Экуьнин кпIунал кIелзавай Магьдина дуьа

Экуьнин кпIунал кIелзавай Магьдина дуьа

Имам Шафиидин мазгьабда (мазгьаб – шариатдин къанундин рехъ; мусурман динда кьуд рехъ ава: Гьанафи, Малики, Шафии ва Гьанбали. Гьар са мусурман и кьуд рекьикай садай фин лазим я. Дагъустанвийрин гзаф пай Шафии мазгьабда ава), экуьнин кпIунин кьвед лагьай ракатда рукугьдай хкаж хьайидалай кьулухъ гъилер хкажна махсус дуьа – магьдина кIелда, адаз гьакIни къунут лугьуда.

Магьдина кIелайдалай кьулухъ метIерал ацукьда (винидихъ баян гайивал), сажда ийида ва капI давамарда.

Экуьнин кпIунал магьдина кIелун важиблу сунна я (аб’азу-с-саляти).

ГьакIни магьдина маса кпIарин эхиримжи ракатдани кIелдай ихтияр ава. Маса кпIара магьдина, адет яз, ам кIелзавай хуьруьн ва я уьлкведин, гьакIни вири умматдин мусурманриз къурхувал аваз хьайитIа, бедбахтвал алудун патал кIелда.

Магьдина-дуьа

قنوت – مهدنا

اللَّهُمَّ اهْدِنِي فِيمَنْ هَدَيْتَ، وَعَافِنِي فِيمَنْ عَافَيْتَ، وَتَوَلَّنِي فِيمَنْ تَوَلَّيْتَ، وَبَارِكْ لِي فِيمَا أَعْطَيْتَ، وَقِنِي بِرَحْمَتِكَ شَرَّ  مَا قَضَيْتَ، فَإِنَّكَ   تَقْضِي وَلاَ يُقْضَي عَلَيْكَ، وَإنَّهُ لاَ يَذِلُّ مَنْ وَالَيْتَ، وَلاَ يَعِزُّ مَنْ عَادَيْتَ، تَبَارَكْتَ رَبَّنَا وَتَعَالَيْتَ، فَلَكَ الْحَمْدُ عَلَي مَا قَضَيْتَ، أَسْتَغْفِرُكَ  وَأَتُوبُ إِلَيْكَ، وَصَلَّي اللَّهُ عَلَي  خَيْرِ خَلْقِهِ مُحَمَّدٍ  وَعَلَي آلِهِ، وَاَصْحَابِهِ أجْمَعِينَ، رَبِّ اغْفِرْ وارْحَمْ وَأَنْتَ خَيْرُ الرَّاحِمِينَ. آمِينْ

Аллагьумма-гьдини фи-ман гьадайт(а),

Я Аллагь, Вуна дуьз рекье турбурухъ галаз зунни дуьз рекье тур,

ва гIафини фи-ман гIафайт(а),

Вуна саламат ийизвайбурухъ галаз зазни саламатвал це,

ва тавалляни фи-ман тавалляйт(а),

Вуна къаюмвал ийизвайбурухъ галаз зазни къаюмвал ая,

ва барик ли фи-ма агIтIайт(а),

Вуна гузвайда заз берекат ая,

ва къини би-рахIматика шарра ма къадзайт(а),

Ви мергьяматдивди зун хуьх Вуна кхьенвай писвиликай.

фа-иннака такъдзи ва ля юкъдза гIаляйк(а),

Гьакъикъатда, вири кIвалахар Вуна гьялзава, Ваз гьялна къалурдайди авач,

ва иннагьу ля язиллу ман валяйт(а), ва ля ягIиззу ман гIадайт(а),

Вуна къаюмвал ийизвайди агъуз аватдач, Ваз душманвал ийизвайди винени жедач.

табаракта раббана ва тагIаляйт(а),

Чи Рабби, Вуна берекат гузва, Вун виридалайни зурба я,

фа-ляка-ль-хIамду гIаля ма къадзайт(а),

Ваз шукур хьуй Вуна гьялна кьадар-кьисмет авурдай.

астагъфирука ва атубу иляйк(а),

За Вавай зи гунагьрилай гъил къачун тIалабзава ва Ваз за туба ийизва.

ва салля-ллагьу гIаля хайри халькъигьи МухIаммадин ва гIаля алигьи ва асхIабигьи аджмагIин.

Салават (хийир-дуьа) ва салам гурай Аллагьди Мугьаммадаз, адан хизандиз ва вири асгьабриз.

Рабби-гъфир вархIам ва анта хайру-ррахIимин.

Рабби, гунагьрилай гъил къачу, регьим це, Вун виридалай хъсан регьим ийидайди я. А́ми́н (жаваб це).

Эгер капI жемятдихъ галаз санал ийизватIа, имамди магьдина сес хкажна ва гзафвилин кьадарда аваз кIелда, маъмумри (имамдин гъуьгъуьна авайбур) гьар са тIалабунин гуьгъуьнай «амин» лугьуда, «Фаиннака такъдзи ва ля юкъдза гIаляйка…» гафарилай башламишна «…Астагъфирука ва атубу иляйка» гафарал кьван ва салават маъмумри имамдихъ галаз санал чпин къеняй кIелда.

Магьдина кIелна куьтягь хьайидалай кьулухъ вирида санал «амин» лугьуда.