Аллагьдиз дуьаяр авунин лайихлувиликай
Аллагь Таалади лагьана: «Лагьана ви Раббиди: «Заз минет ая ва За квез жаваб гуда!»» («Аль-Гъафир» сура, 60-аят).
Аллагьди гьакIни лагьана: «Эгер Зи лукIари вавай Закай хабар кьуртIа, гьакъикъатда, Зун мукьва я ва минетзавайдан дуьадиз За жаваб гузвайди я ада Заз минет ийидайла» («Аль-Бакъара» сура, 186-аят).
1. Ан-Ну`ман бин Башира агакьарайвал, Пайгъамбарди r лагьана: «Аллагьдиз дуьа авун ибадат я» (Абу Давуд, ат-Тирмизи).
2. Аишади лагьана: «Пайгъамбардиз кIандай Аллагьдиз куьруь жуьредин дуьаяр ийиз, асул мана лагьана, артухан гафар лугьун тийиз» (Абу Давуд).
3. Анаса лагьана: «Пайгъамбарди мукьвал-мукьвал Аллагьдиз ихьтин дуьаяр ийидай: «Я Аллагь , чаз и дуьньяда хъсанвал це ва эбеди тир дуьньяда хъсанвал це, ва чун Жегьеннемдин цIун азабрикай хуьх!» (Аллагьумма, атина фи-д-дунья гьасанатан ва филь ахирати гьасанатан ва къина азаба-ннари!» (Аль-Бухари, Муслим).
4. Ибн Масуда агакьарайвал, Пайгъамбарди гзаф вахтара ихьтин гафар лугьудай: «Я Аллагь , гьакъикъатда, За Вавай тIалабзава заз рехъ къалурун, зун диндар хьун, зи нефс хуьн (аси хьуникай ва вири пис крарикай) ва заз девлет хьун (яни маса инсанривай тIалабдай чарасузвал тахьун патал) (Аллагьумма, инни ас`алукаль гьуда, ва-т-тука, вальафафа, валь-гъина) (Муслим).
5. Абдуллагь бин Амр бин альАса агакьарайвал, садра Аллагьдин Расулди лагьана: «Я Аллагь , рикIерин гьал дегишарзавайди, чи рикIер Ваз муьтIуьгъ хьунихъ ракъура! (Аллагьумма, мусаррифаль къулуби, сарриф къулубана ала тIаатика!) (Муслим).
6. Алиди агакьарайвал, Аллагьдин Расулди адаз лагьана: «Лагь: «Я Аллагь , зун дуьз рекьел ракъура ва вири крара зун дуьздахъ твах!» (Аллагьумма-гьдини ва саддидни!) И гьадисдин маса жуьреда агакьарзавайвал, Пайгъамбарди лагьана: «Лагь: «Я Аллагь , гьакъикъатда, за Вавай заз рехъ къалурун ва дуьзвал тIалабзава!» (Аллагьумма, инни ас`алукаль гьуда ва-с-садада!» (Муслим).
7. Анаса агакьарайвал, Аллагьдин Расулди гзаф лугьудай: «Я Аллагь , гьакъикъатда, за Вавай тIалабзава зун зайифвиликай, къайгъусузвиликай, ажузвиликай, кьуьзуь хьана гьалдай финикай ва мискьивиликай хуьн, ва за Вавай тIалабзава зун сурун азабрикай хуьн, ва за Вавай тIалабзава уьмуьрдин ва кьиникьин пис четинвилерикай хуьн! (Аллагьумма, инни аузубика миналь-ажзи, валькасали, валь-жубни, валь-харами, валь-бухли, ва аузубика мин азабиль-къабри ва аузубика мин фитнатиль-магьйа валь-мамати!)»
И гьадисдин маса жуьреда агакьарзавайвал, Аллагьдин Расулди гьакIни лагьана: «…буржунин залан парцикай ва инсанрин зулумдикай (…ва далаи-д-дайни ва гъалабати-р-рижали!)» (Муслим).
