Пакамахъ ва нянихъ Аллагьдиз зикир авуникай

Аллагь Таалади лагьана: «…ва ви Раббидин тариф ая рагъ экъечIдалди ва ам акIидалди вилик…» («ТIа гьа» сура, 130-аят).

Аллагьди гьакIни лагьана: «…ва ви Раббидин тариф ая нянихъ ва экуьнахъ» («Аль-Гъафир» сура, 55-аят).

1. Абу Гьурайради агакьарайвал, Аллагьдин Расулди лагьана: «Гьар пакамахъ ва нянихъ виш сеферда «Аллагь михьи я ва Адаз шукур хьуй!» (Субгьана-Ллагьи ва бигьамдигьи!) лагьай касдилай хъсан затI Дувандин юкъуз садавайни вичив гваз гъиз жедач, эгер гьадаз ухшар гафар лагьай ва я адал са вуч ятIани алава хъувур кас гьисаб тавуртIа» (Муслим).
2. Абу Гьурайради лагьана: «Са кас Пайгъамбардин патав атана ва адаз лагьана: «Я Аллагьдин Расул , эгер ваз чир хьанайтIа, накь йифиз зун кIасай акьраб себеб яз за вуч эхнатIа!» Пайгъамбарди адаз лагьана: «Гьакъикъатда, нагагь вуна нянихъ лагьанайтIа: «За Аллагьдин тамам гафарикай куьмек жагъурзава Ада Вичи яратмишайдан писвиликай хуьн патал» (Аузу би-калимати-Ллагьит-таммати мин шарри ма халакъа), - ада ваз зиян гудачир!» (Муслим).
3. Абдуллагь бин Хубайба агакьарайвал, са сеферда Аллагьдин Расулди адаз лагьана: «Пудра кIела: «Лагь: Ам, Аллагь, Сад я…» (яни «Аль-Ихлас» сура), гьакIни «муаввизатайн» (яни «Аль-Фалакъ» ва «АнНас» сураяр) пакамахъ ва нянихъ ва ида вун вири пис затIарикай хуьда» (Абу Давуд, ат-Тирмизи).
4. Усман ибн Аффана агакьарайвал, Аллагьдин Расулди лагьана: «Са затIунивайни зиян гуз жедач Аллагьдин а лукIраз, ни гьар пакамахъ ва гьар нянихъ пудра лагьайтIа: «Аллагьдин тIварцIелди, Адан тIварцIелди са затIунини я чилел, я цава зиян гудач, Ам – Ван Къведайди, Чидайди я эхир!» (Бисми-Ллагьи аллази ла язурру ма`а исмигьи шай`ун филь арзи ва ла фи-с-самаи, ва гьува-с-Самиуль Алим!) (Абу Давуд, ат-Тирмизи).

«РИЯЗУ САЛИГЬИН» КТАБДАЙ.