Ибрагьим Идбагличил детаурти кIел анцIбукь
Ибрагьим Идбагла гIямрулизир кIел анцIбукь кадикиб. Цализив гапвариб, цализив уркъувяхъиб. Ца заманализив Ибрагьим Идбагличи цIалис лагъдеш дируси ца адам вакIиб.
Ибрагьимли илис хIурмат-личил гIяхIялдеш дариб. Ил чебаибти малаикунас кьабулхIебикиб, илдира Аллагьличи ﷻ гайцIбухъун. «Я Аллагь ﷻ ХIела юлдашли, ХIела душмайс хIурматличил гIяхIялдеш дариб» – или дугьабизур. Аллагьли ﷻ илдази иб: «Нуни Дила юлдаш хIушачив гIяхIил валасра». Аллагьлира ﷻ ЖабрагIил малаик Ибрагьимличи вархьиб. Аллагьла ﷻ амру бирули ЖабрагIил малаик Ибрагьимличи вакIили, малаикуни тамашабиубси анцIбукьличила багьахъур. ЖабргIилли Ибрагьимлизибад тамашала жаваб бакьиб: «Ну дила Аллагьлизивад ﷻ бурсивиубсира, Сунес зарал барес бузутасра гIяхIдеш бируси». ДекIарси заманализив Ибрагьимличи гIурра цагьатIи къанчлис лагъдеш дируси адам вакIиб. Ибрагьимли ил унзала ухIнахIевхъахъи, илизи яра сунела дин батахъес, яра арукьяхъес хъарбариб. Ит адам дин батес кьабулхIейкили, шурухъи арякьун.
Аллагьли ﷻ Ибрагьимличи ЖабрагIил малаик вархьиб. ЖабрагIилли Ибрагьимличи Аллагьла ﷻ ишди гъай хиб: «Дила лагъ хIечи ухIнаухъес дигулири, хIуни биалли ил къанчанас лагъдеш дирни багьандан ухIнахIевхъахъи гьавяхъири. Нуни биалли, илини къанчанас лагъдеш дирниличилра 80 дусла бухIнаб сунес ризкьи бедлугулира». Ибрагьим пашманвиубли, висули итис гIелавад дураухъун. ГIевваибхIели Ибрагьим итизи чариахъес тиладиухъун, амма ит чарухъес кьабулиркули ахIенри Ибрагьимли сай гIелавад викнилис се сабабли бетаурал бурайчи. ИлхIели Ибрагьимли итизи буриб кабикибси анцIбукьличила, Ибрагьим викIар: «Аллагьли ﷻ наб хIу багьандан уркъубяхъиб». Къанчанас лагъдеш диран пикриухъун, сунени деркIибти гIямруличи пашманвиубли Ибрагьимлизи иб: «Я Ибрагьим, нуни иман бухира лебил гIяламла ца Аллагьличи ﷻ».
