Пуд кас алай чкадал кьведаз кушкушдалди рахун къадагъа тирдакай
Аллагь Таалади лагьана: «Чинебан рахун – анжах шейтIандивай я…» (яни, ина ихтилат физвайди ахьтин чинебан рахун я хьи, гьа чинеба рахазвайбур я гунагь крарикай рахазва, я гунагь крар авун фикир ийизва) («Аль-Мужадала», 10).
- Ибн Умара агакьарайвал, Аллагьдин Расулди ﷺ лагьана: «Эгер пуд кас кIватI хьайитIа, къуй абурукай кьве касди пуд лагьай кас алай чкадал кушкуш тавурай» (Аль-Бухари, Муслим).
И гьадис Абу Давудани гъизва, ана ихьтин алава ава: «Абу Салигьа (и гьадис агакьайбурукай сад) лагьана: «За Ибн Умаравай жузуна: «Эгер кьуд кас кIватI хьайитIа?» Ада лагьана: «А вахтунда адакай ваз зиян авач»» (Яни, эгер рахазвайбур кьуд ва я адалай гзаф аваз хьайитIа, кьведавай чпин арада чинебан ихтилат авуртIа жеда, вучиз лагьайтIа ида садан кефини хадач).
Адалай гъейри, и гьадис «Аль-Муватта» ктабда Малика гъизва. Ада агакьарайвал, Абдуллагь бин Динара лагьана: «Са сеферда, зун Ибн Умарахъ галаз базардин патав гвай Халид бин Укбадин кIвале авайла, адахъ галаз кьилди ихтилат ийиз кIанзавай са кас атана. Залайни Ибн Умаралай гъейри кIвале мад касни авачир, а чIавуз ада мад са касдиз эверна, адалай кьулухъ чун кьуд кас хьана, ахпа заз ва эверай касдиз ада лагьана: «Са тIимил а патахъ алад, вучиз лагьайтIа заз ван хьана Аллагьдин Расулди ﷺ икI лугьуз: «Къуй кьве касди пуд лагьай кас алай чкадал кушкуш тавурай».
- Ибн Масуда агакьарайвал, Аллагьдин Расулди ﷺ лагьана: «Нагагь куьн пуд кас аваз хьайитIа, къуй кьве касди пуд лагьай касдихъай чинеба кушкуш тавурай, та куьн маса инсанрихъ агалтдалди, вучиз лагьайтIа ида ам сефиларда» (Аль-Бухари, Муслим).
