Абу Бакр ас-Сиддикьакай кьисаяр
Рабиа ва Абу Бакр
Рабиа аль-Аслямиди ахъайзава: «Зи ва Абу Бакран арада къайи рахунар хьана ва ада заз зи кефи хадай гафар лагьана. Абу Бакр тадиз вичи лагьай гафарал пашман хьана ва заз лагьана: «Я Рабиа, вунани заз гьахьтин гафар лагь, ам ви патай заз кьисас жедайвал».
- Ваъ. За акI ийидач, - лагьана за.
- Вуна гьикI авуртIани заз акI лугьуда, тахьайтIа за Пайгъамбардиз ﷺ арза ийида.
- За акI ийидач, - тикрарна за адаз.
А чIавуз Абу Бакр Аллагьдин Расулдин ﷺ патав фена ва зунни адан гуьгъуьна аваз фена. А вахтунда зи тайифадай тир инсанар атана ва заз лагьана: «Аллагьди ﷻ Абу Бакраз регьим авурай, адаз валай Аллагьдин Расулдиз ﷺ куьн патахъай арза ийиз кIанзава, ада ви кефи я хьи ханвайди?!» За абуруз лагьана: «Квез чизвани а кас вуж ятIа?! Ам магъарада хьайи кьве касдикай сад я, ам мусурманрин агъсакъал я. Алад куьн, анихъ хьухь. Нагагь ам элкъвейтIа ва куьн акуртIа, ада куьн зи пад кьаз вичиз акси яз атанвайбур хьиз жеда ва и карди адаз хъел гъида. Ада и кардикай Аллагьдин Расулдиз ﷺ лугьуда ва адак хъел квайди акурла, Аллагьдин Расулдизни ﷺ хъел къведа. Эгер абуруз кьведазни хъел атайтIа, Аллагьдизни ﷻ хъел къведа, а чIавуз Рабиа телеф жеда!» Абуру заз лагьана: «Бес чна вуч ийида?» «Куьн ахлад», - лагьана за абуруз.
Абу Бакр Аллагьдин Расулдин ﷺ патав фена, адан гуьгъуьналлаз зунни фена. Ада Пайгъамбардиз ﷺ хьайивал ахъайна. Адаз яб гана, Пайгъамбарди ﷺ кьил хкажна, заз килигна ва хабар кьуна: «Я Рабиа, ви ва ас-Сиддикьан арада вуч хьана?» За лагьана: «Я Аллагьдин Расул ﷺ, чи арада къайи рахунар хьана ва ада зи кефи хадай гафар лагьана. Ахпа ада завай зани гьахьтин гафар вичиз лугьун истемишна, амма за лагьанач». А вахтунда Аллагьдин Расулди ﷺ лагьана: «Дуьз я, адаз жаваб хгумир. Вуна Аллагьди ﷻ валай гъил къачурай лагь». А вахтунда за лагьана: «Аллагьди ﷻ валай гъил къачурай, я Абу Бакр».
Гьасана ахъайзава: «Анай хкведайла, Абу Бакр шехьзавай».
Багъда нуькI
Садра Абу Бакр багъдиз фена ва ана адаз тарарин сериндик квай нуькI акуна. Адаз килигна, Абу Бакра лагьана: «Ваз хъсан я, нуькI. Вуна и тарарилай емишар незва, абурун сериндик ял язава ва ваз гьахъ-гьисаб жедач. Агь, эгер Абу Бакр ваз ухшар хьанайтIа!»
Абу Бакран эменни
Са сеферда Аллагьдин Расулди ﷺ лагьана: «Абу Бакран эменниди хьиз, заз садан эменнидини куьмек ганач». И гафар ван хьайила, Абу Бакр шехьна ва лагьана: «Бес зун ва зи эменни вибур тушни, я Аллагьдин Расул ﷺ».
Пайгъамбарди ﷺ Абу Бакран эменни вичинди хьиз ишлемишзавай.
Дин патал къурбандар
Абу Бакра дин кьабулайла, адан эменни яхцIур агъзур гимишдин пул тир. Ада гьижра ийидайла адаз вад агъзурни амачир, вири лукIар азад авун патал ва диндин игьтияжриз харжнавай.
Абу Бакран буба
Абу Бакра ахъайзава: «Зун зи буба Абу Кухафа галаз Пайгъамбардин ﷺ патав атана. Ада заз лагьана: «Кьуьзуь кас туна кIандай, зун къведай адан патав».
- Вун адалай лайихлу я ва ам ви патав атун лазим я, - лагьана за.
- За адаз кьетIен гьуьрмет ийизва, адан хциз зи вилик авай гьалдиз килигна, - жаваб гана Пайгъамбарди ﷺ.
