Жабраил малаикди чилелай вуч вахчуда?
Эвел алатай нумрайра
Гьабиб кьиникьал гъидай начагъвилел азарлу хьайила, адан патав Жабраил атана. Гьабибди азиз дустунивай хабар кьуна: «Зун кьейидалай кьулухъ вун чилел эвичI хъийидани?» Гьабибдиз жаваб яз, Жабраила лагьана: «Вун кьейидалай кьулухъ за чилел ийидай кар амач. Амма чилелай цIуд гзаф багьа шей цаварал хкажун патал зун цIуд сеферда эвичIда. Пайгъамбарди Жабраилавай а багьа шейэрикай ахъаюн тIалабна ва Жабраила галай-галайвал абурун тIварар кьуна. Ша чнани насигьат патал абурун тIварар лугьун.
Аминуллагьди ачухарна: «Сад лагьай сеферда зун чилелай берекат къахчун патал эвичIда, кьвед лагьай сеферда инсанрин рикIерай кIанивал къахчуз эвичIда. Ахпа мукьва-кьилийрин арада авай регьимлу рафтарвилер. Ахпа гьакимривай адалатлувал, дишегьлийривай регъуьвал ва гьая, кесибривай сабур, алимривай диндарвал ва дуьньядин девлетрихъай элкъуьн, девлетлуйривай жумартвал, Аллагьдин келимаяр – Къуръан къахчуда. ЦIуд лагьай сеферда иман къахчун патал эвичIда».
Эгер чун кьил акъудиз алахъайтIа, алай вахтунда винидихъ тIварар кьур багьа шейэрикай амайди анжах сад-кьвед я. Муькуьбур къахчунва, абурукай амайди гьакIан акунар я. Нагагь инсанриз килигайтIа, винел патан акунрай абур гьа инсанар я, амма эгер абурун амалриз килигайтIа, абуруз инсанрихъ галаз уртах са затIни авач.
КIанивилин чка душманвили кьунва, чеб-чпихъ галаз мидя тушир халкьар авач. Мал-девлетдал гьалтайла стхайринни вахарин арада, гьатта кицIерин арада кьванни садсадахъ галаз регьимлу хьун авач. Чпин вилералди акур ксари ахъайзава хьи, аялри гьатта чпин дидебубадал гъил хкажзава.
Гьакимрин адалатсузвиликай рахунин лазимвал авач, секин хьана, авайбурулай генани пис гьакимар ракъур тавун Аллагьдивай тIалабна кIанда. Кямир, чпиз кIандайвал яшамиш хьурай. Ахьтин югъ алукьда хьи, абуру икI лугьуз гьарайда: «Чи гьукум алудна гадарна, адакай чаз куьмек хьанач». Къуй ришвет гудай кас авачир ва сивиз муьгьуьр яна абурун беденрин паяри чпиз акси яз шагьидвал ийидай Арасатдал фирай.
Дишегьлийрин чинрилай регъуьвал квахьнава, абурун алверди дин русвагьна. Вязерин ва насигьатрин ванер къведай девир алукьнаватIани, абуру гьатта тIветIре къванцикай къачудай кьван менфятни къачунач.
Исламдихъ галаз кьурвал гьикI алукIна кIанзаватIа чна гьар юкъуз лугьузватIани, абуру яб гузвач. Инсанри чеб чуьлдиз ахъайнавай гьайванри хьиз тухун тавуна кIанзавайди лугьуникай хийир авач. Амма Исламда гьуьруьяр хьтин лайихлу, чпин руьгьда гзаф багьа шей хуьзвай дишегьлиярни тIимил туш.
Абур Шариатдин гъавурда ава ва Шариатди чпиз гьикI гьуьрмет ийизватIа чизва. Я Аллагь , Вуна авам дишегьлияр дуьз рекье тур, абурун рикI диндиз ачухара ва абуруз пай яз насигьат це. Я Гъил Къачудайди, хазинайрин къимет чир хьана абур хвейибурун берекат абур хуьз тахьайбуруз це.
Кесибриз сабур амач, Аллагьди чпиз гайидал абур рази жезвач. Жегьилриз регьят уьмуьр кIанзава ва гьи жуьреда хьайитIани девлетлу жез алахъзава. Абуруз малдевлет къазанмишуна къадагъа тир са затIни амач, гьатта ам тарашунин ва инсанар кьиникьин рекьелди къазанмишнаваз хьайитIани.
Чпин уьмуьр куьтягь жедайдакай абуру гьич фагьумзавач, абур чебни рекьидайди гьатта фикирдизни гъизвач. Абурувай регьятдиз са тахсирни квачир инсан рекьиз жезватIани, чпин чан абуруз лап багьа я. Абуруз чпи авур кардин гьич къайгъуни авач, анжах инсанриз адакай чир тахьун я кIанзавайди. Абуруз чизвач хьи, са затIни ахъай тавуна малаикри абурун вири крар кхьизвайди. Амма вавай хабар кьун тавуна вун сурун къванцин кIаник жедай чIулав югъ алукьда.
Кьиникьин малаик атайла вун къутармиш жедач, гьатта эгер чIехи уьлчмедалди алцумиз къизилдалди ришвет гайитIани. Идалай кьулухъ ваз я секинвал, я шадвал жедач ва куьмекни жедач, анжах Мергьяматлудалай гъейри. Варисриз амукьай а гьарам малдевлетдикай ваз Жегьеннемдин хкахь тийидай цIай жеда.
Жуваз ихьтин азабрин кIвал гьазурдалди, ша, кесиб кас, Исламдин рекьел акъваз. Аллагь Таала ви тубадихъ муьгьтеж туштIани, акьул кьилиз гъваш, Мергьяматлуда «Туба ая!» лугьуз эвер гузва хьи. Эгер пис инсанривай яргъа хьайитIа ва хъсан ксарин гуьгъуьна аваз фейитIа, абурувай ваз хъсан крар чир жеда.
Нагагь вуна абурухъ галаз дуствал авуртIа ва абур кIан хьайитIа, Халикьдин регьимдалди вун ваз кIанибурухъ галаз Магьшардал жеда. Жегьил инсанриз килиг, абур вун хьтинбур тир, амма дуьз рекьел жез кIан хьайивиляй абуру туба авуна. Гьахьтин жегьилрилай чешне къачу, жув къутармишун патал серенжемар кьабула, ахмакь яз амукьмир.
Гзаф меслятар гузва лагьана заз экъуьгъмир, абурукай менфят къачу, Аллагьди ваз куьмек гурай. Зи насигьатрикай, яни зун анжах тубадикай рахазва лагьана, бизар жемир, къуй Гьабибди r вав гъил вугурай. Са карни важиблу ва виридалайни герек тир алат гвачиз кьиле фидач. Исламдин рекьел экъечIай касдиз ахьтин алат – им рикIин сидкьидай тир туба я.
Мумъмин патал туба – им ник патал тум хьиз я, тум вегьин тавур никIяй лагьайтIа, бегьер кIватIиз жедач. Чи азиз Пайгъамбардини тубадин гафар йикъа пудкъанни цIуд сеферда лугьудай. Шафиди умматдиз чешне яз тур гуьзел рехъ чаз бес тушни мегер? Чун гунагьрикай хуьн тавуниз килигна, гьич са дуьшуьшдани ибадатдик умуд кутуна туба рикIелай алудмир.
КьатI ама.
«ПАЙГЪАМБАРРИН КЬИСАЯР» КТАБДАЙ.
