Имам Магьди атуникай куьруь кьиса
Эвел алатай нумрада
Аллагь Тааладин къудратдалди вичин вахт къведалди островдал дустагъда тунвай Дажала, винидихъ тIвар кьур терефдаррин кьушунни галаз, зунжурдай ахъа хьайи кицI хьиз, вичин гьужум башламишда. Вири фитнечийрин буба Дажалаз, чил яратмишайдалай кьулухъ анал гьеле тахьай хьтин фитнедик инсанар кутадай мумкинвал жеда, а фитне такун патал Аллагьди ﷻ халкьнавай вири шейэри тIалабда.
Душмандин кIвач эциг тавур чка амукьдач, адаз гьатта Меккадиз ва Мединадизни физ кIан жеда. А кьве къадагъа алай чка, Аль-Акъса мискIин (Байт аль-Мукъаддас) ва ТIура Сайна (Синай) дагъ малаикри хуьда ва лянет хьайидаз вичин кьацIай кIвач ана эцигдай ихтир гудач.
РагъэкъечIдай уьлквейра гьал лап четинди жеда, цIайни яд акахьай цIай акьур чкада хьиз. Вири дуьньяда еке къалабулухар жеда ва гъазаватдин пайдах хкаж жеда. Дамаскда Язидан несилдай са лянет хьайиди Магьдидиз акси яз экъечIда ва имамди ам рекьида. Гапурдалди ада халкьдиз Исламдин рекьел эвер гуда ва гьакI Гьабибдин ﷺ Шариат чилел чкIида. Акси яз экъечIайбур алчахарда, Исламдихъай элкъвейбуруз чпин кьиникь жагъида. Пудкъанни цIуд агъзур мусурманди, зикир ийиз, Румият шегьер къачуда.
Бахтсуз Дажалаз талукь яз лагьайтIа, ам гьеле чи Пайгъамбардин ﷺ девирда хана. Пайгъамбардин ﷺ дуьадалди Аллагь Таалади ам Гьижаздин чилелай гьуьле авай островдал ракъурна. И мелъуьн Адаман несилдай тир инсан я, адан диде лагьайтIа, лянет хьайи иблисдин несилдай я. Ам чувудрин динда аваз малум жеда ва вич худа я лугьуз тестикьариз, инсанрихъ галаз гьуьжетар ийида. «Эгер за ви кьенвай бубадал чан хкайтIа, вун зи гуьгъуьна аваз къведани?» - лугьуда ада са касдиз. А вахтунда адан вилик бубадин къаматда аваз шейтIан къведа ва хциз ам гьакъикъат хьиз хьана, Дажалахъ инанмиш жеда ва ягъалмишвиле гьатда. Ягъалмиш хьанвай мелъуьндиз са вил жедач ва адан пелел «кафир» (имансуз) кхьенваз жеда. Лугьузва хьи, ам ламрал алаз жеда, а ламран япарни ахьтинбур жеда хьи, абурал виш инсан гьакьда. «Женнетни Жегьеннем зи ихтиярда ава ва зи динни гьакъикъиди я, ва залай гъейри мад касни авач», - тестикьарда а кафирди.
А чIавуз Къудратлу Аллагьди цавай Марьяман хва Ругьуллагь Иса авудда. Ам Дамаскда авай аль-Амавия мискIиндин минарадал авудда. Ам жемятди ва имам Магьдиди тайин авунвай мискIиндин имамди рагъдандин жемятдин капI ийизвай вахт жеда. Абуру Исадикай имам ийида ва адан гуьгъуьна аваз рагъдандин капI ийида. Анай Ругьуллагь Иса Байт аль-Мукъаддасдиз, Иерусалимда авай аль-Акъса мискIиндиз фида. Ана экуьнин кпIунин вахт хьайила, ам Магьдидал гьалтда.
