ГIемчбушибхIели се ирес гIягIнисил
ГIемчикIни – адамла саби-сабил бетаруси саби, илхIели гьигьикIути диркIанти умудирути сари. Ил багьандан Аллагьлис ﷻ деза багьахъес гIягIниси саби: «АльхIамдулиЛляхI» или.
ГIемчибхIели мухIли някъли яра явлухъли кIапIбарес чебиркур, хабарагарли алавчартачи кIантIури кадхIейкахъес. Яра цархIил шайчи шурухъес. ХIядислизиб бурили саби: «МухIяммад Идбагли ﷺ мухIли кIапIбирусири ва тIама гIяшбирусири.
ГIемчбушили гIергъи Аллагь ﷻ гьанушили «АльхIамдулиЛлагь» ируси саби. Мякьлабтани биалли «ЯрхIамукаЛлагь» (Аллагьли ﷻ уркIецIи бараб хIечи). ГIемчбушайли жаваб чарбалтуси сай: «ЯхIдикумуЛлагьу ва юслихIу балякум» (Дархьдарабая Аллагьли ﷻ бархьси гьунчи ва аги гIяхIбиахъаб). Илкьяйда бикIути саби суни гIемчбушайли Аллагьлис ﷻ деза барили «АльхIамдулиЛлагь» ибхIелицун. Илкьяйда хIеалли хIушанира илизи гьанбушая. Амма васвасикIалли илини ибниличи «ЯрхIамуЛлагьу ман хIамидагьу» иру. (Аллагьли ﷻ уркIецIибараб Илис деза барибсиличи).
ГьагьикIни – азгъиндешла ва анцIбукьнила лишан саби. Ил багьандан Аллагьлис ﷻ хIейгахъу гьагьбикIути. ШайтIан биалли гьагьухъунси чеалли разибирар. ГьагьибхIели някъли мухIли кIапIбарес ва «АстагъфируЛлагь» эс чебиркур. Идбаглаﷺ хIядислизиб бурули саби: «Чили-биалра гьагьиралли някъ мухIлиличи чебуцая, сенкIун ила шайтIан бухIнабухъес асубирар».
