Я пикри, я кьас агара…
ЖявхIейчибад дагъистанланти машгьурбиубти саби пергер гIяхIялдеш дарес ва чучибра халатала хIурматбарес балниличибли.
Халати адамти кабиибси, ихтилатбикIуси мерличи биштIати гъамбиэс урузкIутири, илдала хIурмат-хатир дуэс гъай кьалли чинаб бурусири. Эгер гIулухъаби, дурхIни лебси хъули гьести гIямрула адам ацIалри, лебилра харчбизурли, илис мер бирусири, халасила уркIила мурад бетурхахъусири. Цалра жагьиллис халатачил жалбяхъес, барсур хIейгибизеси дев бурес чинад уркIилизи лябкьусири.
ИшбархIила жагьилтачи хIерикIалли, илдани алавти халаталацун ахIенну, вегIла бегIталалра хIурматхIебирусиван кабилзан. Чузи бегIти яра мугIяллимти гъайбикIулил, пикрилра хIебарили, някъбазирти телефонтази бухIнакабикили саби: лихIбачи наушникуни даршили, дурути дугьби хIедакьибсила гIердиру. ВегIлизи халаси адам гъайикIухIели, лерил секIал урдатурли илини се бурулил пикри бяхIчиаэс гIягIниси ахIену? ИшхIелла жагьилтала, гьеч илгъуна барес я пикри, я кьас агара.
ЦацахIели гьанбиркули бирар, сабира халабаили, бегIти бетаурхIели, чучибад акIубти дурхIни илдани селичи бурсибиру вара или, эгер чулира иш дунъяличиб адамти секьяйдали вяшбикIутил балули хIебиалли. Гьайгьайрагу, ил нушани гьала хили багьес хIедирехIе. Лерилра секIал заманали якьиндиру.
ГIулухъаби ва жагьилти илцад авараагартили хIебирахъес багьандан илди биштIали лебай бяркъличи биркахъес гIягIнили саби. ИлхIели бала илдани чула бегIтала, мугIяллимтала ва чучибра халатала хIурматбиресра илдани дурутачи лехIбизесра.
