Курортдин алдатмишун
Зун элкъвена кьулухъ килигна, яраб ам кьулухъ элкъвена килигнатIа лугьуз… Машгьур манидин цIараралди нубатдин, и гуьзел уьлкведиз адет хьанвай, курортдин ашкъибазвилин кьиса башламишиз жеда. Гьар йисуз агъзурралди туристрин кьисметар чкадин халкьдин уьмуьрдик акахьзава ва агьвалатрин ажайиб нехишар арадал гъизва.
Ам – гьеле жегьилди ва иерди, чIехи мегаполисдин кат-калтугуникай ял ягъиз, тIебиатдин и кьил а кьил авачир гегьенш зурба чуьллерин ван-сес авачир архайинвиле ял ягъиз, михьи дагъдин гьавадикай ва къайи мурк хьтин булахдин цикай лезет хкудиз атана. Ада – мукьвара сад лагьай аял хьун къейд авур, къуватлу ва уьмуьрдай ацIанвай жегьил гадади, адав къулай шартIар авай бубадин кIвал вугузва.
Анжах са-кьве килигун – ингье ам, атана алатдай цIийи ашкъи, вич июндин чими шагьвар хьтин кьезилди хьиз акур, амма ахпа пис вакъиайрин ва бедбахтвилин нетижайрин тIурфандиз элкъвей, гзаф инсанрин кьисметар хайи.
Мусибат жедайдакай виликамаз са затIунини хабар гузвачир. ГьакIани низ чир жедай кьван, нагагь пис кьисмет, гьакIан дуьшуьшдин кар хьаначиртIа – папаз телефондай сада-садаз ийизвай кхьинар жагъана. Къалмакъал, чара хьун истемишун ва ингье кьве патан мукьва-кьилийрини сада-садалай кIевиз гьарайзава.
«Адаз вун кIанзава! Адаз ам герекзавайди туш. Инсан садра ягъалмиш хьана, бес и кар патал хизан чукIурун дуьз яни? Ам ви аялдин буба я ва ам адахъ вердишзава. Аял буба авачиз гьикI чIехи жеда?!» Гзаф кьадар рахунар, инандирмишвилер, вахт – ибуру вирида санал саки чпин кIвалах авуна.
Хизан чкIанач. Адалай артух яз, бейхабардиз руш азарлу хьуни абур сад-садав агудна. Буба дилиди хьиз, гагь са духтурдин, гагь маса духтурдин патав физ, чирхчирвилер ишлемишиз, жуьреба-жуьре дарманар авун патал пулар жагъуриз авай. Ада вичин гъвечIи кIани рушаз герек хьайила вичин ивини гана. Аял сагъ хъжез гатIумна ва хизан мад виликдай хьтин, хъсан ва къайгъусуз уьмуьр тухузвайди хьиз аквазвай.
И зулун юкъузни мусибат жедайдакай са затIунини хабар гузвачир. Амма аял сагъар хъийизвай духтурди авур гуьзлемиш тийизвай зенгини ачух цавай ягъай цIайлапанди хьиз вири къарсурна. «Куь рушакай ВИЧ жагъана. Гьа гьахьтин нетижа куь ивидин анализдини гана. Иви къачудайла куьн ахтармишна кIанзавайди тир. Ахтармиш тавун патал ни кIевивал авуна?» - ван къвезвай телефондай духтурдин къалабулух квай сесинин. Амма бубадиз гила ван къвезмачир.
Ада вичи кIевивал авуна. Рушак тадиз иви кутуна кIанзавай. Тади авун лазим тир. Кьадай резусдин иви бес жезвачир. Ада вичинди гана. Амма адаз ВИЧ гьинай атана? Ам гьамиша сагълам тир ва…
Адан рангар атIана, гъиле авай телефон аватна ва адан вилерикай, чIехи шегьердай атанвай, Къадим Грециядин махарик квай гьуьлуьн рушари хьиз вичихъ чIугвадай мугьмандихъ галаз ам кьилди амукьай гатун рагъ авай бедбахт югъ карагна.
Гьа са гъвечIи герендин ашкъи, са тIимил амаз адан хизан чукIур тавур ва, тахьайди хьиз цуькI хьайиди хьиз хьайи, гила вичин вилерал, авай са рушан уьмуьр барбатIзава.
Туьтуьна туькьуьл кIватI акIанвай, гъилер хаинвилелди зурзазвай ва памбагар хьиз хьайи кIвачери яб гузмачир. «Идалай кьулухъ гьикI яшамиш жеда? Зун рушан фад чIалахъ жедай экуь-вили вилериз гьикI килигда? Адан рикIе авай туьгьметдиз гьикI жаваб гуда? Адаз и кар за кьисмет авуна хьи!» - сад-садан гуьгъуьналлаз кьилиз залан фикирар къвезвай. РикIи пехъиз тумп-тумп ийиз кIвалахзавай; ада вич гьикI рехи жезватIа гьиссзавай.
«Азизди, эхиримжи вахтара за зун пис гьиссзава, - патав гвай кIваляй папан ван хьана. Зазни анализар вахкуз кIанзава, гьикI аватIа килигдайвал, чи духтурди кIвалахзавай вахт зи рикIел хкваш».
«Имни…», - фикир атана адан кьилиз. Адан вафалу паб! Азар акатна, ибур вири ам вич тахсир яз!
Кьил элкъвезвай. Ам явашдиз, четиндиз алгъана, телефон хкажна ва гьа гьакI явашдиз чин гуьзгуьдихъ элкъуьрна. Адаз анай тийижир, михьиз рехи хьанвай, дили вилер авай ва ахъа хьанвай сивел лал гьараюн алай кьуьзуь инсан килигзавай…
Редакциядин патай: Аллагь Таалади Вичин эхиримжи Ктабда лугьузва (баяндин мана): «Зинадиз мукьва жемир (ам авуникай гьеле рахазвач)! Гьакъикъатда, ам – явавал ва пис рехъ я» («Аль-Исраъ» сура, 32-аят).