Магьдиди ва адан дустари гьуьрметдивди Исадивай тIалабда кпIуна имам жедайвал, амма Ругьуллагь вилик экъечIдач ва Магьдидин гуьгъуьна аваз капI ийида. И сифте капI ада Магьдидин гуьгъуьна аваз ийида, ам Исламдиз атанвайди къалурун патал, - анжах гьа кар патал ада гьакI ийида, Иса - пайгъамбар я хьи ва валидин дережа пайгъамбардин дережадив агакьдач. Адалайни артух яз, Иса вад хкянавай пайгъамбаррикай сад я (чи Пайгъамбар Мугьаммад ﷺ, Ибрагьим, Муса, Иса ва Нугь - виридалайни чIехи пайгъамбарар я). Ада, вири пайгъамбаррин муьгьуьр тир, чи играми Гьабибдин ﷺ Шариат кьиле тухуда.
Ахпа Иса Ругьуллагь имам Магьдидихъ галаз санал Дажалан гуьгъуьниз фида ва Рамлатдин патарив, Лудд лугьудай чкада, абуру катна вичин руьгь хуьзвай Дажал кьада. Анал адав ажалдин крчунай хъваз тада. Исади ам жидадал яда ва ам чилел ярх жеда. Гьасятда а мелъуьн тукIвада ва инсаният адан фитнедикай къутармиш жеда. Адан гуьгъуьна аваз фейи чувудриз халис «Дувандин югъ» алукьда, адахъай садавайни катиз жедач. Абур, къветрен шарагар хьиз, гьар сана чуьнуьх жеда, ва абур чуьнуьх хьайи гьар са тарци шагьидвал ийида: «Захъни чувуд чуьнуьх хьанва». Рахун тавур са тарни амукьдач. ГьакI Дажалан терефдарар терг ийида ва абурукай и кардикай ахъайиз жедай садни амукьдач, абуру кьейи мусурманрикай шагьидар жеда.
Магьдидин меслят къалурдайбур арабар тушир, Аллагь ﷻ чир хьанвай ва араб чIалал рахазвайбур жеда. Ада, абурал меслят тагъана, кьилди вичи са къарарни кьабулдач. Дажалан фитнедин эхир эцигайла, Исламдилай гъейри маса дин амукьдач. Чувудар, хашпараяр Исадихъ инанмиш жеда, инанмиш тахьайбур гапурралди жазаламишда. Абур харж (жизйат) гуналди къутармиш жедач, абуруз анжах гапурралди жаваб гуда. Шариатди, алахьай юкъуз ракъини хьиз, нур гуда ва дуьнья, бутпересвиликай (гзаф худайриз ибадат авуникай) азад хьана, авайдалай иер жеда. Вири дуьньяда яшайиш лап хъсан жеда, къайдада ва адалатлувиле тамамвилив агакьда, дявеяр ва къалмакъалар амукьдач.Хипер ва жанавурар ислягьвилелди яшамиш жеда, гъуьлягъар лагьайтIа, гъвечIи аялрихъ галаз къугъвада. Майишат абад жеда, халкь девлетлу жеда, никIерин ва багъларин бегьерар тахьай хьтинбур жеда, гьатта ципицIдин са кулуни са шумуд кас тухарда. Эцигунар ийидай индустрия а саягъда вилик фида хьи, куьгьне са дараматни амукьдач. Чан алайбур, Женнетда хьиз, хушбахтвиле аваз, кьейибурукай фикир ийиз, пашман жеда: «Агь, абурал чан аламайтIа!» Ата-бубайрилай сивяй-сивиз атай бязи кьисайра лугьузва хьи, гьакI яхцIур йисуз давам жеда, амма абур са югъ хьиз акъатда.
А вахтунда Аллагьдин ﷻ кьадардалди имам Магьди и дуьньядай эхиратдиз фида ва Исади ам, жаназа капI эляна, Байт аль-Мукъаддасда кучудда.
Яжуж-Мажуж (Гог ва Магог) акъатда ва вири дуьнья чиркинарда. Ахпа абуру вирида Исадал гьужумда ва ам ТIура Сайна дагъдив чуькьведа. Ана ам вичин кьушун галаз элкъуьрна кьада ва адаз четинвилер жеда. Гзаф гишинвиляй ва цихъ къанихвиляй абур четин гьалда жеда. Иса Аллагь Тааладин вилик акъвазда ва чеб а гьалдай акъудун патал минетда. Лап гьа тIалабнамазди, Яжуж-Мажуж вири сад хьиз, сад-садал аватна, рекьида. Ахпа Иса вичин кьушун галаз ТIура Сайна дагъдилай эвичIда. А чIавуз чилел Яжуж-Мажужан кьенвай жендекрин пис ни жеда ва Аллагьдин ﷻ эмирдалди къушарин лужар къведа ва абурун ктIанвай жендекар гьуьлуьз гадарда. Адалай кьулухъ регьимдин марф къвада, ада вири чил чуьхуьда ва дуьнья виликдай авайвал хъжеда.