8. Абу Бакр ас-Сиддикьа агакьарайвал, са сеферда ада Аллагьдин Расулдивай тIалабна: «За капI ийидайла гьихьтин гафаралди за Аллагьдивай тIалабдатIа заз чира». Пайгъамбарди r лагьана: «Лагь: «Я Аллагь , гьакъикъатда, за гзаф сеферра жуван рикI тIар жедай крар авуна, амма Валай гъейри гунагьрилай садавайни гъил къачуз жедач! Ви багъишламишун багъишна залай гъил къачу ва зун Ви регьимдик кутур, гьакъикъатда, Вун – Гъил къачудайди, регьимлуди я!»» (Аллагьумма, инни заламту нафси зульман касиран, ва ла ягъфиру-з-зунуба илла Анта, фа гъфир ли магъфиратан мин индика ва-ргьамни, иннака Анталь Гъафуру-р-Рагьиму!)» (Аль-Бухари, Муслим).
9. Аишади агакьарайвал, Аллагьдиз дуьаяр ийидайла, Пайгъамбарди r мукьвал-мукьвал лугьудай: «Я Аллагь , гьакъикъатда, за Вавай тIалабзава за авур ва за тавур писвиликай зун хуьн! (Аллагьумма, инни аузу бика мин шарри ма амильту ва мин шарри ма лам амаль!)» (Муслим).
10. Аишади агакьарайвал, Пайгъамбарди r мукьвал-мукьвал Аллагьдиз ихьтин дуьаяр ийидай: «Я Аллагь , гьакъикъатда, за Вавай тIалабзава зун ЦIун писвиликай ва ЦIун азабрикай, ва девлетдин писвиликай ва кесибвиликай хуьн! (Аллагьумма, инни аузу бика мин фитнати-н-нари, ва азаби-н-нари, ва мин шарриль гъина валь факъри!)» (Абу Давуд).
11. Анаса агакьарайвал, Пайгъамбарди лагьана: «Я Аллагь , гьакъикъатда, за Вавай зун жузам азардикай, диливиликай, лепрдикай (жузам азардин жуьре) ва маса пис азаррикай хуьн! (Аллагьумма, инни аузу бика миналь бараси валь жунуни, валь жузами, ва сайииль аскъами!)» (Абу Давуд).
12. Шахр бин Хавшаба лагьана: «Садра за Умм Саламадивай жузуна: «Я мусурманрин диде, Аллагьдин Расул ви патав гвайла ада гзафни-гзаф Аллагьдиз гьихьтин дуьаяр ийидай?» Ада лагьана: «Гзафни-гзаф ада ихьтин дуьа ийидай: «Я рикIерин гьал дегишарзавайди, зи рикI ви динда мягькемара!» (Я Мукъаллибаль къулуби, саббит къалби ала диника!)» (Ат-Тирмизи).
13. Абу Умамади лагьана: «Пайгъамбарди Аллагьдиз гзаф жуьреба-жуьре дуьаяр ийидай. Абурукай чавай садни рикIел хуьз жезвачир. Са сеферда чна адаз лагьана: «Я Аллагьдин Расул , вуна Аллагьдиз гзаф дуьаяр авуна, абурукай чавай садни рикIел хуьз хьанач!» Пайгъамбарди лагьана: «Абур вири санал кIватIзавайди вуч ятIа лугьудани за квез? Лагь: «Я Аллагь , гьакъикъатда, за Вавай а хъсан затI тIалабзава хьи, гьим Вавай Мугьаммад Пайгъамбарди тIалабнайтIа ва за Вавай а затIунин писвиликай хуьн тIалабзава, квекай Вавай Ви Мугьаммад Пайгъамбарди тIалабнайтIа! Анжах Вавай куьмек тIалабун лазим я ва анжах Ваз чида, лазим яни гьа куьмекдин тIалабунар кьилиз акъудиз ва я тушни ва Аллагьдилай гъейри садазни я къуват, я къудрат авач!» (Аллагьумма, инни ас`алука мин хайри ма саалака мингьу набиййука Мугьаммадун ва аузу бика мин шарри мастааза мингьу набиюка Мугьаммадун ! Ва анталь мустаану ва алайкал балагъу ва ла гьавла ва ла къуввата илла биллагьи!» (Ат-Тирмизи).
РИЯЗУ САЛИГЬИН» КТАБДАЙ
