Саййидмугьаммадан кьиникьдикай
Саййидмугьаммадан кьиникьдикай
Пак жуьмя юкъуз нисинин кпIунин вахтунда пуд Женнетдин къуш лув гана Барзахдиз хкаж хьана. Аллагьдин ﷻ кьадардин вахт атайла, шагьидрин руьгьер цаварал хкаж хьана.
Саййидмугьаммад и дуьньядай Рагьманди ﷻ Вичин кIани лукIариз багъишзавай дережаяр къачуна фена. Ам уьмуьрди цуьк акъуднавай вахтунда, регьберриз лайихлу тир игитвилин гел туна, фена.
За ваз мубарак ийизва, зи руьгьдин хва, ваз гьатта Аллагь ﷻ чир хьанвай инсанрин мурад тир, шагьидрин дережа хьана. Вавай чирвилерин тарцел экъечIзавай крарин емишар, алимрилайни гзаф кIватIиз алакьна.
Дагъустандин муфтий шагьид хьайи юкъуз вири шегьер адахъ шехьзавай, иман гъанвайбурун рикIери а юкъуз дерт чIугвазвай ва гзаф итимрин вилеривай накъвар кьаз хьанач. Халкьдин баркаллу хва мунафикьри туькIуьрнавай желеда гьатнава лагьай хабарди Дагъустандилай къеце авай инсанарни гъамлу авуна. Вичин чан гьайиф текъвезвай, галатун тийижир вязчи сурун къванерин кIаник фейила, вири дуьньяди башсагълугъвал гузвай.
Вичихъ вири рикIери ялзавай инсандиз хаинрин кьацIай гъилералди гуж авуна. Пуд шагьид Ислам диндин чинебан душманри туькIуьрай желеда гьатна. Чан алайбуру ва кьейибуру абур эхиратдин шагьидар тирди шагьидвал ийизва, Мугьаммад-Ариф ахварай са хавасдин (кьетIен, Аллагьди ﷻ хкянавай лукIран) патав атана, адан патахъай галай-галайвал гъавурда туна. Лугьузва хьи, кьенвайди хъсан инсандай гьисабун патал, адан патахъай яхцIур касдин шагьидвал бес жезва. Эгер агъзурралди инсанри шагьидвал ийиз хьайитIа, абурун эхир хъсанди тирдан патахъай са шакни амукьзавач. Бахт таганвай кас Шариатдин рекье михьи ниятар аваз, ахьтин кьиникьдиз лайихлу жедач. Жуьмя юкъуз мискIиндиз фидай рекье садлагьана кьиникь – ахьтин дережадиз вуж лайихлу жеда кьван?!
Аллагь ﷻ рикIелай алатнавай ва михьиз дуьньядал машгъул хьанвай инсанри гзаф рухваяр лишандик кутуна: намус пулунихъ дегишарнавай кафир шейтIанри са тахсирни квачир жегьилар къирмишна. А вагьши ламари алчах дяве тухузва, хаинвилелди дустар маса гуз. Хъиткьинарунар абуруз мода хьанва, лукIар кьаз ва абурун жибинар пуларай ацIуриз.
И дуьньяда жезвай вири крар Аллагь Таалади виликамаз кхьенва ва кьисмет авунвайди гьикI авуртIани кьилел къведа, гьатта абур кьилел текъведайвал вири махлукьатар алахъайтIани. Кьадар-кьисметдал рази хьун, кIантIа ам хъсанди хьурай ва я писди, - им гьар са мусурмандин имандин дестек я, ва нин имандин вири ругуд дестекни тамам туштIа, ам тамам мусурман туш.
Бахтсуз инсан кьилел бедбахтвал атанвайди туш, бахтсуз кас ам я хьи, ни ам сабурлувилелди эхначтIа. Лугьузва хьи, виридалайни чIехи бедбахтвилер пайгъамбаррин ва Аллагьдиз ﷻ кIанибурун кьилел къвезва.
