Жуван муьгьуьббат туькIуьра
Жуван муьгьуьббат туькIуьра
Хизандин сагъ-саламатвал чпин уьмуьрда гъуьлуьнни папан кьилел атай крарилай, абурувай чпин алакъаяр дуьз туькIуьриз хьунилай ва кьведан гафни сад хьунилай аслу яз дегиш хьун мумкин я. Гъуьлуьвай, хизандин кьил яз, и крар къайдада тваз ва дуьз патахъ ракъуриз алакьна кIанда.
Лугьузвайвал, «пакун тIвалар гьихьтинбур ятIа, Гьаваярни гьахьтинбур я». Гьаниз килигна, итим абур дуьзар хъийиз ва хаз алахъ тавун, аксина, папан рикIин куьлег жагъуриз алахъун ва адан гьамишан мурад тир бахт жагъуриз куьмек гун важиблу я.
Эгер итимдин рикIин рехъ адан хуквадилай башламишзаватIа, папан рикIин къекъуьнар ва цацар авай рекьер япарилай башламишзава ва рикIел алай гзаф кьадар тIапIаррин куьлегар хъсан гафар я. Амма нагагь гафар краралди тестикь тежез хьайитIа, тIапIарар ахъа жедач.
Папаз хуш жедайвал гьикI ийида?
Папаз гьар са куьлуь-шуьлуь важиблу я. Эгер папа са адетдин хьиз аквадай ва итимриз гъвечIиди яз аквадай кар авуртIа – месела, хуьрек гьазурна, перемдиз уьтуь яна ва я кIвалелай кул эляна, къапар чуьхвена – адаз са-кьве хъсан гаф лагьана, жуван разивал малумарайтIа жеда. Ида ам сагъ-са юкъуз бахтлу авун мумкин я.
Шаксуз, куь дикъетлувилиз ва хъсан рафтарвилиз ада къимет гуда ва пуд сеферда артух хъсанвал хъийида. Вахт-вахтунилай санал янавай шикилриз санал ацукьна килигун, виликдай хьайи хъсан крар рикIел хкун важиблу я. Ихьтин регьят крари гъуьлуьз вичин муьгьуьббат хуьз куьмек гуда. Алай девирдин Гьаваяр къуватлу ва гьа са вахтунда зайиф, дикъет гунихъ ва къайгъу чIугунихъ муьгьтежбур я. Бязи вахтара гъуьлери ахьтин крариз дикъет гузвач ва абур лайихсуз зайифвилерай гьисабзава, амма дишегьлидиз ам лап важиблуди ва гьатта чарасузди хьун мумкин я.
Сад-садан гъавурда акьун тавунин себебар
Гъуьлуь вичин папан хиве твазвай делилсуз умудар сад-садан гъавурда акьун тавунин себеб хьун мумкин я. Гъуьлуьз фейидалай кьулухъ дишегьли са жуьреда дегиш жезва, амма санлай къачурла ам – гьа виликдай авай хьтин руш я. Чун вири хсуси тамамвилихъ чалишмиш жезва, амма куь юлдашди вичин хсуси тегьерар михьиз дегишарда лагьана гуьзлемишун – акьван жедай кар туш.
Куь умудар кьилиз акъатдайбур ятIа килиг ва абур куь папахъ галаз веревирд ийиз алахъ. Куьне умуд кутазвай крарикай бязибур кьилиз акъатун мумкин я, бязибур лагьайтIа, мукьвара – ваъ. Инсан гьихьтинди ятIа, гьакI кьабулун важиблу я ва адан патахъай кефи чIур хьун герек туш. Амма папазни гъуьлуьн патахъай вичин умудар авайди рикIелай алудна кIандач, гьахьняй адаз яб гун, куь алакъайра адаз вуч дегишариз кIанзаватIа гъавурда акьаз алахъун важиблу я.
Лап хъсан са касни авайди туш, анжах фикирда кьун лазим я: эгер квез куь папан патахъай умудар авайтIа ва куь фикирдалди абурукай са бязибур дегишарун лазим ятIа, куь папазни куьне куь тухунин тегьерда са вуч ятIани туькIуьр хъийиз кIан хьун якъин я.
Нагагь гъуьлуьни папа сада-садаз куьмек гуз гатIумайтIа, руьгьдин жигьетдай хкаж хьун ва артмиш хьун фад-фад фида.
Хъсан гъуьлуь паб бахтлу ийида
Инсанриз садаз-сад гьамиша герек туш, бязи вахтара инсандиз кьилди амукьиз кIан жезва. Кьилинди – гъуьлуьзни папаз сада-садак умуд кутаз, ихтибар ийиз ва лап герек хьайила лазим вахтунда лазим чкадал атана акъатиз чир хьана кIанда ва сада-садан куьмек гьиссдайвал, умуми бахтуник кьведан пайни кутуна кIанда.
Гъуьлуь, башчиди хьиз, вичин къуватдиз, кесердиз килиг тавуна, ам, неинки гьакI хъсандиз вахт акъудиз жедай дишегьлидихъ хьиз, гьакIни кьетIен ва садахъ галазни гекъигиз тежедай инсандихъ хьиз, вичин папахъ муьгьтеж тирди къалурна кIанда. Эгер гъуьлуьвай акI ийиз хьайитIа ва паб а кардин гъавурда акьуртIа, хизандин бахтунин дережа са кьадар хкаж жеда.
Чун ихьтин къайдадал бинеламиш жезва: хъсан гъуьлуь паб бахтлу ийида, бахтлу папа лагьайтIа неинки са гъуьл бахтлу ийида, гьакIни вири мукьва-кьилияр, кIвале яргъал йисара секинвал ва къулайвал арадал гъида.
