Арцлис гъабзадеш асес хIейрар
БусягIятла замана, хIуша лебтанилра балуливан, дявила хасси балбуц дурабуркIнила хIяракат даимбиубли саби.
Илизир бутIакьяндеш дарес дигутала лугIира бархIиличи-бархIи имцIабикIули саби, илхIелира саби-гIяхIъулали, вягIда бигьи, ВатIан батахъес дурабулхъутала къяянира чедирцIахъули. Саби-гIяхIъулали Россияла Ярагъладарибти ЦIакьаназир бутIакьяндеш дарес арбашутас пачалихъла шайзибадра кумек леб, илдас бургъантас хасти кункдешунира гьаладирхьули сари, цазаманализир дедлугути арцла кьадарра леб, белгиси алапара кабилзахъули саби.
Гьайгьайрагу, илкьяйдали биэсра гIягIниси саби. СенахIенну ишхIелла аги-кьяйда пикрилизи касалли, улкалисра СВО-лизибти бургъантасра кумек хIяжатли саби. Чумал баз яра байхъала дуслилра бургъанти хъули отпускличи бархьили, илдала мерличиб барсбиэстира биалли, гIяхIсигу. Саби гIяхIъулали илдас кумекличи музабулхъути лебхIели, сецад гIяхIсил. Илди-ургаб гьачамалра ярагъ някълизи касибтира леб. Амма сен-биалра, ВатIай гIяхIдеш барес ибти пикрумани ва адаб-хIяяли илди шайчиб балтули ахIен. Илгъуна гьарли-марси гъабзадешла хIукму кьабулбарибти пачалихъли гIеббурцнира дебали гIяхIси саби.
«Арц багьандан саби илди саби-гIяхIъулали дявила хасси балбуцлизир бутIакьяндеш дарес аркьути» ибти дугьби дурестира камбирули ахIен гIядатла адамти-ургаб. Амма арцлис сеналра асес вирути ахIен гъабзадеш ва игитдеш, илди уркIила духIнар агарли диалли. Иличила балес гIягIниси саби гьарилли. Арц багьандан ВатIан батахъес вируси ахIен, иличи сегъунтилра диги агарли. Ил шайчиб хIязлис гъайбикIутала пикруми сеналра дархьтази халдарес хIерирус нуни. Ванати хъулрази кабиили, бургъантас ва пачалихълис кумекличи музабухъунтачила севан-дигара гъайбикIес илдас гьамадли саби. Амма илдигъунтази гьачам-гьатIи бурес дигахъаси: «Гъабзадеш арцлис асес вирути ахIен. Илди адамлизир яра лер, яра агара».
Ил багьандан ишбархIи гIязиз ВатIан батахъес, чула жан ахIерахIедарили, музабухъунтас нушаб баркалла дикIес гIягIнили саби. Ца мезлукьли дурибти гъайличи хIедиули, гьарли-марти гьунарти кьиматладирули, гьаладяхI дашес чебиркур.
