БиштIати
МухIяммад Идбагла ﷺ акIубтири верхIел биштIати: 4 рурси ва 3 урши. Кьасим – акIубсири Маккализив, виштIахIелил 17 базличив вебкIиб;
Зайнаб - акIубсири Маккализир, ил шери редибсири ГIабуль-ГIассалис – Идбагла ﷺ узикьарлис. Илдала акIуб урши ГIяли ва рурси Умамат. Зайнаб жагьти гIямрулизир ребкIиб.
Рукьия – акIубсири Маккализир, ил шери редиб ГIусман асхIяблис. Ил жагьли лерай, зягIиприкили ребкIибсири Мадинализир, Бадрализибси дергъла манзил.
ФатIима – акIубсири Маккализир, Аллагьли ﷻ хъарбарни хIясибли, ил шери редибсири Идбагла ﷺ асхIяб ва узикьар ГIялис. Илдала акIуб урегал биштIати: ХIясан, ХIусейн, МухIсин, Умму-Кульсум, Зайнаб, Рукьия. ФатIима дебали жагасири, ил МухIяммад Идбаглисра ﷺ дебали дигахъи. Ил ребкIибсири Идбаг ﷺ вебкIили 6 базла гIергъи, ил Алжанализир хьунул адамтала ургар регIлара халалгъуна сари. Илала наслу халалти уршби ХIясан ва ХIусейзибад калунти саби. Илдала ургаб лебри имамти, дурхъати авлияби, тарикьатла шуйхри ва бахъал машгьурти адамти, ил насаблизибадти нушала манзилра хIербирули саби;
Умму-Кульсум – акIубсири Ислам кабизахъурхIели, ЧевяхIси Аллагьли ﷻ хъарбарни хIясибли, ГIусман асхIяблис шери редибсири, илала халал рузи Рукьия ребкIили гIергъи. Ил жагьли лерай ребкIиб, гьижрала 9 –ибил дуслизир;
ГIябдуллагь – акIубсири Идбагличи ﷺ караматдеш дархьили гIергъи ва виштIахIелил вебкIиб;
Ибрагьим акIубсири гьижрала 9 –ибил дуслизив. Ил акIубли верхIел бархIи дикибхIели Идбагли ﷺ хIякьикьатлис мас белгьунсири ва у бедибсири. Илала бекI бялгIи, гъезла битIакI хIясибли цIуб арц садакьалис дутIибсири. Ибрагьим вебкIиб 18 баз виубхIели. Ил бархIи Идбагла ﷺ хIулбазир нургъби сарри. Илизи хьарбаибхIели: «Идбаг висусив гьатIи?», или - илини ибсири: «Ишди пашмандешла нургъби сари, амма нушани ЧевяхIси Аллагь ﷻ гьимукIеси хIебирехIе».
Ил бархIи берхIира буцибсири. Адамтани ил Ибрагьимла бебкIаличил бархбасахъунхIели Идбагли ﷺ ибсири: «БерхIира базра Аллагьла ﷻ ЧевяхIдешла лишани саби, илди дурцни чила-биалра бебкIаличил яра акIниличил бархбасунси ахIен».
МухIяммад Идбагла ﷺ урегал биштIати акIуб Хадижазибад, Ибрагьимла неш биалли Марият сарри. ФатIима ахIенти лебил биштIати Идбаглис ﷺ гьалаб бебкIиб.
Илди лебтачивадалра Аллагь ﷻ разили калаб, нушаб илди шапагIятли биаб.
