ВегIла улка багьандан цIахли саби
ИшбархIи дила белкIлизиб нуни ахъбурцисра, дила бекIлизибцун ахIи, бахъал цархIилтала бургазибра алкIуси суал. Абдал ахIенси, гIядатла адам иличила пикрихIейкIес хIейрар. Ил суал жура-журала зягIипдешуназибад биштIати арабарес или арц учидяхъес кьасли телевидениелизирад чедиахъути передачабачила саби.
Мисаллис бурасли, телевизорлизив чейахъули сай язихъдухъеси куцличилси виштIаси дурхIя ва тIашбизагарли хIулбазирад биса ушкуси илала неш. Ил дурхIя аравиахъес багьандан, дурала улкализирад дебали дурхъати дармунти асес гIягIнити сари или бурули саби. Чебиахъули саби сунечи арц (300-200 яра 100 къуруш) дархьес гIягIниси белкIра.
Ил заманализиб телевизорла гьала кабиибти кIел бухънара дила пикрумазиб нуни чебиулра. Телевизорличи хIеррикIуси рухънала хIулбазирра дакIудулхъули сари биса. «Гьари, дила мурул, икI виштIаси аравирахъути дармунти асахъес дила пенсиялизирад 300 къуруш дархьа», - рикIули сари ил муруйзи. «200 къуруш дила шайзирадра кадихьили, 500 дурхьисра», - викIули сай ухъна.
УркIи-уркIилабад бурасли, набра илди язихъбилзули саби. ХIера, иш макьала лукIухIелира НТВ-каналлизиб чебаахъиб дебали язихъизеси куцличилси дурхIяра илала нешра. Екатеринбурглизибадтири илди. Хъябличиб бекI бихIес хIейруси виштIаси урши Кирилл набра дебали язихъизур. Ил гьарли-марли зягIипли виъниличи ну вирхулра.
Амма имцIаливан хIерхести роликунира чедиахъули бирар. Роликуназир зягIипси дурхIя дебали дурхъаси операция барахъес багьандан, Европала улкнази вархьес гIягIнили саби бикIути белкIанира дирар. Дирар белкIани дурхъати дармунти асес дахъал арц гIягIнили сари бикIутира.
Гьайгьайра, адамти биргIябир-гили, арц учидяхъес кьасличил роликуни чедиахъути къалпчибира гIямалчибира леб илдала ургаб.
Нуни илдигъунти макрукьябала белкIани дахъал каналтазир чедиулра. АлкIули саби илхIели пикри: «Ягъари, сен дахъал дирутив нушала улкализир арадарес хIебирули, цархIилти улкназир арадирути излуми? Нушалайчиб итабти тухтурти гIяхIтив? Марлира нушала улкализир даарила кьадарла дармунти даресалра хIебирулив?
РФ-ла арадеш мяхIкамбирнила министр Михаил Мурашкони бурни хIясибли, нушала улкализир лерилра биштIатала зягIипдешуни арадарес бирули саби. Или биалра, цацабехIтани чула дурхIни арабарахъес дурала улкнази бикули саби.
Нушала улкализиб бузули леб гIяхIдеш барес цахIнабикибти адамтала кьукьяла «Круг добра» бикIуси фондра. Илис бекIдеш дирули сай Петербурглизивадси динна къуллукъчи Александр Ткаченкони. Илини бурни хIясибли, рахли нушала улкализиб цархIил сабигъуна агарси (уникальная) операция хIебирули биалли, зягIипси дурала улкализи укьяхъес чула фондли кумекбиру. Илдани дурутачил дила пикрира цугбиркули саби. Наб мурталра гьанбиркусири ил тяхIяр биэс гIягIниси саби илира.
ХIебиалли, чинарад дакIуду-хъунти телевидениелизир илди шаддикьдеш?! ИлданикIун нушала ЧебяхIси улка цIахбирули саби.
Нушази чедиахъути дард бухIнати роликуначи тамай вирхес гьалав, пикриухъес гIягIнили саби, чис илдани хайри лебхуси или. Илди дахъал лерли диъниличибли ил хIянчи белгиси, кабизурси тяхIярличи бикилигу.
Бурес чебиркур, илдигъунти роликуни чедиахъес багьандан телевидениела каналтас дахъал арц дедлугути сари илира, минутли 1800-2000 къуруш. Амма илди харжани гьамадли черихъути сари, бикIар. Илгъуна ролик чебаибмад, бусягIят 200-300 къуруш дархьести адамтира нушачиб камбирули ахIен. ЦацабехIтаникIун 500-1000 къурушличирра имцIали арц дурхьули дирар.
Ца каналлизирцун ва гьачамцун ахIен роликуни чедиахъутира. Ролик чебаахъес тиладибарибтас биалли, цархIилван буралли, арцла хIеркI булхъули саби: адамличи уркIецIидулхъути гIядатла адамтира нуни чедиб гьанбушибтигъунти бухънабира бахъал лебти саби нушала улкализиб.
Илди роликуначи хIерикIухIели, дила бекIлизир ишдигъунти суалтира алкIули сари. Цаибсигъуна, сен цалра роликлизиб якьинни хIебуруси, чинаб сабил изала сагъбируси, чинарад исути илди дебали дурхъати дармунти или? ЦацахIели чIянкIли улкала уцун бурули бирар. КIиэсилра, илди роликунани закон булъули ахIен, хIебиалли, телевидениели илди чус дигуси тяхIярли чедиахъес бирар. Гьамадли бургули саби камси арцлис зягIипсила дарес разибиркути биштIаталара илдала бегIталара ролани дузахъести «гIяртистунира».
Илди роликунала чевкад ну ишгъуна пикриличи вакIира: имцIаливан ил гIямалчибала ва макрукьябала гIяхIси хайри кайсуси бузери (бизнес) биэс гIягIнили саби. ЦацахIели гьалли-марли зягIиптачилара илдазиб бурули биалра.
