Тапан шагьидвал авун кIевелай къадагъа тирдакай
Тапан шагьидвал авун кIевелай къадагъа тирдакай
Аллагь Таалади лагьана: «…ва тапан шагьидвал тийизвайбур, ва, усал затIунал гьалтайла, лайихлудаказ патавай физвайбур…» («Аль-Фуркъан», 72).
1. Абу Бакра лагьана: «Са сеферда Аллагьдин Расулди ﷺ инсанривай хабар кьуна: «Виридалайни чIехи гунагьар гьибур ятIа лугьудани квез?» Абуру лагьана: «Гьелбетда, я Аллагьдин Расул ﷺ!» А чIавуз ада лагьана: «Аллагьдихъ ﷻ галаз сад хьиз масабуруз ибадат авун ва диде-бубадив гьуьрметсузвилелди эгечIун». ИкI лугьудайла Пайгъамбар ﷺ кьуьнт яна са къвалал къатканвай, ахпа ам ацукьна ва лагьана: «Ва, гьакъикъатда, тапан ихтилатар!», - ва Пайгъамбарди ﷺ а гьафар лугьуз давамарна, та чна лугьудалди: «Ам акъваз кьванни авунайтIа!» (Инсанриз Пайгъамбар ﷺ язух атана, вучиз лагьайтIа ада и гафар лугьудайла адак гзаф къалабулух акатна, гьикI хьи ада инсанар тапаррикай игьтиятлу авун лап важиблу яз гьисабзавай) (Аль-Бухари, Муслим).
Инсандиз вичи лугьузвай гафар якъиндиз чир хьунин чарасуз я
Аллагь Таалади лагьана:
«Ваз чирвал авачир крарин гуьгъуьна аваз фимир…» («Аль-Исраъ», 36).
1. Абу Гьурайради агакьарайвал, Пайгъамбарди ﷺ лагьана: «Тапархъан хьун патал, инсанди вичиз ван атай вуч хьайитIани масабурал агакьарун бес я» (Муслим).
2. Самуради агакьарайвал, Аллагьдин Расулди ﷺ лагьана: «Закай вичи таб яз гьисабзавай гафар ахъаяй кас тапархъанрикай сад я» (Муслим).
3. Асмади лагьана: «Са дишегьлиди лагьана: «Я Аллагьдин Расул ﷺ, зи гъуьлуьз мад са паб ава. Заз гунагь жедани, нагагь гъуьлуь гьакъикъатда заз таганвай затI, ада заз пишкешнавайди хьиз къалурайтIа?» Пайгъамбарди ﷺ адаз ихьтин жаваб гана: «Гьакъикъатда вичиз пишкеш тавунвай шей вичиз ганвайди хьиз къалурзавай кас тапаррин кьве парталар алукIайдаз ухшар я» (Аль-Бухари, Муслим).
