ГьикI вейпри жаванар рекьизва?
ГьикI вейпри жаванар рекьизва?
Йисалай-суз вейпинг – электронный пIапIрус ва ихьтин маса затIар чIугун – жаванрин арада къвердавай машгьур жезва.
Абур вейприн къати рекламадин кампанийралди, дизайндалди, бугъламишзавай жими затIарин гьар жуьредин тIямралди желб ийизва. Амма и модадин майилвилихъ жегьилрин сагъламвал патал лап пис хатавал чуьнуьх хьанва ва гзаф вахтара жаванри чпи, гьакI абурун диде-бубайрини ам гьисаба кьун тавуна тазва.
Якъин, исятда электронный пIапIрусар ишлемишуни сагъламвилиз гзаф зарар гузвайди чин тийизвай инсанар авач. Амма 15-17 йиса авайла адаз рикIивай ни фикир гузва кьван? ПIапIрусар чIугвазвай жегьилриз акI жезва хьи, и аслувили арадал гъизвай жигеррин кьак, рикIихъ галаз алакъалу тир месэлаяр ва жуьреба-жуьре азарар абурук акатдач. Амма им эсиллагь акI туш.
Вейпар ишлемишунин хатавилер ва нетижаяр
Жаванри вейпар ишлемишуни бегьем хатавилер арадал гъизва ва адахъ яргъал физвай нетижаяр жезва. Виридалайни асул кар алай хатавал – жигерри дуьзвилелди кIвалах авун чIур хьун я. Вейпар ишлемишиз башламишай гзаф жегьилар нефес чIугунин месэлайрихъ, уьгьуьдихъ, астмадихъ, стIалжемдихъ галаз дуьшуьш жезва. Вейприн жими затIарик квай химиядин жуьреба-жуьре шейэр гьамиша къенез чIугуни жигеррин ва бронхрин четин азаррал гъун мумкин я. Вейпар гзаф ишлемишзавай жаванри чеб гьакIни психикадихъ галаз алакъалу тир месэлаяр арадал атунин хатавиликни кутазва.
Жаванрин арада вейпингдин вилик пад кьун ва адахъ галаз женг чIугун
Жаванрин арада вейпингдин вилик пад кьуни ва адахъ галаз женг чIугуни вейпар ишлемишунихъ галаз алакъалу тир пис нетижайрин вилик пад атIунин карда важиблу роль къугъвазва. Сифте кам – вейприкай сагъламвилиз авай зарардикай хабардар авун я. Им мектебра чирвилерин межлисар тухуналди ийиз жеда, гьа жергедай яз вейпар ишлемишунин хаталувилин темадай лекцияр, семинарар ва дискуссияр тешкил авуналди. Адалай гъейри, жаванри жува-жувал гуьзчивал авунин ва стресс идара авунин вердишвилер къачун лазим я, чеб секинарунин жуьре хьиз вейпингдикай куьмек къачун тийидайвал.
Къанун ва яш тамам тахьанвайбуруз вейпар маса гунал гуьзчивал авун
Къанун ва яш тамам тахьанвайбуруз вейпар маса гунал гуьзчивал авун – жаванрин арада электронный пIапIрусар ишлемишунин нетижада мумкин тир пис нетижаяр арадал атунин вилик пад кьунин важиблу кар я. 18 ва я 21 йисалай гъвечIибуруз (уьлкведилай аслу яз) вейпар маса гун къадагъа ийизвай къанунарни положенияр яш тамам тахьанвайбуруз а затIар ачухдиз гьатун тIимиларун патал кхьенва. Амма, ахьтин къанунар аватIани, абур кьиле тухунал ийизвай гуьзчивал тамамди туш.
Гзаф жаванар чIехи дустарин, онлайн-туьквенрин ва я чинеба маса гузвайбурун куьмекдалди а къанунрилай къерехдиз экъечIзава. Вейпар маса гунал ва раиж авунал кIеви гуьзчивал тахьуни яш тамам тахьанвайбуруз са четинвални авачиз абур ва гьакIни никотин квай жими затIар къачудай мумкинвал гузва. Яш тамам тахьанвайбуруз вейпар маса гунин къанунар чIурзавайбурал гуьзчивал авун ва жаза гун артухарна кIанда.
