуьруьз хъфена. Рекье авайла ФатIимади фикирар къугъунрикай ваъ, Аллагьдикай ﷻ ва адаз Ам гьикьван кIан ятIа, гьадакай ийизвай.