Ислам виридан рикIелай алатнавай вахтунда, Хасмугьаммадан кIвале капI тийизвай са касни авачир. КГБ-дин къуллугъчияр гьикьван адан гуьгъуьна къекъвезвайтIани, Хасмугьаммада чинеба илимар чирун акъвазарнач. Ада вичин аялриз гьеле гъвечIи чIавалай Шариат чирна ва, мягькем бине эцигна, абуруз адал кIвал эцигун буйругъна. Ада абур вири хъсанвилерив вердишарна тербия гана ва абуруз мугьман авачир я югъ, я йиф авачир. Асията гьар садаз кутугай гьуьрмет ийиз абур къаршиламишзавай ва рекье хутазвай.
Ма вуч лугьуда кьван, мугьманрикай бязибур абурал гуьзчивал авун патал тайин авунвай жасусар тир. «Дустарни» авай, атеистри пул гана есирда кьунвай ва гьукуматди абуруз ганвай тамам азадвиликай менфят къачузвай. Абуру чеб авамрин арада алимар хьиз къалурзавай, абур эхна кIанзавай. Девир ахьтинди тир хьи, дин чинеба кьиле тухуниз мажбур жезвай, динэгьлидив гьукуматдин идарайри кIвалахиз тазвачир хьи. КIвалах ва дин санал кьадайвал ийизвайбуруз лап четин тир, сиркеда авай шарчиз хьиз. Вичел вил авунихъай гьамиша кичIезвай, Раббиди ﷻ хиве тунвай буржи кьилиз акъуддайла гзаф четинвилер эхай хизан Аллагьди ﷻ дурум гуниз ахтармишна. Абуруз виридалайни хъсанди яз, кьве хцизни гьамишалугъ уьмуьрдин чIехи дережаяр гана. Хасмугьаммадазни Асиятаз лагьайтIа, Аллагьди ﷻ сабур гана, сабурлубурун дережадиз лайихлу авуна.
Гьайдаран диде адахъ шехьна кIандач, адаз кьисметнавайди Барзахдиз физвай рехъ хьана эхир. Бубадини ам бахтсуз хва яз гьисаб тавурай, хъсан эхирдилай чIехи бахт авач хьи. Аллагьдиз ﷻ гзаф шукур ая, шагьидрин дидеярни бубаяр, Адавай чIехи суваб къачудайвал. Лугьузва хьи, нагагь шукур тавуртIа, няметар хъфида, - къуй няметар куьтягь жедай югъ квез алукь тавурай. Ахъайнавай вахт куьтягь хьайила, кьиникьдихъай катиз жедач. Къуй рекьидай вахтунда Аллагьди ﷻ шагьада багъишрай! Гьатта са шумуд виш йисан уьмуьр гайитIани, адакай шадвал жедач, эгер эхир хъсанди тахьайтIа.
Саййидмугьаммад, Агьмад, эвленмиш тахьанвай Гьайдар – Барзахдин игитар я, вири дуьнья а кардин шагьид я. За квез Мергьяматлуда багъишнавай а савкьват, куьтягь тежедай шадвал, хушбахтвал мубаракзава. Инсанар ягъиз рекьидайбуру атIа дуьньядиз гзафбур ракъурна, амма квез хьайи хьтин кьиникьдиз садни лайихлу хьанач. Гзафбур дуьньядай пул патал фена, анжах куьн и дуьньядай дин патал фена. Идакай фикирдайла, гзаф сеферра ихьтин фикир къвезва: квекай садан чкадал зун хьанайтIа! Зи фикирдалди, гьамишалугъ уьмуьр хъсан я, и чIур хьанвай дуьнья адан терефдарриз туна. Чун патал вуч хъсан ятIа Чизвайда, къуй чаз хушбахтвал кьисметрай. Я Рабби ﷻ, гьар са иман гъанвайдаз бедбахтвилера сабур це ва няметрай шукур авун багъиша!
