Пуд йикъалай гзаф хъел тахьуникай
Пуд йикъалай гзаф хъел тахьуникай
1. Анаса агакьарайвал, Аллагьдин Расулди ﷺ лагьана: «Сада-садахъ галаз араяр атIумир, сада-садахъ далу элкъуьрмир, садаз-сад такIан жемир, сад-садал пехил жемир ва стхаяр хьухь, эй Аллагьдин ﷻ лукIар! Мусурмандиз вичин диндин стха пуд йикъалай гзаф вахтунда гадардай (яни, адахъ галаз рахан тийидай) ихтияр авач!» (Аль-Бухари, Муслим).
2. Абу Аюба агакьарайвал, Аллагьдин Расулди ﷺ лагьана: «Мусурмандиз вичин стхадихъ галаз пуд йикъалай гзаф вахтунда, сад-садал гьалтайла чин маса патахъ элкъуьриз, араяр атIудай ихтияр авач. Абурукай кьведакай хъсанди ам жеда хьи, ни сифте муькуьдаз салам гайитIа» (Аль-Бухари Муслим).
3. Абу Гьурайради агакьарайвал, Аллагьдин Расулди ﷺ лагьана: «Инсанрин крар гьар хемис ва ислен йикъара Аллагьдиз ﷻ къалурзава ва Аллагьди ﷻ Вичихъ галаз сад хьиз са затIунизни ибадат тийизвай гьар са инсандин гунагьрилай гъил къачуда, амма такIанвили вичин стхадихъай къакъуднавай инсан квачиз. А чIавуз Аллагьди ﷻ лугьуда: «Абур кьвед тур, та абур сад-садахъ галаз меслят хъжедалди!» (Муслим).
4. Жабира лагьана: «Заз ван хьана Аллагьдин Расулди ﷺ икI лугьуз: «Гьакъикъатда, Аравияда капI ийизвайбуру вичиз ибадат авуникай шейтIандин умуд атIана, амма абурун арада чуьруьк туниз ада гьеле умуд ийизма» (Муслим).
5. Абу Гьурайради агакьарайвал, Аллагьдин Расулди ﷺ лагьана: «Мусурмандиз вичин стха пуд йикъалай гзаф вахтунда гадардай ихтияр авач, амма ни ам пуд йикъалай гзаф вахтунда гадарайтIа ва ахпа кьейитIа, ам ЦIуз фида» (Абу Давуд).
6. Асгьаб Абу Хираш Хадрад бин Абу Хадрад аль-Асламиди агакьарайвал, адаз ван хьана Пайгъамбарди ﷺ икI лугьуз: «Вичин стхадихъ галаз са йиса араяр атIайди адан иви экъичайдаз ухшар я» (Абу Давуд).
7. Абу Гьурайради агакьарайвал, Аллагьдин Расулди ﷺ лагьана: «Са мусурмандиз масадахъ галаз пуд йикъалай гзаф вахтунда араяр атIудай ихтяр авач. А пуд югъ алатайла, къуй ам адахъ галаз гуьруьш хьурай ва салам гурай. Нагагь муькуьда адан саламдиз жаваб гайитIа, абуруз кьведазни суваб жеда, эгер ада жаваб тагайтIа, ам гунагь гваз хъфида, амма салам гайида абур къакъатунин патахъай жавабдарвал тухудач» (Абу Давуд. Абу Давуда лагьана: «Эгер абур сад-садавай Аллагь ﷻ патал къакъатнаватIа (яни, сада масад гадарунин себеб ада цIийивилер тун ва я ачухдиз гунагьар авун я, кьве инсандин арада жезвай адетдин гьуьжет ваъ), винидихъ лагьай гафар абуруз талукь туш»).
