ЧеббалкIунси наслу…
ЧеббалкIунси наслу…
Кавказ «гIямрули белкъунти» адамтачибли, илдала хIурмат-хатир дирниличибли машгьурси саби. Нушачир мурталра гьар урла дубурлантала яхI-ламусла, адаб-хIяяла гIядатуни дузахъутири. Се биубли хьалли, гьарли-марси дубурлан адам сунела адамдешлис, яхI-ламуслис марли кавлусири. Ишаб вегIличив халаси адам хъули ацIалри, харчизурли ил кайахъес мер бирусири, гъайикIухIели, хIурматличил илини бурусиличи лехIирхъусири. Гъайла къантIа, дубурлантани бухънабала мекелли халаси хатирбирусири. Гьарли-марти дубурлантала гIядлу-зегъа – адамдешла къиликъунала кахIебурхуси урунж саби, сунезира лерилра гIямрула пасихIдеш хьурадиубси.
ГIядатлибиубливан, бухънабаибти бегIти дурхIначил барх ца юртлизиб хIербирутири. БегIтани дурхIнас гIямрулизиб багалабиэси гIякьлу гIеббурули, жагьилтани чус хъалицIализиб кумекбирули, цаличил ца цабалги хIербирутири.
ИшбархIи дурхIнани бегIтала хатир булъути, илди селизилра хIебирути анцIбукьуни имцIадиубли сари. Се бетаурлира нушаб?
Жагьтазибад цугли байхъала дурала мераначиб саби, бегIтира, гъамтира урехилира, урезилира бубкIахъули. Байхъала – дунъяра ахиратра хъумартурли, хъархIерагарти гIямрулизи ахъили саби. Ургар калунти ца чумал адам – нуша – дархилра, илди гIякьлуличи лебкехIе или. Пикри мекелли бархьси саби. Амма ил се гIямал балбуцили гIямрулизиб дураберкIес гIягIнисил гьачамлис гIячихъли балуси чилра агара.
Дила пикрили, абзурли хIукумат музабухъалра, ил барес нушала имкан хIякьян, эгер гьарил виштIаси гIямрула пасихIдешли ухIнавицIибси хала дудешлира, уркIи ванаси хала нешлира бяркъличи хIекалли. Хъалибарг – ил сабигу гьарил жамигIятла дай уркIи. БикIуливан, вегIла анкъилав вамкьурси, гумайлавра вархьхIейрар. ХIебиалли, гьарил адамла анкъи-къуш ил гIядлу-зегъала гIевдухьли биэс гIягIниси саби.
АрагIеб улкализир, республикализир кадиркути кахти анцIбукьуни, адамдеш агарти баркьудлуми, такьсирти – илди дурадуркIути нуша-ургаб хIербирути, заманаличиб чучи гIягIниси бяркъ хIебаибти адамтани сари. Ил багьандан нушани хъалибаргличи, хала бегIтала гIядатуначи халаси пикри бяхIчиаэс гIягIнили саби. хаслира гIергъиси замана дурхIнани бегIти «Бухънабала юртанази» бедлугути анцIбукьуни имцIадиубла. ИлкIун нушачи, дубурлантачи бекIлил балхIебикибси, цIахси баркьуди саби. ЧIапIла кабатурли бегIти шурла бехIлабад лайбикIути замунти-мага чардиубли хIедиэс нушачи? Нушара духънадиутирагу, иличилара хъумартес асухIебирар…
