Нушала челябкьлали сабти илди мяхIкамбирехIе…
ГIергъиси замана гIулухъабала хIейгидизести адуцала лебтанилра хIясибдирули дургар. Сегъунти сари илди? ИшбархIи бахъалгъунти жагьил адамтани, школала бучIантани урези-хIяяагарли, чина-биалра тIашбизурхIели электронный тяхIярла папрусуни дитIикIули сари, цархIилван илдас вейпуни бикIули саби.
Хаслира ишхIелла манзиллизиб ил масъала жагьилти-ургаб дебали челукьусили бетаурли саби. ГIякьлу камти, селичилра пикрихIебулхъути илди шакалра биркули ахIен илдала заралличила, хаслира халабикIуси кьаркьайс. Вейпуни дитIикIниличирли ишбархIи гIулухъаби ва жагьилти-ургар демдрила излумира тIинтIдикIес дехIдихьили сари. Тухтуртира ил анцIбукьли дебали кьакьабакIахъили саби. Жагьилси кьаркьайзир дитIикIути вейпунала асарлиур дахъхIи агарли хургьрала, духIнарти биркIантала демдрила излуми алкIахъули сари. Жагьил адамлис иличибра вайси биэс бирару гьатIи? СенахIенну бахъла гIямру вавалихIедяхъили лерай, хапли къябудули сари. Чула гIямру кьурбандарес бирули, илди уряхIти секIал хIедержес сен гIямал бетхIеруси? Илцад халаси багьа бедес хIяжатлив гьатIи, шайтIа аваралис? ГIямрукIун нушаб гьачам сари дедлугути. Сен иличила пикрихIебулхъути жагьилти? ГIямрула вавнили ва челябкьлали сабти жагьилти берцахъес хIяжатли саби нушаб лебтасалра цадиубли.
Буралли, бахъалгъунти ишхIелла жагьилтала хIял-тIабигIят, адуцала телефонтала асарлиур дебали нукьсандирули сари. Бархьли буралли, нушала гIямрулизир дакIудиубти ишхIелла технологияби жагьилтала, биштIатала гIямруличи къаршили пикридарибтигъунти сари, амма гьар секIал гIяхIла шайчи дарсдарес вируси сай. ВиштIаси ва жагьилси адам гьалавяхI вашахъес сегъунти-дигара имканти лер ишхIелла технологиябазир.
Нушазивад гьарилла ишгъуна суалра акIес асубирар: сен далтутив гьатIи, адамла арадешлис заралбирахъути секIал дирцахъес, илди тIинтIдирахъес? Арадешлис диргаладулхъниличила балуси сабигу лебтанилра. Или биалра, гIулухъабас, школала бучIантас зараллати секIал дирцули сари. СенахIенну илдазибад халаси хайри кайсухIели. Илдачибли бетаурси хайри селис гIягIниси базригантас? ЦархIилтас зарал бетарахъуси хайри биубличиб, агарли гьалаб сабигу. Чисалра дигIяндеш ахIен ил халаси бизнес биъни.
Россияла Федерациялизиб кьабулбарибси ишгъуна закон лебси саби «Пачалихъла ва миллатла урехиагардешличила» («О государственной и национальной безопасности») бикIуси, сабира пачалихъла ва миллатла урехиагардеш гIеббурцниличи бяхIчиаибси? ХIякьикьатлизиб биалли, ил хIебузахъули саби, мурталраван гьар секIал кагъуртазир сари, хIякимти дацIти гъайли бугьули саби. Ил закон хIясибли халкьла гIямрулис урехи алкIахъути, илди къябудахъути секIал къадагъадарес чебси саби! Чина хIердикIули гIядлу-зегъа далтахъути органти?!...
ХIейгеси биалра, илдигъунти анцIбукьуни нушала жамигIятличир дахъал сари, илди агардаресра гьарил адамлизибад дигахъуси саби. Чилилра хIейсалли, тукентала кьасурбачирадра илди деткайхъур. Тяп илгъуна аги саби дагьри думкьахъути секIайчилра, цIакь, энергия башахъути держличилра. Гьанна илди хIедужути жагьилти-ургаб камли саби. Селис дирцути школала бучIантас электронный тяхIярла папрусуни, цIакь башахъути держ? Нуша-алавти адамти, хIукумат цархIилтачила пикрихIебикIули, чус хайри биахъесцун пикрибикIули лебай, жамигIятла бухIнаб низам хIебирар ва жагьилтира гьар бархIи гIелабяхI башар. Гьар се-секIал дарсдарни нуша гьариллизибад дигахъуси саби. Даширая, пикридулхъехIену ил анцIбукьличила…
Нушала улкализир ковидла анцIбукьуни кадикили гIергъи бахъал хIякимтала шайчир такьсирла черкадти делоби абхьес гIягIнитири, сенахIенну нушала улкализибван дебали халаси кьадарлизиб адамти алхунти ахIенри чинабалра.
Россия ца халаси лабораторияличи шурбухъахъи саби, сунезирра агъулати секIал хIялумцIути ва халкь урбиркахъути. Улкала патриотунили сабти юристунани, следовательтани, академикунани буруливан, нуша лерилра багьла-багьлали кадуршулра: гьаваличил, шинничил, берк-бержличил, лерилра имканбикIутигъунти секIайчил… Нуша биалли, мурталраван, гIяхIсиличи хьулдикIехIе…
