Сукъурси – хIяжлизи
Сукъурси – хIяжлизи
ЧехIебиуси адамличиб чебси саби сунени хIяж барес (сунела мерличив чилра вархьхIеили), эгер сай гIяхIъулали сунечил варх вашес кьабулси адам левли виалли, яра ургабси кьадарла багьалис уцибси виалли.
Илкьяйдали зягIипси яра ухънаваибси адамличира чули хIяж дураберкIес чебси саби, илдани сай гIяхIъулали кьабуликибси адамличил, яра багьалис уцибси адамличил. Сукъурсиличи ва ухънаваибсиличи – гьандушибти шуртIри диалли чебси саби чараагарси хIяж чули дураберкIни. Адамтала кумекличи хIяжатдеш лебли биалли, илдас багьа бедес багьандан сегъуна-биалра лебдеш биэс гIягIниси саби.
Илкьяйдали хIяжла чараагардеш сабиуси ахIен урехиагарси гьуни хIебиалли. Эгер гьунчиб гъарачиби, дугIла мицIираг яра цархIил се-биалра адамла арадешлис ва лебдешлис урехиласи биалли ва цархIил гьуни хIебиалли, ил тяхIярлизиб хIяж барни чараагарси ахIен. Эгер хIяжликьянани сунечил барх касиби вачарла маслисцун биалли урехи, ил хIяж дурахIеберкIес сабаб ахIен. ХIейгесилизи халбируси саби дазурбачиб яра цархIил мерличиб полициялис арц дедлугни, бурсихIебиахъес багьандан.
Эгер гамиличиб ахIи цархIил гьуни хIебиалли, ил тяхIярли хIяж барни чараагарси саби, хIятта цацадехIти гамурби ил гьунчир кaйгIули, имцIатигъунти детиули диалли. Гьунчиб урехи хIебиахъес багьандан, балтахъути адамти багьалис буцес гIягIнили биалли ва багьни дурхъати хIедиалли, илди буцили хIяж барес чараагарси саби. ХIяжатдеш биалли, гьуни чебиахъанра багьалис уцес чебиркур.
Илкьяйдали хIяж барес чараагарси шартIлизи халбируси саби замана, сабира хIяж барес имкан биубхIейчибад бехIбихьили, ГIярафала бархIиличи сабаайчи, левси мерличивад ГIярафала дубурличи ваэс. Ил кьадарла замана кали хIебиалли, ил дуслизиб иличи хIяж хъарси ахIен.