Ахпа Иса Ругьуллагь Меккадиз къведа. Ам Кябедал элкъведай вахтунда Даббат аль-арзи малум жеда, адан акунар ва чIехивал гафаралди лугьуз ва къелемдалди кхьиз жедач: кьил жунгавдин хьтин, кьуд кIвач, тум гьерен хьтин, япар филдин хьтин, гардан деве-къушдин хьтин, къвалар кацин хьтин, ранг пеленгдин хьтин, хур асландин хьтин, кIвачин кIанер деведин хьтин, вилер цIуьрнуьгъдин хьтин, кьве лув авай, чIар алайди жеда – Аллагьди ﷻ ам Вичиз кIандайвал яратмишна. Ахьтин гьайван акъатуникай Къуръандани лагьанва.
Лугьузва хьи, атайла, а гьайванди кьуд патазни уф гуда ва Аллагь Таалади а гар вири инсанрин пелерал кхьин акъатунин себеб жеда – гьар са инсандин тIвар, Аллагьди ﷻ адаз Вичин эвел авачир чирвилелди гайи (ильм аль-азаль). А кхьин экъис хьайиди жеда, ам гьинай килигайтIани аквада, яргъай ва я мукьвалай. Якъин яз гьисабзава хьи, и гьайван Салигь пайгъамбардин халкьди адан деве тукIурдалай кьулухъ катна рага чуьнуьх хьайи адан шараг я. Гьадисдиз килигна, а гьайван Масжид аль-Гьарамдай экъечIда. ГьакIни лугьузва хьи, ам Сафа кIунтIунин патахъай экъечIда. Аллагь Тааладилай хъсандиз ам садазни чизвач.
Ахпа Иса Ругьуллагь Мединадиз рекье гьатда ва Агьмадан ﷺ Равзадиз фида. Мединада ам эвленмиш жеда ва адаз кьве хва хада, адалай кьулухъ ам начагъ жеда ва и дуьньядай фида. Ам Аллагьдин Расулдин ﷺ гьуьрметлу Равзада кучукда ва адаз сур Умар Фарукъан патав эгъуьнда. Адалай кьулухъ чилел къиметлу са затIни амукьдач ва вири михьи ва намуслу инсанар и дуьньядай фида. Аллагьдин ﷻ эмирдалди рагъ рагъакIидай патай экъечIда ва инсанри туба ийида, амма Халикьди ﷻ абурун тубаяр кьабулдач, вучиз лагьайтIа а вахтунда тубадин варар агалда.
Гьар сад вич авай гьалда амукьда – кафир имансузвиле, мусурман Исламда. Ахпа Аллагь Тааладин Калам къахчуда ва ктабра анжах михьи чарар амукьда. ГьакIни Къуръан хуралай чизвайбурун рикIерай абуруз чизвайди акъудда ва абур са гьарфни чин тийизвай авамриз элкъведа. А чIавуз а авам халкь шииррал элячIда ва абурун Къуръан кIелунин вири устадвал шиирар кIелуникай ибарат жеда.
Амма и вири лишанар Ругьуллагь Иса и дуьньядай фейидалай кьулухъ ва гьабашитри Кябе чукIурайдалай кьулухъ дуьздал акъатда. Ахпа чими хуш гар акъатда, ам иман авай инсанар патал лишан жеда ва рикIе са стIал кьванни иман амай гьар са кас, вири сад хэьиз и дуьньядай фида ва дуьньяда «Аллагь» лугьудай са инсанни амукьдач. Амукьай виридалайни пис инсанар чеб тухунин тегьердалди гьайванриз ухшар жеда ва абурал Аллагь Таалади инсаниятдин уьмуьр акьалтIарда.
КьатI ама.
Шейх Саид эфенди, «Пайгъамбаррин кьисаяр 2-пай» ктабдай
